Bikuudi
Nkotolo
Dibuku yayi ya Bikuudi ke na kuzonzila mambu yina salamaka na manima ya kukota ya bana ya Isayeli na ntoto ya Kaana samu na kubaka yawu. Mambu ya dibuku yayi ke na kulandila mambu ya dibuku ya Yewoswa. Konso kifumba vwanda zinga na ntoto ya yandi, kasi bawu vwandaka ntete ve na ntinu samu na kuyala bawu. Bambala mingi, bana ya Isayeli vwandaka pesa Nzambi manima samu na kusambila biteki mpe banzambi ya nkaka. Na yina, Nzambi vwandaka sala ti bayinsi ya nkaka kwiza nwanisa Isayeli mpe kununga bawu. Ntangu bantu vwandaka soba mavanga ya bawu mpe vwandaka bokila Nzambi, Nzambi vwandaka fidisa bikuudi samu na kukuula bantu ya yandi. Bikuudi yango kele na lutangu ya kumi na zole: Otenyele, Ewude, Samengale, Debola kikuudi ya kento, Zedewone, Tola, Yayile, Zefete, Ibesane, Elone, Abedone mpe Samisoni.
Bikuudi vwandaka bamfumu yina vwandaka twadisa kifumba mosi to bifumba mingi.
Na dibuku ya Bikuudi, bantu vwandaka sosa lusalusu na Nzambi mpe Nzambi vwandaka fidisa bawu Kikuudi. Bantu vwandaka ndima Nzambi kaka na mwa ntangu. Mpe na manima, bawu vwandaka vutukila dyaka na kusambila biteki. Ntangu ya bamvita mpe ntangu ya kizunu vwandaka landasana. Na bantangu yina, ya vwandaka ve na ntinu na Isayeli. Konso muntu vwandaka sala mutindu yandi vwandaka zola (Bik. 21.25).
Dibuku yayi kele ya kukabuka mutindu yayi:
Isayeli kotaka na Kaana (Bik. 1)
Nzambi fidisaka Bikuudi na Isayeli (Bik. 2-3.6)
Otenyele, Ewude, mpe Samengale (Bik. 3.7-31)
Debola, Balaka mpe Yayele (Bik. 4-5)
Zedewone (Bik. 6-8)
Abimeleke kumaka ntinu na Sekeme (Bik. 9)
Tola, Yayile mpe Zefete (Bik. 10-12.7)
Ibesane, Elone mpe Abedone (Bik. 12.8-15)
Samisoni (Bik. 13-16)
Bantu ya Dane mpe kisika ya bawu ya lusambulu (Bik. 17-18)
Mvita ya Isayeli na bantu ya Bezame (Bik. 19-21)