I Yahya pompobaho
(Mk. 1:1-8; Luk. 3:1-18; Yah. 1:19-28)
3
1 Sa'arino koie kai leu i Yahya pompobaho hai lueno papawu wonua Yudea leleako haratiano Apu Alla kanahi, 2 « Mimandamo hai sinalakimiu, kana'umpe okudaamo pomparentaano Apuno suruga. »3 Santo'u-to'uahano, yahomo koie Yahya da kinanahiino nabii Yesaya: « Dahoo miano da mehohou hai tonga lueno papawu kanahi: ‹ Mimpasadia'o nta salano Apu; mimpokoteakono'o nta tealoano. › » a
4 Pakeano i Yahya yahoo wulu unta ronga sulepeno yo baulab naamo yo kinaano yahoo kotumba ronga siu inalahi. 5 Me'aluo miano da mebinta hai kota Yerusalem, wonua Yudea, ronga upu-upuo wonua da okudahio laa e'e Yordan meleuhiramo tepo'awaakono i Yahya, 6 kando me'akui'o dosa sinalakindo, yahopo nde'e kando nibaho hai laa e'e Yordan.
7 Sawali tempono koie i Yahya ontohira miano golonga Farisi ronga miano golonga Saduki da me'alu da meleu nta mepebaho, kai kanahi, « Comiu turunano ule molori! Naiho da mo'awaakomiu kanahi, dakomiusi nta tepolai mebinta hai sa'o larono Apu Alla danta leu? 8 Mimpebangu'akomo sipa da moico, peto'ono himi manda to'umo. 9 Mi'osie mepekiri hai laromiu hicua i Ibrahim mbuemiu, nami da'amo nta inukalaroi. Kupo'awaakokomiu: Apu Alla tule'io mokodadio di'ira watu tewali leeno Ibrahim! 10 Hukumano Apu Alla kana pali da sadiamo nta pompodo keu. Pera keu da sai kowua moico dahoo nta pinodo, kai nihawiako hai bolo api.
11 Kubaho'akokomiu'o yo e'e, yahoo peto'ono himi memandamo da ari sinalakimiu, sawali dahoo danta leu merumbui, da kolalo kuasa ka'iaa i'aku, ronga die i'aku naku da'a pantasi huda'akono'o sandalano. Iaamo danta baho'akokomiu'o Sangkoleono Alata'ala ronga api. 12 Yo duku dahomo hai limano nta pontopihino inii kai mowua, yahopo kai wiso'o hai bolo ngkampiri. Sawali apaino nta tinunuomo hai api da sai pinokopepate. »
I Yahya baho'o i Yesus
(Mk. 1:9-11; Luk. 3:21-22; Yah. 1:32-34)
13 Koie tempo i Yesus mebinta hai Galilea leu hai laa e'e Yordan nta mepebaho hai Yahya. 14 Sawali i Yahya nai ehe ronga kanahi, « I'akupo da paraluu kami baho'aku, hapa kaicua Comiu da leu hai aku mepebaho? »
15 Kai polawani i Yesus kanahi, « Kahioomo kau weweuho, kanamo koie kai pokodadio luwuo po'eheno Apu Alla. » Nilakonomo nde'e i Yahya nunu'akono'o po'eheno.