Yewoswa \Nkotolo
Dibuku yayi ba ke bokilaka yawu dibuku ya Yewoswa. Nkumbu yayi ya Yewoswa zola kutuba: Yave ke vuukisaka. Dibuku yayi ke na kuzonzila nongo ya bantu ya Isayeli mutindu bawu salaka samu na kubala yinsi ya Kaana, na lutwadusu ya Yewoswa yina yinganaka na kisika ya Moyize.
Dibuku yayi kele ya kukabuka na bandambu tatu ya nene. Ndambu ya ntete ke na kulakisa na dede wapi mutindu ba kwendaka bakila yinsi ya nsilulu (Ye. 1-12).
Ndambu ya zole ke na kuzonzila mutindu ba kabudilaka bamvwilu na bifumba kumi na zole ya Isayeli (Ye. 13-21). Kasi kaka ba-Levite kuzwaka ve bamvwilu mutindu bifumba ya nkaka, samu ti bawu vwandaka sala kisalu ya bunganga-Nzambi, samu ti ni mutindu yina Yave tumisaka yawu na yina me tadila bawu.
Ndambu ya tatu ke na kuzonzila ngwisani yina bantu ya Isayeli salaka dyaka. Bawu salaka yawu kuna na Sekeme (Ye. 22-24). Yewoswa vwandaka kindisa mingi mukangu ya Isayeli na kulombaka na bawu na kuvwanda kaka ya kukangama na Nzambi. Tekila ti yandi kufwa, Yewoswa tubaka na mukangu nyonso ya Isayeli mutindu yayi: « Kana beno pesa ve ntima na kusadila Yave, beno soola bubu yayi nani beno ke sadila. Beno ke sadila banzambi yina sadilaka bankooko ya beno kuna na lweka ya nkaka ya nzadi ya Efalate to banzambi ya ba-Amoli ya yinsi yina beno vwandaka zinga? Munu mpe bantu ya yinzo ya munu, beto ke sadila Yave.» (Ye. 24.15).
Dibuku yayi ba lenda kukabula yawu mutindu yayi :
- Bantu ya Isayeli me baka yinsi ya Kaana (Ye. 1-12) : kukubama (Ye.1-5), bamvita na bambanza (Ye. 6-11), kumanisa na kubaka yinsi (Ye.12)
- Ba me kabula bantoto ya Kaana (Ye. 13-21) : Bantoto ya lweka ya esete ya nzadi ya Yolodani (Ye. 13), bantoto ya lweka ya weste ya nzadi ya Yolodani (Ye. 14-19), bambanza ya kubumbiminaka (Ye. 20), bambanza ya ba-Levite (Ye. 21).
- Ngwisani kuna na Sekeme mpe lufwa ya Yewoswa (Ye. 22-24) : Kiwisa ya bifumba nyonso (Ye. 22), mambu ya nsuka ya Yewoswa (Ye. 23), ngwisani kuna na Sekeme (Ye. 24).