Ngoluk Légaːpé Kumbilang
3
Ajonkídínga, lutérso, nolukkolo kapé Ruːtumké lutaddém lomdanna kinmoton édémíːpé appí:lo lomdanna pínggoːdopé odokké édém appíːloi ménggésudopé, ngoluk légaːpé kumbilang. 2 Aisíːmaːnélaː aiman taniːlok alaglokké gípítsulaːdopé ngoluk légaːpé kumbitílang; kapéné appíng taniːlokké méːjígé kamang.3 Émpigeːla Ruːtumbí aronéːko; bí nolum kínggímola léːyé odokké aimaːnédokkém bí moribiyé. 4 Ngolu nolum Ruːtumkolo méːtinsula dung, ngoluk lulígnam appíːdém nolu ibomna dung odokké édémbulum iyartílang.
5 Ruːtumbí nolum Ruːnék kínggíp ayaːnamdém odokké Kiristoké binam oijosula duːnamdém kindopé gíbokaːlangka.
Agerém Gerpéruːnammé
6 Ajonkídínga, ngoluk Ruːtum Jisu Kiristoké aminno ngolu nolum lulígdung, lo:bagné méngkésunkídíːdokkélaː séːkobulu ngoluk luyírnamkídíːdém tadman bulukkolokké nolu moːtéːpé duːlang. 7 Kapéné ngolu okkom idungan, édém nolu aíé kindag odokké nolusin édémíːpé ipénammé. Ngolu édílo noluk lédílo dungngan ngolu lo:bagmangai, 8 Ngolu arrém bimaːpé séːkkoloksin okkomsin domangai. Odokké ngolu nolukkolok séːkomsin ngasod mogemang émna longgé yummém duːrasumaːpé ager-gerka. 9 Ngolum bidumsudopé kolanan ilang-gílangé ngolukké dung, émgom nolu ngoluk gernamdém kaːyisula germínyépé émna ngolu agerém gerka. 10 Kapéné édílo ngolu noluk lédílo dungngan, ngolu nolum sémpé lulíkkaː "Séːkoi ager germaːji, bí dopésin lagimang."
11 Noluk araːdo loːbagné kadung émna ngolu tatpaːsudung. Bulu agerém germang odokké ammem ikisiyadla duːdag. 12 Édémpin taniːkídíːdé ansíngoːpé buluk aíké agerém gersula buluk aíké tursunaném gerrensudopé ngolu Ruːtum Jisu Kiristok aminno bulum lulígémnaː lusangém ludung.
13 Ajonkídínga, ainé ager gerpénamdém méːpégméːlogyok. 14 Séːkoi séː doːjíksok ngoluk luyírém tadmaːyeji, édé taniːdém nolu kanggabla léːlang. Odokké bím anyisumonam légaːpé bím duːjondagjonsuyok. 15 Émgom bím mirukonémpé sabyok, émpigeːla bím bíro kísapé lupaːlang.
Lutér Agom
16 Suːpag asin-ansíːlok Ruːtumbí aídé nolum appíng ayírroːlaː appíng lambélo asin-ansíngém bikaːlangka. Noluk appíngké lédílo Ruːtumbí duːmínkaːlangka.
17 Séː asin-aséːsém ngo, Polbí, aíé aíké alakki adlígdung. Ngok doːjíg appíːlo ngokké émna kangkindopé ngo sémpéi addo.
18 Ngoluk Ruːtum Jisu Kiristoké aséngé noluk appíngké lédílo dungkaːlangka.