Esedase
Ntinu Siluse pesaka muswa ya kutungisa dyaka Yinzo ya nene ya Nzambi
1
Na mvula ya ntete yina Siluse ntinu ya Pelese kumaka mpe ntinu ya Babilone, Yave, samu na kulungisa mambu yina bikulaka mumbikudi Zelemi, salaka ti Siluse kuzwa dibanza ya kusonika mpe ya kumwangisa nsangu yayi na yinsi nyonso: 2 «Munu Siluse ntinu ya Pelese ke na kutuba: Yave, Nzambi ya mazulu me pesa munu kimfumu ya bayinsi nyonso ya ntoto, yandi me pesa munu mpe kiyeko ya kutungila dyaka yandi Yinzo na mbanza Yelusalemi na yinsi ya Yuda. 3 Bayina nyonso kele bantu ya dikanda ya yandi, lenda kuvutuka na mbanza Yelusalemi na yinsi ya Yuda samu na kutunga dyaka Yinzo ya Yave, Nzambi ya Isayeli yina ba ke kembilaka na Yelusalemi. Bika ti Nzambi ya bawu kuvwanda na bawu! 4 Na konso kisika yina ke na kuzinga bantu ya Isayeli, bantu ya bisika yina fwana kusadisa bawu na kupesa bawu palata na wolo, bibulu na makabu ya nkaka na luzolo ya bawu mosi samu na yinzo ya nene ya Nzambi yina kele na Yelusalemi.»5 Na yina, bamfumu ya makanda ya Yuda mpe ya Bezame, banganga-Nzambi na ba-Levite mpe bayina nyonso Nzambi pesaka dibanza ya kwenda kutunga dyaka Yinzo ya Yave yina kele na Yelusalemi, kubamaka samu na kukwenda na Yelusalemi. 6 Bantu nyonso yina vwandaka zinga pene-pene na bantu ya Isayeli sadisaka bawu na kupesa bawu bima yina ba yidikaka na palata mpe na wolo. Bima ya mutindu na mutindu, bibulu na bima ya nkaka ya ntalu. Bawu pesaka mpe bima ya nkaka na luzolo ya bawu mosi.
7 Ntinu Siluse mpe kutikaka bima nyonso ya ntalu yina Nabukadonozole bakaka na Yinzo ya Yave kuna na Yelusalemi samu na kunata mpe kutula yawu na yinzo ya banzambi ya yandi. 8 Na yina, yandi tumisaka Miteledate yina vwandaka kibumbi ya bimvwama na kwenda kubaka bima yango ya ntalu samu na kusimbisa yawu na sika ya Sesebasalea yina vwandaka mfumu ya yinsi ya Yuda. 9 Lutangu ya bima yango vwandaka mutindu yayi: Makumi tatu (30) ya bandonga ya wolo, funda mosi (1000) ya bandonga ya palata, makumi zole na yivwa (29) ya bambele, 10 makumi tatu (30) ya bambungu ya wolo, nkama yiya na kumi (410) ya bambungu ya palata ya mutindu ya nkaka mpe funda mosi (1000) ya bima ya nkaka. 11 Lutangu ya bima nyonso vwandaka mafunda tanu na nkama yiya (5 400) ya wolo mpe ya palata. Sesebasale nataka bima nyonso ntangu yandi katukaka na bundongo na yinsi ya Babilone kintwadi na ba-Zwife ya nkaka samu na kuvutuka na Yelusalemi.