3
Édílo ngolu oijosula dunggélaːtomaːbon, odo ngolu Etensdo atéroːpé duːpé émna méːsékto. 2 Édémpila ngolu Timotimé mélíkka, séːko ngoluk bírrolaː Kiristok tatpon lutaddém lugoːbila ngoluk lédílo Ruːtumké ager gerjonkon. Bí nolum méːtinsunamdo kínggíːdopé lusang agomém lubiyé, 3 odo séːkosin sémpin anka:lo éngunmaːyé. Kapila:né nolu kindag sémbulum ngoluk tuptaso ruːlíktag. 4 Édílo ngolu noluk lédílo dungngan, nolum ipusireyé émna ngolu nolum lumolumola lubika. Odokké édémarpé ikang, édém nolu aiyopéi kindag. 5 Odok légaːpé, édílo ngo dunggélaːtoman, noluk méːjíksula duːnamdém kinnam légaːpé ngo Timotimé mélíkka. Kapéné Uiːbí nolum kapéji ankaːlo oledmola ngoluk odokkíddíko méːbomsula gerrobnam agerdém asipé imopéké émna ngo pésokang.6 Suːpag Timotibí gíladdungku, odokké noluk aipé méːjíksula duːnam odokké ayangkaːmínsunamdok ainé lutaddém bombitakku. Nolu ngolum asinang-otíla ngolum kaːlíːlangkula dung émnamdém bí ngolum lubitakku, ngolusin nolum airuːpé kaːlíːlangkula dung. 7 Odok-légaːpé, ajonkídínga, noluk méːjíksula duːnamdém tatpaːsula, ngoluk appíng duːgloːla ipusirelo ngolu angpítala dung. 8 Ngolu aroruːpé turpopola dung, kapilaːné nolu Ruːtumkolo éngunmaːpé méngkésula duːtídung. 9 Suːpag ngolu ngoluk Ruːnémé noluk légaːpé aipai bilaːdag. Noluk légaːpé bík kéraːdo ngolukké méːpodung édémpila ngolu bím aipai bidung. 10 Nolum lékoda ngolu kaːríksula odokké noluk méːjíksunamdo okko píːramna duːji édém luyírbilaːdopé ngolu longgé yummém kumna dung.
11 Ngoluk Abu Ruːnébí aídé odokké ngoluk Ruːtum Jisubí ngolum nolukkodoːpé gílaːdopé lambém síglenbikaːlangka. 12 Ruːtumbí noluk ayangém bojémokaːlangka odokké akoné akonémna appíngém kínggípé ayangkaːlangka, ngoluk ayangé noluk légaːpé kapé kínggídagji édémíːpé kínggíngkaːlangka. 13 Ruːnébí noluk asiném kínggímokaːlangka, édílo ngoluk Ruːtum Jisubí bík takam angunné taniːkídíːdok lédílo gíyékuji odo ngoluk Abukélang Ruːnék kanggaːlo nolu lugéng kamaːné angunné taniːpé ilaːdopé.