1 Tisolonia
Tisolonia Taniːkídíːdoːpé Polké Adgotpoːnam Doːjíg
1
Ngo Polbí, odokké Sailasbílanga Timotibí séː do:jíksém,Tisolonika kumgodok du:né méngkésunékídí:do:pé, séːkobulu Ruːné Abukélaː Ruːtum Jisu Kiristokén, bulukkolo:pé adlígdungː
Aséngéla: asin-ansíngé nolukkolo dungka:langka.
Tisolonika Taniːkídíːdok Méːjíksunam
2 Ngolu loːdísém noluk appíngké légaːpé Ruːnémé aipai bido, odokké loːdém noluk légaːpé kumbido. 3 Kapéné ngolu loːdísém ngoluk Ruːné odokké Abuké kanggaːlo nolum méːpaːdo kapé nolu noluk méːjíksunamdém agerro gerbomdun, odokké kapé noluk ayaːdé nolum odokkídík kínggíːpé agergemodun, odokké kapé noluk akaːla duːnamdé ngoluk Ruːtum Jisu Kiristokolo éngunma:pé dun. 4 Ngoluk méːbomsunam ajonkídíngab, Ruːnébí nolum ayaːdag odokké bí nolum balentag émna ngolu kindag. 5 Kapilaːné ngoluk tatpon lutaddé nolukkoloːpé agomoːpé ila gímangai, émpigeːla tornamé kala, Angunné Yalobí duːtéːla odokké oːríːpé kinnamno gíka. Noluk ainam légaːpé ngolu kapé noluk lédílo duːmínkan édém nolu kindag. 6 Airuːpé ngasod araːlo, nolu ngolumnaː Ruːtummé kaːyirsunépé ikang; nolu Angunné Yaloké binam méːpodo lutaddém toríksuka. 7 Édémpila nolu Mesodoniaːdoglaː Akayaːdok takam méngkésunékídíːdok ka:yisupénam taniːpé ikang. 8 Mesodoniaːdoːla Akayac moːtagoːdo nolukolokké taniyé Ruːtumké doːyiːdém kindung émnango:mang, émpigeːla Ruːnémé noluk méngkésunamdém appíːloi taniyé kinto. Édémpila odok tayéːdo ngolukké lusetpénamé okkosin kamang. 9 Ngolu nolukkoloːpé gídodo nolu kapé ngolum boríksukaji. Odokké nolu kapé uiːkumnamdém mépaggeːla turnélaː aro Ruːnékoloːpé gílattokuji édém édé tani appíːdéi lubitakku, 10 odokké Ruːnéké ao Jisuké tayéːtokké togyikunamdém toyaːla dung, séːkom Ruːnébí sikolokkém turmotokuji odokké séːko ngolum Ruːnékolokké aːpéné dorné aglídokké mopídbila dung.