Miano da to'orio pesuri mebinta sabaano oleo
2
1 Tehinaano koie i Yesus yahoo hai kampo Betlehem wonua Yudea, daano momparenta mokole Herodes. Sa'arino koie, leuhiramo hai Yerusalem miano da to'orio pesuri mebinta hai sabaano oleo.a 2 Kando mpetutukana kanahi, « Hai hapamo dahano koie ana'ate da tehina danta tewali mokoleno miano Yahudi? Ko'ontoomo olimpopono, sabaamo hai tindaa sabaano oleo, kako leu nde'e nta mesombaiho. »3 Sapodeaho lele koie mokole Herodes, halia mpelaroa, kanapo luwu miano ihino kota Yerusalem. 4 Yahopo kai kongkosakohira luwuo kapala pua'ima ronga guru agama Yahudi, kai petukanaihira hai hapamo nta tehinaano koie Mokole Pompokosalama da ari nidandino Apu Alla.
5 Mengkanahi'iramo, « Hai kampo Betlehem wonua Yudea, kanamo koie da ari niburino nabii:
6 ‹ Co'o Betlehem wonua Yudea,
nau da'a oki-okidi hai ra'indo pamarentano Yudea,
kana'umpe nta pebintaanomo me'asa powawai
danta dagai'o umaticu Israil. › »b
7 Pekangiohomo koie i Herodes kai boboi ntesincahira ko'ira miano da to'orio pesuri kai petukanai to'uhira nimpia kando iso ontoo koie olimpopo saba. 8 Kai tena'ira lako hai Betlehem ronga oliwihira, « Milakomo, u'ungke to'uo koie ana'ate. Salakomiu awaa, mimpokatuaku lele, dahaku na'angku nta lako mesombaiho. »
9 Sapodeaho petenano koie mokole, nilakodo melako, kando ontoo saba penda taie olimpopo da ari inontondo hai tindaa sabaano oleo meri'ouhakondo dungku kai todo hai tarono dahano koie ana'ate. 10 Sando ontoomo dahano taie olimpopo, taperando mohende! 11 Pewiso'iramo nde'e koie hai bolo laica ontoo koie ana'ate ronga i Maria tinano. Yahopo kando sudu mpesomba koie hai ana'ate, kando ungkahio wonua mpodiohando inawando kando tompa'o pesombando yahoo wulaa, dupa, ronga pulu ngkeu mowondu. 12 Laro mpo'ipiando Apu Alla mokompehawa'ira kando osiemo mohule tealo hai Herodes, dadi pohule'iramo hai wonuando mponunu sala suere.
Molai hai wonua Mesir
13 Salakodomo ko'ira miano da to'orio pesuri, kai saba me'asa mala'ekatino Apu hai laro mpo'ipiano koie i Yusuf mo'awaakono kanahi, « Pewangumo, kau alaa koie ana'ate ronga tinano, kami mpolai hai wonua Mesir, ronga poo'iamo koruanekeena dungku kaku po'awaakoko, kana'umpe i Herodes dahoo nta u'ungkee koie ana'ate nta pepatee. »
14 Koidesi malo kai pewangu i Yusuf alaa koie ana'ate ronga tinano kando polai hai wonua Mesir. 15 Airuanemo dahando moo'ia dungku kai mate i Herodes.
Kanamo koide kadadiano haratiano Apu kana da pinokodungkuno nabii kanahi, « Mebinta hai wonua Mesir kaku boboiho Anaku. » c
Pinepateando ana'ate hai Betlehem
16 Sato'orio koie i Herodes hindo daa akala'o ko'ira miano da to'orio pesuri nilakono mosa'o to'u larono. Kai tena'ira sorodaduno lako mepatehira luwuo ana ntama da sai da'apo koa rua ta'u umurundo da mpoo'ia hai kampo Betlehem ronga da ni'okudahino. Umurundo ko'ira ana ntama da pinopate mekanunu hai wotu sabano olimpopo da ari pinetukanaakono hai ko'ira miano da to'orio pesuri.
17 Kanamo koie kadadiano hapa da ari kanahino nabii Yeremia, yahoo:
18 « Rurumate ronga powuwusoi me'o'oloiho
pinodeahomo hai kampo Rama.
Rahel merurumateako ko'ira anano. d
Nai ehe telilimboi nasando meda'amo. »
Mohule mebinta hai wonua Mesir
19 Samatenomo i Herodes, kai saba me'asa mala'ekatino Apu laro mpo'ipiano i Yusuf hai wonua Mesir mo'awaakono kanahi, 20 « Pewangumo kau alaa koie ana'ate ronga tinano kami mpohule hai wonua Israil, kana'umpe mematehiramo ko'ira miano da mokea pepatee koie ana'ate. » 21 Nilakono koie i Yusuf mewangu kai alaa koie ana'ate ronga tinano kando mpohule hai wonua Israil.
22 Sawali sapodeahomo nangkuasi i Arkhelaus da momokole mopo'euho i Herodes tamano hai wonua Yudea, koie i Yusuf momee'omo dungku kotahanekeena. Nampodeahomo oliwi hai laro mpo'ipiano, pe'o'alaamo hai wonua Galilea. 23 Sadungkuno kokeena, poo'iahomo hai kampo da meneehako Nazaret, kanamo koie kadadiano haratiano Apu Alla da ari pinokodungkudo raro nabii kanahi, « Dahoo nta nineehako miano Nazaret. »