6
1 Luwu miano mparasaea da tewali ata kahioomo kando angga'o ponggawando kana miano da pantasi nigiu, kai osie miano moko'anu-anuo neeno Apu Alla atawa pompotisuto. 2 Ata da me'apu hai miano mparasaea, nai tewali sai angga'o ponggawano, hindona mpada-padasi mpetila mpe'asa imani. Deenapo kando kola-kolalo layanihira ponggawando, kana'umpe pantasiano kai nilayani moico, nangkuasi ira pada miano mparasaea da nilolaro.Pompotisu ntesala ronga kawasaa
Luwuo die kahioomo kau potisu'akondo'o ronga oliwiakondo'o. 3 Ki daa miano da suere pompotisuno, kasai pengkena haratiano Apunto Yesus Kristus da menona, ronga pompotisuno agamanto, 4 koie miano mentaba'o, ronga nahina tino'orino! Rungkuno yahoo po'eheno megagahi ngkaida'a ronga teposala'ako gau, da mompokodadi singgira, tepobungku, gau pososa'o, momperahi-rahiako da mosa'o, 5 ronga nai ehe tepokona. Ko'ira miano te'iaasi da mosa'o da pinekirindo, ronga nahinamo da tekona ponto'orindo. Ponto'orindo koie agama penteteano kato kawasa.
6 Menonaa, sambahea me'aluo labano, kito penasaamo koa hapa da inawanto. 7 Kana'umpe nahina da niwawanto kato leu die hai wita'ea, kanamo kito daa nta meluarako nahinasi nta niwawanto penda. 8 Dadi, kito po'awa mongkaa ronga mompodai, koa'omo koie. 9 Sawali miano da mokea kawasa tegoda kai tuuna hai dosa, hina ntekoo'ako pinokeahakono da me'alu, pokomporee ronga mokomasilaka'o. Ko'ira da pinokeahakono, yahomo da mompokohancuru miano ronga tonduwakomo hai laro silaka. 10 Kana'umpe pu'uno luwu sa'o yahoo pinokeahakono miano molulu'i doi. Dahoo opi-opia miano da molulu'i doi, dungku kando bintaa da pinarasaeando ronga mepakasea mpanta'ako poe laro mobea.
Oliwi kompura-puraano
11 Sawali ico'o yahoo mianono Apu Alla. Osie mo'okudahi ko'ira da kana. Lulu'io da tekona, ronga tora sambahea, parasaea, mololaro, sabara morora'i karasai, ronga moluu larou. 12 Toramo meta'oako parasaea ronga alaa parasee, yahoo tora ngkaida'a. Nangkuamo koie, kai boboico Apu Alla tempou akui'o da pinarasaeau hai ra'indo miano me'alu. 13 Diekana, hai ra'ino Apu Alla da potoraa luwu, ronga hai ra'ino Yesus Kristus, da ari mangaku da menona hai ra'ino Pontius Pilatus, kupo'ita hai co'o: 14 Weweuhomo koie luwu parenta, kau osie tekebaako ronga pinosala'i dungku kai leu mpendua Apunto Yesus Kristus. 15 Nta leuhano da matantu, Apu Alla pantano da patantuo. Pantanosi da kuasa, da tereree, Apuno pera pe'apua ronga mokoleno pera mokole. 16 Iaamo da sai ninangino matea; daahano molinyaa to'u, yahomo kasai hina da moko'okudahio. Nai te'asa manusia da ari ontoo, atawa nta moko'ontoo. Iaamo da te'angga, ronga da kuasa samengka-mengkauno. Amin.
17 Oliwihira miano ngkawasa die hai wita'ea, kando osie mentaba, ronga momperahi-rahi hai hapa da sai matantu, kanano kawasaa, sawali yahoo hai Apu Alla pu'uno kawasaa, da moweekita luwu da pinelawento kato sanaa'ako. 18 Oliwihira kando mpoweweu da moico, kando kawasaako kamoicoa, mesawa mpelaroa, ronga ehe mompoweehi. 19 Kicana koie, dahiramo montampu'u mongkongko kawasaa mpompu'ui da moico oleo perumbui, dahandomo nta pelawee toraaha da santo'u-to'uahano.
20 O Timotius, piaraa pompotisu hi ari moweeko Apu Alla kau pinarasaea. Pokomentalaa gau da sai koguna, da sai moiconoo Apu Alla, ronga pinegagahiako da nineehako ponto'ori. 21 Kana'umpe dahoo miano da akui'o koie ponto'ori, dungku kando bintaa da pinarasaeando meri'ou.
Kahioomo kai perongakomiu pompeehawano Apu Alla.