Carano mo'oliwi petila mparasaea
5
1 Osie awaihira miano da motu-motu'a ka'iaa co'o, sawali oliwihira kana miano motu'au. Da mongura oliwihira kana petila'u, 2 raro ntina motu'a kai kana tinau, ronga ko'ira ana ntina oliwihira kai molino kana po'oliwiu tuaiu.Dadaano montulumi ntina walu
3 Pa'angga'ira ronga peehawa'ira ntina walu da to'u-to'u mpoo'ia mpanta. 4 Sawali ki daa ntina walu da ko'ana atawa kombue, ko'ira anano atawa mbueno da paraluu pinotisu kando peehawa'ira ihi laicando kana pantasiano miano mparasaea, ronga mowolohi pelaroando miano motu'ando ronga mbuedo. Kana'umpe koiemo da po'eheno Apu Alla. 5 Ntina walu da santo'u-to'u yahoo da sai hinamo da piaraa, te'iaamo momperahi-rahi hai Apu Alla, malo ronga meanta amala ngkaida'a mo'ita pontulumi. 6 Sawali ntina walu da po'eheno sana-sanaa, santo'u-to'uno mateemo, te'iaamo nadaapo tora wotoluno. 7 Po'awaakondo die pompotisu, kando mentora sai pinosala'i. 8 Sawali ki daa miano da sai mompeehawa petilano, lalo'eahopo kicua ihi laro laicano, koie miano mehapuiho da pinarasaeano ronga mosa-mosa'oopo ka'iaa miano da sai parasaea.
9 Ntina walu danta teburi kai po'awa pontulumi mebinta hai jema'aa te'iaasi da sai da'amo kura nomo pulu ta'u umuruno, da ponohasi ari mesinca, 10 da tino'ori hi poweweu da moico, kanano: motisu'ira anano moi-moico dungku owose, mompetoka miano da tealo hai laicano, molayani miano mparasaea, montulumi miano masusa, ronga konianto'u mohedo pera pohedoa da moico.
11 Ntina walu da mongurapo, osie moburi kai po'awa pontulumi mebinta hai jema'a. Kana'umpe ki leuho kea-keando, nando da'amo nta konianto'u nunu'o Kristus, sawali dahirapo nta mesinca penda. 12 Kando hinukuma nasando da'amo mponunu da ari pedandido. 13 Lalo'eahomo penda, nando ehe mohedo, nante'iaamo nta niweweundo melolaica. Ronga da mosa-mosa'opo penda, yahoo mepopotisu mososa'o neeno suere miano, mosampuru urusano miano, ronga moweweu ino'awa da sai pantasi nigau. 14 Nangkuamo kaku mokea kando mpesincapo ko'ira ntina walu mongura, kando mengko'ana ronga pasipolee ihi laicando, kai osie suere miano da sa'iaa cita sosa'oo neento. 15 Kana'umpe dahiramo opia ntina walu da mpebia monunu ponggawano bilisi. 16 Sawali ki daa miano Ngkarasitee da walumo petilano, paraluu'o tulumio, kai osie bebeatio jema'a. Kicanamo koie, dahomo jema'a nta to'ori montulumi ntina walu da sai hinamo petilano.
Dadaano kamotu'ano jema'a
17 Kamotu'ano jema'a da to'ori mo'atoro moi-moico pantasio kai niwolohi mpendua oli ngkokaundo, kontu'uma ko'ira da mokua mompotisu ronga moleleako haratia. 18 Kana'umpe dahoo teburi hai Boku Haratiano Apu Alla, « Sapi da mo'ii pae gandum, osie kaloo ngangano. »b Kanamo, « Miano da mohedo, pantasiano kai nigadi. »c 19 Osie mompaduli ki daa kamotu'ano jema'a da pinomperahi-rahiako hi tesala, tabeano ki daa saksii te'orua atawa kolalo. 20 Miano da moweweu dosa, oliwio hai ra'indo jema'a kando memomeesi suere miano. 21 Hai ra'ino Apu Alla ronga Yesus Kristus ronga mala'ekati nteruruki kupo'ita kau nunu to'uo die petenaku; osie meruruki miano ronga mo'ala-ala. 22 Osie tekara-karai mobarakati miano kai tewali kamotu'ano jema'a, kau osie itai moweweu dosa merongaa. Dagai'o wotoluu kai osie tekebaako.
23 Osie mondo'u e'e mpena, sawali sampuruakono'o te'ete angguru, kana'umpe nai moroso tiau ronga hiuna nte morungku.