3
Kiristoké lédílo nolum turmotakku, édémpila tayéng-amoːtok duːnékídíːdém asin bilang, okolo Ruːnéké lagbíkpé Kiristobí teddang. 2 Tayéːté okko duːji édémbulum méːladuːlang, moːpísok duːné attarém méːnggoːyobo. 3 Kapéné nolu sikangaːboi, odokké noluk turnamdém Ruːnékolo Kiristok lédílo kupsiladung. 4 Kiristobí noluk aropé turnamdé odokké édílo bí léngkansuyeji, odo nolusin bík unjígdok lédílo léngkansumínyé.Akuélang Anupé Turnamdé
5 Édémpila nolukkolok duːné moːpísok méːbonam appíngém mokepaktokː Langgonam, narémaːnam, laːlíng-gílíng, aimaːném méːbonam, agroiyaːnam, okodé moimang kumnamé. 6 Séːkobulu agom-tadmaːpé sémpin agerém gerdang buluk tayéːlo Ruːnéké aglíngé aːyé. 7 Odokké lékonkém nolu édémarpé idagai, édílo nolu édémpé iné taniːkídíːdok lédílo duːmíndungan.
8 Émpigeːla suːpag nolu séː appíːsém mépakpénaméː Aglínam, tayumnam, aimaːpé ipé méːnam, ammem lukaːnam, odokké aimap lunam. 9 Akoné akoném arrom lulang, kapilaːné nolu akuné tani:dok lédílo odok ibomnamkídíːdém pítpaksutag 10 odokké anu taniːko pídlíksutag. Nolu noluk Ruːnékémpé gésugésula gíbomdung, odokké nolu bím kinyangoːyaːyé. 11 Nolu Girik taniːgom Jiudi taniːgom, gatpugnamgom gatpugmaːnamgom, nolu yumrang-taniːgom magraːminégom, nolu pagbodaggom pagbomanggom, édé oko agomésin kamang. Émpigeːla Kiristobí appíːdé odokké bí ngoluk appíngkolo dung.
12 Nolu Ru:néké taniːyé; bí nolum aipé-méːla bí nolum bík aíképé balentag. Édémpila ajjisulang, asiné-ailang, kéíksulang, ansílang odokké oijosulang. 13 Akoné akoném oijola, akoné akonké imurém méːyinsubilang, kapé Ruːtumbí nolum méːyinsubitang. 14 Appíngkémyang lagipagyaːnamdé ayaːdé. Ayaːdépag appíngém rakpumsula léːdag. 15 Nolu appíngé Kiristoké adin-amírdo légílaggíé, odokké lékola asin-ansíːla duːjonsudopé nolum balentag. Édémpila Kiristokolokké gíné asin-ansíːdé nolum gíyírbokaːlangka. Odokké loːdísém aipai bilang. 16 Kiristoké doːyíngé noluk asinno píːsíla dungkaːlangka, akoné akoném appíng méːjoːnamno luyír-méːyírrang. Aipai binamki Ruːnékoloːpé niːtomém, kumnam-niːtomém odokké yalolok niːtomém goglang. 17 Odokké nolu okkoméi lugom okkoméi igom, Ruːtum Jisuké aminno ipélagidag, odokké bíkkoki Ruːné Abumé aipai bilang.
Kiristan Okum-érang Légaːpé Gerrod Ékké
18 Yamnékídínga noluk aíké milbongkídíːdo ajjisulang, kapilaːné Ruːtummé kinné taniːkísapé nolu édém ipénammé.
19 Milbongkídínga noluk yamnékídíːdém ayaːlang odokké buluk lédílo torpé agom luyok.
20 Ommangkídínga, noluk ané-abbom appíːloi ménggésulang, kapilaːné édé Ruːtummé méːyumsumodag.
21 Ané-abukídínga nolu noluk ommangém aglíːmoyok, émmamílo bulu méːdírpagyé.
22 Pagbokídínga loːdísém nolu noluk moːpísok ruːtumkídíːdok agomém tadlang. Bulu kaːdodo méːyumsumomaːpé appíng ayírro bulum méːyumsumolang. Ruːtummé ménggésula noluk appíng asinki noluk ruːtumkídíːdok agerém gerbilang. 23 Taniːlog agerém gerbidung émna méːmaːpé Ruːtumké agerém gerdung émna méːla, nolu okkoméi gergom asin-bidanna gerrang. 24 Ruːtumbí bík taniːkídíːdok légaːpé okkom léːbitang édé amandém bí nolum biyé édém nolu méːpa:lang. Kapéné Kiristobí aro aro Ruːtumdé sék agerém nolu gertag. 25 Odokké Kiristobí séːkomsin kéyamang, bí aimaːné agergernékídíːdém buluk paːpéruːnam mokemoramém biyé.