Sipado miano danta tewali powawaino jema'a
3
1 Menonaa die gau: Miano da mokea tewali powawaino jema'a mokeahako pohedoa da owose anggano. 2 Miano danta tewali powawaino jema'a yahoo, miano da sai hina pekebaakoano, samotu'ano te'iaasi me'asa, mokotaha'o pelaroano, mepekiri ari, ko'atora, ehe mompetoka, ronga to'ori mompotisu miano. 3 Na'iaa miano molangu atawa da bata lima, deenapo moluu larono ronga nai teposala. Nai pemata doi. 4 To'ori atoro'o bolo laicano, to'ori motisu'o anano kai turu ronga ko'ampadea. 5 Kana'umpe ki sai to'ori koie miano atoro'o bolo laicano, kana'umpemo kai daa nta to'ori pasipolee jema'ano Apu Alla? 6 Powawaino jema'a osie miano da toniapo parasaea, kai osie mentaba kai hukumaa Apu Alla kana hi ari hukumaa ponggawano bilisi. 7 Koie miano paraluu'o kai moico neeno hai miano me'alu, kana'umpe ki sai kana koie, dahoo nta tewali pompoko'anu-anuando miano, dungku kai te'oho'ako bengkarono bilisi.Sipado miano mpinokotena-tena
8 Kanapo koie miano mpinokotena-tenano powawaino jema'a kahioomo kaicua da te'angga, nai kosampa elono, na'iaa miano molangu, na'iaa miano da lodokoako doi. 9 Sawali yahoo miano da po'oruiho pelaroano kasai tekebaako, kando ungkaari to'uo da pinarasaeando da ari pinalengano Apu Alla. 10 Ko'ira miano nta inudi'irapo, ki sai hinasi peposala'iando hai ira jema'a, yahopo kando pinotoro. 11 Kanapo na'anda ko'ira samotu'ando, kahioomo kando te'angga, osie to'ori mowawa gau mpososa'o, mokotaha'o pelaroano ronga pinarasaea hai luwu pasipole. 12 Ko'ira tama kahioomo kai te'iaasi me'asa samotu'ando, ronga to'ori atoro'o anado ronga miano da hai laicando kai moico. 13 Ko'ira miano da mpohedo moico hai tongano jema'a dahira nta pina'angga, ronga tetiani moseka leleako hindo daa parasaeaho Yesus Kristus.
Jema'ano Apu Alla pu'uno pompotisu da menona
14 Da patudungku nai da'amo lembahi kaku dungku awako. Sawali mau kicana koie, moicoosi kaku poburiakoko die sura, 15 kau to'orio, ki saku oru dungku, dadaano toraahanto hai bolo rahano Apu Alla, yahoo jema'ano Apu Alla da tora. Koiemo jema'a da tewali pu'uno ronga tisarahino pompotisu da menona. 16 Santo'u-to'uahano, taperano owose pompotisu da ari pinalengano Apu Alla hai agamanto:
Ari mepo'ontoako wotoluno hicua to manusia,
ari pinokomenonano Sangkoleono Alata'ala,
ari inontondo mala'ekati,
kai nileleako hai perano suku,
pinarasaea hai wawono wita'ea,
ronga moleka hai suruga dahano pinoko'owose.