4
Ruːtumkídínga, nolu noluk pagbokídíːdém méːyaméːsaːyok odokké buluk paːpénamém bilang. Tayéːté nolukkésin Ruːtumko dung émnamdém méːpaːlang.Kumdopé Lusaːlígnam
2 Kumnamém kumngasuyok, odokké édílo nolu kumdoji odo larra aipai bilang. 3 Odokké ngoluk légaːpésin kumbilang, odo Ruːnébí bík doːyíngém appíngém kígobila:dopé ngolum lambéko biyé, odo ngoluk kinpíːmaːnam Kiristok doːyídém lugoːbilaːyé, édém lugoːbinam légaːpéi ngo makanaːso dung. 4 Amme naréngoːpé tatkinnaːdopé ngo doːyíːsém kígobilaːdopé kumbilang.
5 Édílo nolu méngkésumaːnékídíːdok lédílo duːjonsudoji, bulum doːyídém kíbinan lambéko malang. 6 Noluk luposunamdé tadyumsunampélang tadlíksunampé ikaːlangka, odo kapé kabodopé appíngém lulatsubilaːyen édém nolu kinye.
Bitérnam Asin-aséng
7 Ngoluk méːbomsunam ajon Taikikasbí, séːko aroné pagbokolang Ruːtumké agerro gerjonko, bí nolum ngok légaːpé appíngém kíkanbiye. 8 Odok légaːpéi ngo bím nolukkoloːpé mélígdung, odo nolu kinyé kapé ngolu iladuːji odokké bí noluk asiném kínggídopé lusa:lígbiyé. 9 Odokké méːbomsunam aroné ajon Onesimasbí, séːko noluk aí taniːko, bí bík lédílo gíjonsuyé. So okko kapiduːji édé appíːdém bínyi nolum lubiyé.
10 Aristarkasbí séːko ngok lédílo makanaːso duːji, bí nolukkoloːpé asin-aséngém séglígdung, odokké Margbí, séːko Barnabaské bíroko, bíːsin asin-aséngém séglíktéːdung. Margbí gímílo bím boríksulangka émna nolum lubbéitagbo. 11 Jisu, séːkom Jastas émna gogdoji, bíːsin asin-aséngém séglígdung. Ruːnéké migomdokodok légaːpé ngok lédílok agergernékídíːdok araːdo bullong Jiudi taniyé. Odokké bulu ngom bojéruːngko kaːdumsutag.
12 Noluk aí tani Epaprasbí, séːko Kiristo Jisuké pagbokon, bí nolukkoloːpé asin-aséngém séglígdung. Nolu méːjubnépélang kinbínna kinna Ruːnék méːnam appíːdém ibomné méngkésunépé idopé Ruːnébí nolum dagrasula duːmodopé bí noluk légaːpé loːdém kínggípé kumbidag. 13 Bí noluk légaːpélang Laodekiya odokké Ierapolidok duːné taniːkídíːdok légaːpé airuːpé ngalatsula agerém gerbitag ngo aísé aropé lukanbilaːdag. 14 Ngoluk méːbomsunam kinamkaːné Lugbí odokké Dimasbí buluk asin-aséngém nolukkoloːpé séglígdung.
15 Ngoluk asin-aséngém Laodosiadok bírrangkídíːdém bilang, anguruːpé Numpaːmé odokké bík okumdok gíkumsuné méngkésunékídíːdém. 16 Séː doːjíksém noluk araːdo ponam lédupé, Laodosia kumgokídíːdoːsin pomolang. Odokké Laodosiadoːpé mélígnam ngok doːjígdémsin nolu polang. 17 Ruːtumbí Arkippamé agerko bitag édém bí gerreddopé bím méːpaːmolang.
18 NGO POLBÍ AÍÉ SÉː ASIN-ASÉːSÉM NGOK AÍKÉ ALAKKI ADLÍGDUNG. Ngok makanaːsok duːnamdém mitpanyokǃ
Ruːnéké aséngé noluk lédílo dungkaːlangka.