Surano i Paulus da meri'ou hai
Timotius
Salamu
1
1 Die sura mebinta hai aku i Paulus, tinenano Yesus Kristus, nunu'o parentano Apu Alla Gurusalamato, ronga Yesus Kristus pomperahi-rahianto, 2 nta dungku hai Timotius, kana ana mpine'ihincu hitona me'asa mparasaea. Kahioomo Apu Alla Tamanto ronga Yesus Kristus Apunto kando e'elengua meehawako, lolaroko, ronga mapuhiako'o barakati.Dagai'o pompotisu ntesala
3 Mokeahaku kau poo'iapo hai Efesus, kana ku'ari tenako tempongku nta lako hai Makedonia. Kana'umpe dahoo opi-opia miano hai Efesus da mompotisu'ako pompotisu sai tekona, kau tabe'ira. 4 Tabe'ira kando osie mompupura oleo mompodedea koie tulura ngkule ronga pu'uno pelee'a da sai hina upuano. Perumbuino te'iaasi nta moweweu pinegagahiako ronga halangicita kato nunu'o patuduno Apu Alla; te'iaasi hito parasaea, koiemo da tulumicita kato nunu'o patuduno. 5 Patudungku kutenako kau tabe'ira yahoo: kai molino pelaroando, kando to'orio maina da tekona ronga da tesala, ronga parasaea santo'u-to'u, yahopo kando mpekalola-lolaro. 6 Kana'umpe dahoo asa ntilara miano da bintaamo koie pompotisu da menona, te'iaamo mpogau da sai hina gunano. 7 Mokeahiramo mentewali guru da mompotisu'ako parentano i Musa, sawali mau ira, nando da'a paha'o hapa da tinulurando ronga da pinokodungkudo, da ponto'orindo menona to'uo.
8 Topaha'omo koie parentano i Musa moicoo, kito pompotisu'ako kai tekona. 9 Matantuomo koie parentano i Musa na'iaa nta mekona hai miano da tekona, sawali yahoo miano da mosalaki, miano mosa'o, miano da sai sambahea, miano ngkodosa, miano da sai hina agamano, miano da kokoleaho Apu Alla, miano mpompepate, miano da popatee tamano ronga tinano, 10 miano endeo, tama da endeo hai santamano, miano da morako miano kai nibalu tewali ata, miano mengkule, saksii ngkule, ronga pera niweweu da molimpaki pompotisu da tekona. 11 Koie pompotisu pepu'uano hai Lele Mohende da mebinta hai Apu Alla da pinoko'owose ronga da tereree; i'akumo da pinarasaeano leleako.
Paulus montarimakasi tendenomo pololarono Apu Alla
12 Kupontarimakasi hai Apunto Yesus Kristus da mokomorosoaku, hina angga'aku konianto'u kai pokompohedoaku die hai pohedoa. 13 Iponoha i'aku die miano mosoko da mompoko'anu-anu Apu ronga mompakasea miano mparasaea, sawali nalolaroaku, kana'umpe koie tempo naku da'apo parasaea ronga naku da'apo to'orio da niweweungku. 14 Sawali Apu e'elengua barakati to'uaku ronga moweehaku parasaea ronga motisu'aku mololaro suere miano. Kanamo die dadino hito pono-ponohaakono Yesus Kristus. 15 Diemo gau da menona kato parasaea to'uo: « Kai leu Yesus Kristus hai wita'ea, yahoo nta mokosalama'o miano ngkodosa. » Ronga i'akumo die miano ngkodosa da dompa mosa'o. 16 Sawali mau kicana koie, nalolaroaku Apu Alla, kai to'ori inonto sabarano Yesus Kristus da sai hina upuano hai aku da owose dosangku. Ronga nta pe'ontoanomo pera miano danta parasaeaho merumbui ronga mo'awa tora ngkaida'a. 17 Kahioomo Apu Alla kai pinoko'owose ronga nireree samengka-mengkauno. Iaamo da momokole salemba-lembahino, da tora ngkaida'a, da sai inonto, ronga sai hina pengkenano! Amin.
Tugasino i Timotius
18 Timotius anaku, die petenaku kanasi haratiano Apu Alla da ari pinokodungkuno nabii hai co'o iponoha. Koie haratia danta pekoraumo hai laro mpe'o'anuau da moico, kau e'elengua parasaea ronga mepelaroahako da molinyaa, kau to'orio maina da tekona ronga da tesala. 19 Dahoo miano, mau ndoto'oriomo maina da tekona ronga da tesala, nando da'a mompaduli, nangkuamo kai hancuru parasaeando kana bangka da morowa hai wawo mpasi. 20 Orua ko'ira miano yahoo, i Himeneus ronga i Aleksander, ariakumo soroakono'o ponggawano bilisi kando te'o'ari moko'anu-anuo Apu Alla.