Dadaano sambaheando jema'a
2
1 Nangkuamo ku'oliwicomiu, lamoro me'asa kami amalaakondo luwu miano, yahoo mpo'itaakondo, mpe'e'etaakondo, ronga montarimakasiakondo hai Apu Alla. 2 Amalaakondo da mpomokole, luwu da mpomparenta, kato to'ori tora montundu dadaanto ronga mentepokona, ko'agama, ronga ko'ampadea. 3 Koiemo da moiconoo ronga po'eheno Apu Alla Gurusalamato. 4 Kana'umpe da po'eheno yahoo, kai salama luwuo to manusia, ronga awaa ponto'ori da menona. 5 Kana'umpe Apu Alla te'iaasi me'asa, ronga te'iaasi me'asa da tewali toleado Apu Alla ronga to manusia, koie miano yahoo, i Yesus Kristus. 6 Iaamo da ari soroo wotoluno tewali pohudano luwu to manusia mebinta hai dosando, kai mentoda patuduno Apu Alla konaa tempo da ari pinatantuno. 7 Nangkuamo koie, kai otuhio kaku tewali tinenano lako mo'awaakondo Lele Mohende ronga motisu'ira da sa'iaa miano Yahudi, kando parasaea ronga to'orio da menona. Da tinulurangku die menonaa, naku da'a mekulepi.Bangudo tama ronga tina hindo sambahea
8 Nangkuamo koie, mokeahaku ko'ira tama hai hapa dahando, kando woleako pelendo me'amalaako pelaroa da molinyaa, osie uka laro ronga teposala.
9 Kanapo na'anda ko'ira tina, kahioomo kando mpepakea kai ongkonaa ronga pantasi, osie mepopo'ontoako wuu da nibunga-bunga ntelia, osie mompake bunga-bunga wulaa atawa montia ngkorowe, atawa pakea da mohali olino. 10 Sawali moicoano ko'ira tina kando pepakea'ako bangu da moico, kana da pantasi hai tina da mokua sambahea. 11 Ko'ira tina kahioomo kando pepopotisu mengio ronga turu. 12 Naku ehee ko'ira tina kindo pompotisu ronga momparenta tama: moicoano kando pengio. 13 Kana'umpe da meri'ou niweweuno Apu Alla yahoo i Adam, merumbuinopo kai pokodadio i Hawa. 14 Ronga na'iaa i Adam da tegau-gau, sawali yahoo koie tina, dungku kai tuuna hai bolo dosa. 15 Sawali mau kicana koie, koie tina dahosi nta salama, tendenomo mompokohina, ki e'elenguasi parasaea, mololaro santo manusiano, molinyaa pelaroano, ronga hi pantasi bangu-banguno.