Ruːnémé Méːyumsudopé Du:nam-dagnam
4
Ajonkídínga, luttérso, Ruːnémé méːyumsudopé kapé duːpé-dakpé lagidang édém ngolu nolum luyírbikabo, odokké nolu édémí:pé duːla-dagla dung. Odokké édémyang aiyaːdopé nolu duːdo-dagdopé ngolu Ruːtum Jisuké aminno nolum lumolumola lulígdung. 2 Ruːtum Jisuké ilang-gílangki nolum oko oko luyírém ngolu luyírbitang édémbulum nolu kindag. 3 Ruːnébí nolum angunna duːdopéla laːmínsunamnokké moːtéːpé duːdopé méːdag. 4 Nolu appíngé kinpé lagidag kapé nolu angunnépélaː ménggésunamno noluk yamné lédílo duːpénammén, 5 Ruːnémé kinman uiːkumné taniːkídíːdémpé adin-amírrok laːbeg dobegoːdém ménggola dungkamdémpé ménggola duːyok. 6 Édémpila séː agersok tayéːlo séːkosin ibat-gíbadmaːdopé odokké bík bírodémsin yadmaːdopé. Ngolu kapé nolum lunobila lupaːbikaji Ruːtumbí édé paːpkídíːdok légaːpé taniːyém mokemoramruːyé. 7 Ruːnébí ngolum aisíːmaːnamnoːpé gogmang, émpigeːla angunna duːdopé goktag. 8 Odok-légaːpé, séːkobí séː luyírnamsém lupagdagji bí taniːyém lupagmang émpigeːla Ruːnémé lupagdag, séːkobí nolum bík Angunné Yalomé bidang.9 Akoné akoném ayaːnam tayéːlo nolukkoloːpé okkomsin adlíkpénamméi kamang. Nolu kapé akoné akoném ayaːpénamén nolum aíém Ruːnébí luyírbitag. 10 Odokké édé arro, nolu Mesodoniaːdok méngkésuné appíːdém ayaːla dung. Édémpila ajonkídínga, ngolu nolum kumdanna ludung, édémyang bojéyaːpé ilang. 11 Kapé ngolu nolum lubikaji édémpé, ansíngoːpé duːnamdém duːpérung émna malang, aíké agerém ménggabla gerrang odokké aíké alakki aíké agerém gersulang. 12 Édémpimílo Ruːnémé kinmaːné taniyé nolum ménggésuyé odokké nolu séːkaiké tayéːlo méːtinsumaːpé tursulaːyé.
Ruːtumké Gílatkunam
13 Ajonkídínga, sinonékídíːdok légaːpé nolum kinmomaːpé ngolu duːlíːmang, émmamílo akang kaman akon taniːkídíːdok kísapé nolusin méːdírra duːyé. 14 Jisubí sikang odokké sikodokké turkangku édém ngolu méngkésudag, édémpila séːkobulu bím méngkésula siye Ruːnébí bulum Jisuk lédílo turmoyéku émna ngolu méngkésudag.
15 Ruːtumké aíké lusunam agomki ngolu nolum lubidung, ngolu séːkobulu suːsin turradun, Ruːtumké gíladdoku longédoːpé turraduːnékídíːdé, ngolu sinékídíːdémyang gíponoːla gímaːyé. 16 Kapilaːné Ruːtumbí bottépé aídé jéːla lulígyé, abíngaryan tayéng-yaːmedok gomugdo odokké Ruːnék tuːtogdém mudlígnamno Ruːtumbí tayéːtokké togyiyéku. Odo Jisu Kiristomé méːtinsula sinékídíːdé turpoyaːyéku. 17 Odok lédupé, ngolu séːkobulu moːpíso turra duːpakkan, ngolumsin buluk lédílo lékkopé mukkang araːdoːpé doːmírto Ruːtummé ríksukolo gísaːboyéku. Odokké édémpé ngolu Ruːtumké lédílo loːdílongkípé duːmínyé. 18 Odok-légaːpé, séː agomkídíːsokki akoné akoném lusaːlíglang.