Tisolonikaːdo Polké Ager-Gernam
2
Ajonkídínga, nolukkodoːpé ngoluk gínamdé airu:pé arré kakang édém nolu kindag. 2 Ngolu nolukkodoːpé gímangoːdapé Pilippi nogordo ngolum igítsimadla kínggípé anyisumoto, édém nolu kindag. Odokké odo bojék lutumné kadagagom, ngoluk Ruːnébí ngolum asiném kínggímola pésoma:pé bík tatpon lutaddém nolum lubimoto.a 3 Nolum ngoluk luyírbinamkídíːdé méːmurrokkélaː aimaːpé méːnamnokké lennémangai, odokké ngolu nolum yatpé émnasin méːmangai. 4 Édémpimap, Ruːnébí ngolum loːdísém okkom ludopé méːdagan édém ngolu ludo, kapilaːné bí ngolum tatpon lutaddém tolíglaːnam arékané taniːkísapé saptag. Ngolu taniyém méːyumsumopé méngkímangngai émpigeːla Ruːnémé méːyumsumopé méːto, séːko ngoluk asiném ankaːdag. 5 Ngolu édíloːsin tiːné agomki nolum luyumangai, édém nolu kindag, odokké nolukkolok oːkaiko paːpé émna ngolu séumola duːmangai-édém lukanbikupénédé Ruːnébí.b 6 Ngolu tani:lok luyitsunamém, nolukkologmanggom séːkai akonkolok magomangngai. Kiristok mélígnam kísapé nolukkolok laginam appíngém ngolu koladaggai.c 7 Émpigeːla kapé anékoné bík ommangém mosíːdoji ngolu édémpé noluk lédílo ajjisula duːto. 8 Ngolu nolum airuːpé aipé-méːdag, édémpila ngolu nolum Ruːnék tatpon lutado:dém lubimangngai émpigeːla ngoluk turnamdémsin turjonsuka; kapilaːné nolu ngoluk airuːpé méːbomsunam tani:pé ikangngai. 9 Ajonkídínga, édílo ngolu Ruːnék tatpon lutaddém nolum lubikan; nolu ngoluk odok ngarasumaːpé longgém yummém ager gernamdém méːpaːlang; kapilaːné ngolu nolukkolok séːkomsin ngasodmogemang émna agerém gerka.10 Ngolu éddíko angunna, arolok-duːla lugéng kamaːpé noluk lédílok ngoluk duːmínamdém lukanbikunékídíːdé nolulang Ruːnébí aídé. 11 Nolu kindag, abukoné kapé bík ommangém kaːsíːdoji édémíːpé ngolu nolum appíngém ako akopé kaːsíngka.d 12 Ngolu nolum lusaːlíkka, nolum luyinsuka, odokké Ruːnéké méːlíksukamdémpé duːdodagdopé luyarbitíka, Ruːnébí nolum bík migomdokodoːpélaː bík unjíkkodoːpé gogla dung.e
13 Odokké ngolusin Ruːnémé aipai biyardo, kapilaːné édílo nolu Ruːnék gomugdém ngolukkolok tatton, odo nolu taniːlok gomugé émna toríksumaːpé, édé aroruːpé Ruːnék gomugé émna toríksuka. Odokké nolu séːkobulu méngkésudoji édé nolukkolo ager gerradung. 14 Ajonkídínga, nolukkolo kapikaːji édémíːpé séːkobulu Kiristo Jisuk taniːén, bulukkolo Judiaːdokf kumgokídíːdo ikang. Nolu lékoné ipusireyém noluk aíːtaniːkídíːdok paːto édémíːpé bulu Jiudikídíːdok pangka, 15 séːkobulu Ruːtum Jisumélaː lungor-lunékídíːdém moketo odokké ngolum ipusireto. Bulu Ruːnémé méːyingkosudung odokké bulu appíng taniːlok mirué 16 odokké bulu ngolum Jiudiman taniyém édé do:yíːdém lugoːbimaːdopé lutumkíka okodé bulum moturbinamém bidang. Édémpila bulu buluk paːbém paːpomsudung. Odokké léddarso su:pag Ruːnék dorné-aglíːdé buluk tayéːloːpé gíido.g
Polbí Lékoda Bulum Gíkaːla Kaːlíngkunam
17 Ajonkídínga, longko-lonyi légaːpé nolukkolokké gípansunam lédupé (ngoluk asiné édíloːsin gípansuma) ngolu nolukkodoːpé gílatkupé émna airuːpé ikíto kapilaːné ngolu nolum aipé kaːlíːla dung. 18 Ngolu nolukkodoːpé aipé gílíːla dung, ngo Polbí, lentí lentíla dung émpigeːla Uiːbí ngolum motumdag. 19 Émpigeːla édé noluǃ okko ngolum akaːla duːnamémnaː méːpom bidang, odokké ngoluk bottépé lusunam amandéːla dumlubdé okodém ngoluk Ruːtum Jisubí édílo gíladyékuji odo ngolu dakkansunayé.h 20 Aroruːpé nolu ngoluk luyitsunamdélaː méːpodé.