2
Éddíko ngo noluk légaːpélang Laodesiadok Ruːnék taniːkídíːdok légaːpé odokké séːkobulu ngom lékosin ríksukímang buluk légaːpé ngalatsula agerém gerbiduːji édém ngo nolum kinmolíːdung. 2 Ngo sidém bulum lusaːlígnam légaːpé ido. Odo buluk asinkídíːdé ayaːlo lékoyé, appíng kinnamno bulu méːpílangémaːdopé ayangém paːyé. Odokké bulu Ruːnéké kinpíːmomaːnamdém kinyé, Kiristobí aídé édé kinpíːmaːnamdé. 3 Bíkkolo méːjoːlogla kinnam appíːdok kumsuːdé kupsila dung.4 Nolum séːkosin luyumnam agomki yadma:dopé ngo séː agomsém nolum lubidung. 5 Ngo noluk lédílo adin-amírro duːmínmanggom, ngo noluk lédílo yalolo duːmíndung. Nolu kapé duːpénammén édémpé duːnamé odokké Kiristokolo noluk méːjíksunamdé kínggínammé ngo méːpodag.
Aro Turnamém Kiristobí Bombidag
6 Nolu Kiristomé noluk Ruːtumpé toríksutag, bík lédulo gímíntílang.
7 Kiristokolo léppíré parbudla duːlang, bíkkolo noluk turnamdém dagrasulang. Kapé nolum luyírtang noluk méːjígdo kínggílang. Aipai binamno biːpogdopé duːlang.
8 Kaːsulang, séːkosin nolum arékaman agomki yatpé lagimang. Édé agomkídíːdém méːjoːnémpé ilaːdo, émpigeːla édébulu taniːlok luyíroːngé. Édébulu séː moːpísok migom yalololokké lenné Kiristokolokké lennémang. 9 Kapéné Ruːnébí Kiristokolo adin-amírpé píːsídandopé dung. 10 Odokké nolum Kiristokolo píːsídandopé bitag, séːkobí appíng tornamnogla ilang-gílaːlog tayéːyaːpé duːnédé.
11 Kappar gatpugnamdé adin-amírrokkém asígém laːpagdagji, noluk adin-amírdok méːbokaːbonamém Kiristobí laːpaːgbitag. 12 Odokké édílo nolum baptisém bikan, nolum Kiristoké lédílo yuté:to. Odokké nolum turmotoku kapilaːné Ruːnéké tornamdém nolu méːjíksudagai, séːko Kiristomé sikolokké turmotakku. 13 Édílo nolu noluk paːbloːlang noluk gatpugmaːnam paːpkan séulo siladungngan, Kiristoké lédílo Ruːnébí nolum turmotakku. Bí ngoluk appíng paːbém méːyinsubitag. 14 Musiːké Luroːdém tadmaːnam légaːpé ngoluk kekonpé adgabnam ajé:dém bí katpagbitag. Bí édémbulum langérbigeːla kurusdo édébulum pídlíkto. 15 Édémpé Kiristobí aíém yalolok migomkídíːdokkémna ilang-gílaːnékídíːdokkém lakpaksuto. Kurus tayéːdo bí bulum motabnamki bí bulum amikanggaːpé anyisumoto.
16 Édémpila noluk donam tíːnamno manggom, noluk gíːdí:lomanggom, kartangloːmanggom Yoddo-longé tayéːlo séːkosin nolum lupakpé lagimang. 17 Sémpinkídíːdé aːpéné longékídíːdok yallopag. Émpigeːla Kiristobíːmín arodén. 18 Séːkobulu aromaːpésin ajjiːsumodang odokké tayéng-yaːmeyém kumdang bulum sappakkosuyok. Bulu kanggorém kaːtag émna pugdasudag. Émpigeːla édé appíːdé arékamangoːné, kapilaːné buluk asinkídíːdé aíongké légaːpé méːsudag. 19 Bulu Kiristoké lédílo duːyarmínnémaːbo, Kiristobí adin-amír appíːdok tukkudé. Kiristobí adin-amírdoːpé tornamém bidag, bí odok gangotikídíːdém odokké asíg-adinkídíːdém lékkopé bugabla duːdag, odokké édé Ruːnéké tornamno kínggíbomdag.
Kiristoké Lédílo Anu Turnamko
20 Nolu Kiristok lédílo simíntagbo odokké moːpísok migom yalokídíːdé nolum kapisinnamaːbo. Émpém kapila nolu séː moːpísok taniːkísapé duːdang? Kapila nolu sémpiné ilotkídíːdém idon, 21 "Édém gagégakkuryok, ankaːyok, odokké ukkíyok?" 22 Léko séː appíːsémbulum agerro lígnam lédupé bulu lékoda agerro angkumang. Kapilaːné édébulu taniːlokké lenné iyírélang luyírnammé. 23 Édémpin iyírnamkídíːdém méːjoːnammé kadopé kaːdag, kapilaːné bulum kínggípé kumnamém lagidag, yelam légaːpé aíém topaksunam, odokké adin-amírrok laginam appíngém méːpagmodag. Émpigeːla asin méːbokaːbom bulu mentumsulamang.