Ruːtumbí Gíladdokubo Lennola Duːto
5
Ajonkídínga, édílo édémbulumpé iyen édé ayírdoglaː longédok légangé nolukkoloːpé adlíkpénam ageréi kamang. 2 Kapilaːné Ruːtumké longédé dopsongé yummém dopsongkolo gínamémpé gíyéku édém nolu aiyopéi kinbínna kindag. 3 Édílo taniyé ludon, "Appíngé aila dung odokké atísinmaːyé," odo bagémpé bulukkolo sinamé aːyéǃ Ommang paːdído:ém bagémpé kapé akiyé kisaːdon, odokké odo bulu dukpítsumaːyé. 4 Émpigeːla ajonkídínga, nolu, kémolok duːné taniːmang, édémpila édé longédé aːdodém dopsongé aːdom méngkasunamémpé nolu méngkaksula duːpélagimang. 5 Kapilaːné nolu appíngéi píangkélaː longéké ommangé. Ngolu yumékélaː kémoké ommaːmang. 6 Édémpila, Ru:némé kinman taniːémpé ngolu yungaksula duːpélagimang, émpigeːla ngolu aíém-tejisula larra duːlai. 7 Kapilaːné yubné, yummém yubdo, odokké tíːné yummém tíngursuːdo. 8 Émpigeːla ngolu longéké ommaːpé inamé, ngolu aíé-tejisula duːlaːjé, méːjíksunamdémnaː ayaːdém angkéso kobosa kísapé gélíksulai, odokké akaːla duːnam moturbikunamdém tukkuso kublík kísapé gélai. 9 Kapéné Ruːnébí ngolum aglíːdém paːdopé tolígmang émpigeːla ngoluk Ruːtum Jisu Kiristokokki moturbikunamém paːdopépak balentag. 10 Bí ngoluk légaːpé sibikang, édémpila ngolu sidaggom turdaggom, ngolu bík lédílo turjonsula duːmínyéku. 11 Odok-légaːpé, símsíro nolu kapé iladuːji, édémíːpé aila duːdopé luyírkaːmínsula duːlang odokké mé:jíksunamno kínggídopé akoné akoném lusaːlíglang.Lutér Luyírnam
12 Ajonkídínga, ngolu nolum kumdanna ludung, séːkobulu noluk araːlo kínggípé ager gerdang, odokké séːkobulu Ruːtumkolo nolum igurbola dun, nolu bulum ménggésaggélang. 13 Buluk ager gernamdok légaːpé kínggípé ménggésula bulum ayaːlang. Nolu lékkopé ansíngoːpé duːjonsulang.
14 Ajonkídínga, ngolu nolum kumdanna ludung, loːbagném lupangém lulang, pésonékídíːdém lusaːlíglang, sipereném idumsulang, odokké appíngém oijosula duːlang. 15 Kaːlang, séːkosin aimaːnélok alígém aimaːnamno lígmaːdopé, émpigeːla appíng ayírro akoné akoném odokké appíng taniyém aíném ibipé émna méːlang.
16 Loːdísém méːpolang; 17 kumyarra duːlang; 18 appíng ayírro aipai bilang, kapéné édé Kiristo Jisukolo noluk légaːpé Ruːnék méːnamé.
19 Yalomé mitpagmoyok; 20 lungor-lunamém lupagyok. 21 Émpigeːla appíngém ankaːla kaːlang; okodé aidagji édém mégablang. 22 Aimaːné appíːdém mépaglang.
23 Asin-ansíngém biné Ruːnébí aíé nolum angunnmokaːlangka. Odokké noluk yalodé, iji-yalodé odokké adin-amírdé ngoluk Ruːtum Kiristo Jisuk gídoku longédoːpé lugéngé kamaːpé naréngoːla dungkaːlangka. 24 Séːkobí nolum goktuji, bí édém iyerung, kapilaːné bí aroruːnéko.
25 Ajonkídínga, ngoluk légaːpé kumbilang.
26 Takam bírrangém angunné dosugnamki asin-aséngém bilang.
27 Ngo nolum Ruːtumké aminno séː doːjíksém takam bírrangkídíːdok tatkolo podopé lulígdung.
28 Ngoluk Ruːtum Jisu Kiristoké aséngé nolukkolo dungkaːlangka.