I Yesus mompokontido miano Gerasa da nilawuino setani
(Mat. 8:28-34; Luk. 8:26-39)
5
1 Kando medungku asa poleno tahi hai wonuando miano Gerasa. 2 Yahopo koie i Yesus kai petiihako mebinta hai bangka, kai leu me'asa tama da nilawuino setani mebinta hai raro ngkoburu. 3 Poo'iahano koie miano hai raro ngkoburu watu ronga nahinamo te'asa miano da to'ori mokopungoo, mau kicua rante. 4 Kana'umpe manturu'omo nte nilangke ronga pinungoako rante, sawali namoko'otuosi, ronga langkeno pokolotu'o. Nahina miano da mokora dungku kai tule'i mokonturu'o. 5 Malo meanta sisimbu'omo hai raro ngkoburu ronga hai wawo ngkabumbu kai daa mekiali ronga mebebelaihako watu.6 Dahopo mentala koie i Yesus, koie miano molawu ontoomo, kai pekalulu lolawa'o ronga mesombaiho, 7 ronga mekora mehohou kanahi, « O Yesus, Anano Apu Alla da hai montoehano, hapa nta poweweuu i'aku? Kupe'e'eta meronga neeno Apu Alla, osie pakaseahaku! » 8 Kana'umpe hina arimo i Yesus mo'awaakono kanahi, « Co'o setani, bintanio koie miano! »
9 Kai petukanaiho koie miano kanahi, « Inaiho neeu? »
Polawanino, « Neengku Batalio, hicona meme'alu. »a 10 Kai pepelolaro, kai osie tinila hai suere wonua.
11 Nai da'a mentala mebinta na'ico dahoo asa lunu'ea wawi da mpehumbe hai wawo ngkabumbu. 12 Ko'ira setani mpekora mo'ita hai Yesus kanahi, « Tenakamimo kako mpewiso hai pe'ira wawi da asa lunu! » 13 Kai wukahio da pino'itando. Nilakodomo ko'ira setani mpeluarako kando raa mpewiso koie hai wawi lunu. Yahopo ko'ira wawi da rua rewu kando mpolai mperoroako hai laa meli, kando mpetaburako hai bolo ntahi kando memate molomo.
14 Mempolaihiramo nde'e ko'ira miano da mpodaga wawi, kando mpontuluraakondo miano hai kota ronga hai kampo da peka'okudahino hapa da kadadia, yahopo ko'ira miano kando peluarako ontoo ki hapa koie da kadadia. 15 Ko'ira miano leuhiramo awaa i Yesus, kando memomee hindo ontoo koie miano da ari nilawuino setani da me'alu hi daamo totoro, dahomo mebabu ronga moicoomo pelaroano. 16 Pontulurahiramo ko'ira miano da ari ontoakono'o matando hapa da ari kadadia hai miano da ari molawu ronga ko'ira wawi. 17 Yahopo ko'ira miano kando pokaraiho koie i Yesus kai oru meluarako bintanio wonuando.
18 Tempono koie i Yesus nta me'ulea hai bangka, koie miano da ari nilawuino setani po'ita to'uomo ki daasi tewali kai lako nunu'o. 19 Sawali koie i Yesus nai wukahio, te'iaasi hi kanahi, « Pohulemo hai laicau hai ira petila'u, ronga po'awaakondo pera da ari niweweuno Apu hai co'o ronga ki kana'umpe pololarono co'o. » 20 Lako'omo koie miano hai wonua da meneehako Hopulu Kotab ronga montuluraakondo miano hapa da ari poweweuno Yesus iaa, ronga ko'ira miano mentekangkahiramo luwundo.
I Yesus mokontidoo ana ntinano Yairus ronga tina da morungku'ako sara ntinano
(Mat. 9:18-26; Luk. 8:40-56)
21 Satepoleno mbule koie i Yesus hai asa poleno tahi, meleuhiramo miano me'alu lilicu'o hai wiwi ntahi. 22 Kai leu koie ponggawano laica sambahea'a da meneehako Yairus. Sa'ontoomo koie Yesus, nilakonomo medangkawako sudu hai pu'u ngkaruno, 23 ronga me'e'eta kanahi, « Anaku tina dahomo megala-gala. Ki tewali kami leu ronga hedoakuo kai tido, kai osiepo mate. » 24 Lako'omo koie i Yesus ronga i Yairus, me'alu to'uo miano da nunutako, ronga mpedidisipako lilicu'o.
25 Kokeena dahoo me'asa tina da hopulumo orua ta'u morungku'ako sara ntinano. 26 Moraruomo meroo, sawali tetianiomo marasaihako poweweundo dotoro, dungku pura luwu inawano meroohako, sawali nai paisa nta tido, deenapo salalo-lalo'eanomo. 27 Koie tina podeahomo leleno i Yesus, yahomo kai perumbui mesosoako hai olota miano kai hedoo babuno, 28 nangkua kanahino, « Podomo koma kuhedoopo babuno, dahakumo nta tido. » 29 Koiesi tempo kai te'o'ari rungku ntinano ronga nilakono menasaa hai wotoluno hi tidomo mebinta hai rungkuno.
30 Temponosi koie kai penasaa i Yesus hi daa meluarako kuasano, yahopo kai pebulili hai tongado miano me'alu kai petukana, « Naiho da hedoo babungku? »
31 Kanahi'iramo ko'ira ana guruno, « Dakomiusi ontoo hi me'alu to'u miano da leu mpedisi lilicukomiu, kami daapo metukana, ‹ Naiho da hedoaku? › »
32 Yahopo kai kolihe-lihe lilicu'o, kinaiho da hedoo babuno. 33 Sato'orio koie tina da kadadia hai wotoluno, kai pedangkawako sudu hai ra'ino i Yesus bibi'omo momee, ronga akui'o luwu niweweuno. 34 Yahopo kai koharatia koie i Yesus, « O anaku, parasaeau da mokontidoko. Pohulemo ronga momapu larou, tido to'ukomo. »
35 Dahopo koie i Yesus mogau, kando leu da tinena mebinta hai laicano Yairus ronga kanahi, « Nai da'amo anamiu, yo hapapo kami daa leu pokomasusa'o guru? »
36 Sawali koie i Yesus namodeaho da kanahindo, nangkuamo kai kanahi hai Yairus, « Osie momee, podo kau parasaea! » 37 Kai lako nde'e i Yesus, nai ehe ki daa te'asa miano da nunu'o te'iaasi Petrus, Yakobus, ronga Yahya petilano Yakobus. 38 Sadungkudo hai laicano Yairus, kai ontohira miano da mpogora, mpewowo, ronga mperurumate. 39 Sasumoono koie i Yesus hai laica kai koharatia, « Yo hapa kami daa mpogora ronga mpewowo? Diie anadalo nai da'a mate, sawali dahoo moturi. »
40 Sawali ndona mototaahio, nilakono nde'e i Yesus tena'ira kando mpeluarako luwu, yahopo kai wawahira tamano ronga tinano koie anadalo naamo da otolu ana guruno, kando sumoo hai suo dahano koie anadalo. 41 Yahopo kai ungkaario limano koie anadalo, kai kanahi, « Talita kum! » batuano: « O anadalo ntina, Kupo'awaakoko, pewangumo! » 42 Koie anadalo nilakono mewangu ronga lolako, kana'umpe umuruno hopulumo orua ta'u. Luwuo miano da ontoo koie da kadadia taperando mentekangka. 43 Sawali i Yesus nantabe'ira kando osie mpontulura, mau te'asa miano nai tewali to'orio diie da kadadia, yahopo kai tena'ira moweeho mongkaa koie anadalo.