Sofoni 1

Sofoni

Yayi kele mambu yina Yave zabisaka na Sofoni na ntangu yina Zozyase mwana ya Amone vwandaka ntinu ya Yuda. Sofoni vwandaka mwana ya Kusi. Kusi vwandaka mwana ya Ngedalya, Ngedalya vwandaka mwana ya Amalya mpe Amalya vwandaka mwana ya Ezekyase.

Yave ke semba ntoto nyonso

2 Yave ke na kutuba mutindu yayi:

«Mu ke kufwa

bima nyonso yina ke zingaka na ntoto.

3 Mu ke kufwa bantu na bibulu,

bandeke na bambisi ya maza,

mu ke kufwa bantu ya bantima ya yimbi,

na nyonso yina ke salaka ti ba sala yimbi.

Mu ke bika ata muntu na ntoto.»

Ni mutindu yina Yave me tuba.

Yave ke pesa kitumbu na bantu ya Yuda mpe ya Yelusalemi

4 «Mu ke pesa kitumbu

na bantu ya Yuda

mpe na bantu ya Yelusalemi.

Mu ke katula na kisika yayi bima yina ba ke sadilaka na lusambulu ya Baale

mpe mu ke zimbisa bankumbu ya banganga-nzambi ya nzambi yina.

5 Mu ke kufwa bantu yina ke yulukaka na zulu ya miludi ya kuyalumuka ya bayinzo

samu na kusambilaka binwani ya mazulu.

Mpe bayina ke fukamaka na mantwala ya munu Yave

mpe ke kudyaka ndefi na nkumbu ya nzambi Meleke.

6 Mu ke kufwa bayina nyonso ke pesaka munu Yave mukongo,

bayina ke sosaka munu ve

mpe ke sosaka ve bamvutu ya bawu na sika ya munu. 7 Beno vwanda swii na mantwala ya Yave, Mfumu,

samu ti kilumbu yina Yave ke fundisa yinza me kuma pene-pene!

Yave me kubika munkayulu,

yandi me vedisa bayina yandi bokilaka. 8 Yave me tuba: «Na kilumbu ya munkayulu,

mu ke pesa kitumbu na bamfumu, bana ya bantinu

mpe bayina nyonso ke lwataka na mutindu ya banzenza. 9 Na kilumbu yina, mu ke pesa kitumbu

na bayina nyonso ke sambilaka munu na kwenda kudumuka

mutindu bantu yina zaba Nzambi ve

ke sambilaka banzambi ya bawu ya biteki

mutindu bayina zaba ve Nzambi.

Bayina nyonso ke fulusaka yinzo ya mfumu ya bawu

na bimvwama yina ba kuzwaka na kusadila banzila ya yimbi,

na kubaka na ngolo nyonso mpe na kusadila luvunu.

10 Na kilumbu yina,

na Yelusalemi, munu Yave ke na kutuba,

kukawula ya bantu ke wakana na mwelo yina ba ke bokilaka mwelo ya Bambisi,

bidilu ke wakana na Mbanza ya Malu-malu

mpe makelele ya ngolo ke wakana na zulu ya myongo. 11 Beno bantu ya Mbanza ya banda,

beno dila,

samu ti bantu nyonso ya mumbungu ke kufwa,

ba ke kufwa bantu nyonso yina ke salaka mumbungu. 12 Na ntangu yina, mu ke baka mwinda

mpe mu ke sosa mbanza Yelusalemi.

Mu ke pesa kitumbu na bantu nyonso yina

ke zingaka na mbanza yayi na kizunu, ata kusala kima,

mutindu lubo ya malafu,

bayina ke na kutuba: “Yave lenda kusala kima ve,

ata ya vwanda ya mbote to ya yimbi!” 13 Na yina, bantu ya nkaka ke botula bawu bimwama na ngolo mpe ba ke mwangisa bayinzo ya bawu.

Bawu ke tunga bayinzo

kasi bawu ke zinga na kati ya yawu ve,

bawu ke kunda bilanga ya bayinti ya vinu kasi bawu ke kunwa ve malafu ya yawu.»

Kilumbu ya lufundusu ya Yave me kuma pene-pene

14 Kilumbu ya nene ya lufundusu ya Yave me kuma pene-pene, yawu me kuma pene-pene, mpe yawu ke na kukwiza na nswalu nyonso, nkwizulu ya kilumbu yina, ke sala ti bantu dila na ngolo, bayina mpe ke na kibakala ke lomba ti ba sadisa bawu!

15 Kilumbu yina ke vwanda kilumbu ya nkele ya kulutila,

kilumbu ya kyadi mpe ya boma ya ngolo,

kilumbu ya kumwangisa mpe ya lufwa.

Yawu ke vwanda kilumbu ya mpimpa mpe ya kitombe ya kulutila,

kilumbu ya kufuluka na matuti ya ndombe mpe na dibungi ya ngolo.

16 Na kilumbu yina, makele ya bakulumeta mpe milolo ya mvita ya basoda ke wakana samu na bambanza yina kele ya kutungama na bibaka ya ngolo yina kele na bayinzo ya kibandu.

17 Yave ke na kutuba: «Mu ke kotisa bantu na kati ya kyadi ya ngolo,

mpe bawu ke tambula mutindu bampofo,

samu ti bawu me sala masumu na mantwala ya munu Yave.

Menga ya bawu ke mwangana bisika nyonso,

mutindu fundu-fundu,

mpe bamvumbi ya bawu ke bola

mutindu matiti ya yimbi.»

18 Na kilumbu ya nkele ya Yave,

wolo mpe palata ya bawu

ke lenda ve na kuvuukisa bawu.

Ntoto nyonso ke nyenga na tiya ya kimbanda ya Yave.

Ya tsyelika, ya kele dyambu ya nsisi:

Yave ke kufwa

bantu nyonso yina ke zingaka na ntoto.