Kolosia
Kolosia Taniːkídíːdoːpé Polké Adnam Doːjíg
1
Séː doːjíksé Polkolokké séːkom Ru:néké méːngkampé Kiristo Jisuké mélígnamkopé idopé balentang, odokké ngoluk bíro Timotikolokké.2 Kolosiːdok duːné Ruːnéké taniːkídíːdoːpélang séːkobulu Kiristokolo arola duːji bulukkoloːpé adlígdung.
Ngoluk Abu Ruːnébí aséngémna asin-ansíngém nolum bikaːlangka.
Aipai Binamnok Kumnam
3 Édílo ngolu noluk légaːpé kumdoji, ngoluk Ruːtum Jisu Kiristoké Abu Ruːnémé ngolu loːdísém aipai bido. 4 Kiristo Jisukolo noluk méːtinsunamdémna Ruːnék tani appíngém noluk aipé-méːnamdém ngolu tatpaːsudung. 5 Kapilaːné nolu okkom akaːla duːji édém kangkano:pé tayéng-amoːté léːbitag. Nolu édílo tatpon lutaddok aroné doːyidém méngkésukaji odo séː akaːla duːnamsém tadgotpoːtag. 6 Tatpon lutaddé kapé noluk araːdo píngangkaji, édémíːpé aséngém bomyarbila édé moːpísok appíːloi pínggo:dung; édémpé édém noluk taddo longédokké tatpon lutaddé noluk aíké araːdo apayém eːyarradung. 7 Ruːnék aséngém nolu ngoluk ajon Epapraskolok tadyírsutag. Bí ngoluk lédílo Kiristoké agergerjonko odokké noluk légaːpé aroné agergerbipénéko. 8 Ruːnék Yaloké nolum binam ayaːdém bí ngolum lubitakku.
9 Édémpila nolum tatpaːsudo longédokké, Ruːnébí nolum okkom itoka émna méːdagji édém léngkanbidopélang Yaloké binam appíng méːjoːngéla kinnamé nolukké kakalangka émna ngolu noluk légaːpé kumngasumaːpé kumbiladung. 10 Odo okko Ruːtummé ménggésumodagji édémpé nolu duːyédagyé odokké nolu ainé agerém gerra loːdísém bím méːyumsumoyé. Odo nolu Ruːnémé kinyakinyaːla gíyé. 11 Ruːnéké unjígné tornamdé nolum oijosula duːlaːmoyé odokké appíngém dagrasulaːdopé kínggímoyé. Nolu méːpolo píːsíngkaːlangka, 12 Ruːné Abumé loːdém aipai bikaːlangka. séːko ngolum píaːné migomdokodok bík taniːkídíːdém pesubinam panggodém paːmínmodun. 13 Ruːnébí ngolum kémoké tornamdokkém mopídbigeːla bík méːbomsunam Aoːké migomdokodoːpé gíaːbotag, 14 séːko ngoluk paːbém méːyinsubigeːla ngolum répídbitag.
Kiristobí Appíngkémyang Tayéyaːdag
15 Kiristobí Ruːnémé gésusurudag, séːkom kaːbegmang. Bí obopoːlum Aoːdé, ruːnam appíngém bí tayéyaːdag. 16 Kapéné Ruːnébí bíkkoki tayéːtok appíngémna moːpísok appíngém ruːtag, kaːbegnamémna kaːbegmaːnam appíngém, yalolok appíng tornamém, appíng migomém odokké appíng ilang-gílang kanném bí ruːtag. 17 Kiristobí appíngkémyang poːpélokkéboi dung, odokké bíkkolo appíngé lékopé bípumsuladung. 18 Kiristobí kumgodok tukkudé, okodé bík adin-amíré. Bí lengotpoːnédé odokké sinékídíːdok araːdok obopoːlumdé, édémpila bí appíngkologyam tayépagyaːdag. 19 Kapéné Ruːnéké appíng séudé bíkkolo píːsíːla duːnamdém méːyumsuto. 20 Odokké moːpísogla tayéːtok duːné appíngém bík aíkolo bíkkoki lékomokupé, kurusdok bidbinam iːdokki, bí asin-ansíːmoto.
21 Lékonkém nolu Ruːnékolokké moːtéːpé dungngai odokké noluk inam aiman agerkídíːdogla méːnamkídíːdok légaːpé nolu bík miruai. 22 Émpigeːla bík Aoːbí taniːpé badgeːla sibikang. Édémpila Ruːnébí nolukkolo lékokangku, odokké suːpag bí nolum bík kanggaːlo angunné taniːkísapé, lugéngkamaːnépélang imurkaman taniːkísapé dakkansumodung. 23 Édémpila nolu oːríːpé parbudla noluk méːjígdo dagrasula duːlang. Édílo nolu tatpon lutaddém tadla akaːla duːnamko paːtagan édé akaːla duːnamdém mépagyok. Moːpísok appíngém édém lugoːbitag, odokké ngo Polbí, aíé édé doːyiːdok pagbokopé ikang.
Kumgodok Légaːpé Polké Gerbinam Ager
24 Édílo ngo noluk légaːpé ngok adin-amírso duːgém dodon odo ngo méːpodag, kapéné Kiristobí bík amír, kumgodok légaːpé doyartíla duːnam duːgdém ngoːsin domíndung. 25 Odokké Ruːnékokki ngom kumgodok pagbopé imoto, séːko noluk ainam légaːpé séː agersém idopé ngom tolíktag. Séː agersé bík doːyíngoːdém lugoːbinamdé. 26 Kapéné dítag dítag poːpélokkébo séː doːyísém appíːlokké kupsila léːtaggai, émpigeːla suːpag Ruːnéké taniːyém sém lusarbidung. 27 Nolu Jiudiman taniːkídínga nolum bí méːpílaːmanam odokké unjígné kinpíːmaːnam doːyiːdém kindopé émna Ruːnébí sém ibitag. Odokké édé kinpíːmaːnamdé sidé Kiristobí nolukkolo dung, odokké bí Ruːnék unjígdé, noluk akaːla duːnamdé. 28 Ngolu Kiristok tayéːlo doːyingém lubido, odokké ngoluk appíng méːjoːnamki ngolu appíngém lupaːla luyírbido, odo Kiristokol gímínné appíngé puːpojarra méːjubné taniːpé iyé. 29 Édém ilednam légaːpé ngo bík binam kínggíné tornamdokki kínggípé agergerdo.