Pompokompehawa dadaano kaguru-guru
4
1 Sawali Sangkoleono Apu moo'awa to'u, dahoo nta kadadia wotu danta leu, hi daa asa ntilara miano danta tebali bubungkuiho parasaeando hai Apu Yesus, kando nunu'o pompotisuno i bilisi da mompokompore. 2 Da moleleako koie pompotisu pompokompore yahoo kaguru-guru mompe'anu-anuto'u. Nando to'oriomo maina da tekona ronga maina da tesala. 3 Potisu'ira miano kando osie mpesinca, ronga tabe'ira mongkaa kinaa da pinoko'upalindo. Sawali patuduno Apu Alla kai pompokoda'a koie kinaa yahoo: kando pontarimakasi miano da parasaeaho ronga paha'o pompotisuno da menona kando mpongkaa. 4 Luwu da ari pinokodadino Apu Alla moicoo, ronga nahina da upali kito arimo tarimaakono'o amala mpontarimakasi hai Apu Alla. 5 Kana'umpe da pokomewota'o koie kinaa yahoo, haratiano Apu Alla ronga amala.Atano i Yesus da mohedo moico
6 Kiu oliwihira raro mpetila da mpe'asa imani kana koie, dakomo nta tewali atano Yesus Kristus da mohedo moico. Ronga pelaroau dahomo nta e'elengua morosoako haratiano Apu Alla dahanto memparasaea ronga morosoako pompotisu moico da ninunu'u dungku diekana. 7 Osie mompodedea tulura ngkule da sai po'eheno Apu. Kahioomo kau pelati me'agama. 8 Melati olaraga te'ete'o pekonaano, sawali melati me'agama dahoo kinonano hai luwu da niweweunto; kana'umpe dahoo tadono toraanto diekana-kana ronga hai aahera. 9 Koie gau menonaa ronga pantasio kato nunu'o. 10 Nangkuamo koie, topekora mohedo, kana'umpe tona momperahi-rahi hai Apu Alla da tora, yahoo da pokosalama'o luwu miano, kontu'uma pera da parasaea.
11 Leleako ronga potisu'akondo'o koie luwu. 12 Osie ehe ki daa te'asa miano da paruruko tendenomo hiu mongurapo. Sawali kahioomo kau tewali pe'ontoano pera miano mparasaea hai laro mpogau'au ronga bangu-bangu'u, pololarou, parasaeau, ronga pelaroau da molino. 13 Metampu'u diekana dungku kaku awako, kahioomo kau mokua basaakondo'o Boku Haratia ko'ira miano ronga oliwihira naamo motisu'ira. 14 Osie poturusio sai koguna koie kuasa da ari tinarimau mebinta hai Sangkoleono Apu tempondo ko'ira kamotu'ano jema'a dampasako pelendo barakatico ronga koharatia mokodungku'akoko'o petenano Apu Alla nta dadaau. 15 Kahioomo kai to'u-to'uu mokua hedoo ko'ira luwu kando ontoo pera miano hiu tetianimo nunu'o po'eheno Apu Alla. 16 Dagai'o wotoluu ronga pompotisu'u. Kahioomo kau konianto'u weweuho ko'ira luwu, kana'umpe kicana koie dahomo nta salama wotoluu ronga miano da mompodedea pompotisu'u.