Detelonome
Nkotolo
Detelonome zola kutuba Musiku ya zole (17.18). Dibuku yayi ke na kuzonzila dyaka mambu yina kele na dibuku ya Kubasika. Dibuku ya Detelonome kele na binzonzi mingi ya Moyize. Na kati ya dibuku yayi ya Detelonome ba ke na kulakisa beto mutindu dikanda ya Nzambi kwizaka kuma yimeni na mudimba ya Moabe, kisika ya kukubama samu na kukota na yinsi ya Kaana. Kasi Nzambi tubaka na Moyize ti yandi ke kota ve na yinsi ya nsilulu. Ni yawu yina Moyize salaka kinzonzi tekila yandi kufwa.
Na ntete-ntete Moyize zonzilaka bamvula makumi yiya yina bana ya Isayeli vwandaka kwenda yenga-yenga na yinsi ya kuyuma katuka ntangu yina bawu basikaka na yinsi ya Ngipiti. Nzambi twadisaka bawu. Yandi bakaka bunkete ya bawu.
Na manima, Moyize zonzilaka misiku kumi mpe misiku ya nkaka yina Nzambi pesaka na bantu ya yandi. Ya lungaka kaka ve na kusadila misiku yango, kasi ya lungaka mpe ti dikanda ya Nzambi kuzola Nzambi na ntima nyonso mpe na mwela nyonso. Kuvwanda mpe ya kukwikama na ngwisani yina Yave salaka na bawu.
Na nsuka ya dibuku, Moyize kubamaka na kufwa. Yandi soolaka Yewoswa mutindu kilandi ya yandi. Yandi yimbisaka mukunga yina ke na kusiika Nzambi samu na bumbote ya yandi. Yandi sakumunaka bifumba kumi na zole ya Isayeli, mpe yandi kufwaka ata kukota na yinsi ya nsilulu.
Dibuku yayi lenda kukabuka mutindu yayi:
Moyize salaka kinzonzi ya yandi ya ntete. Yandi bambulaka nongo ya Isayeli (1-4.43).
Moyize salaka kinzonzi ya yandi ya zole. Yandi bangulaka misiku ya Nzambi (4.44-28.68).
Moyize salaka kinzonzi ya yandi ya tatu. Isayeli fwana kuzitisa ngwisani ya Nzambi (29-30).
Moyize zonzaka mambu ya mansukina mpe yandi kufwaka (31-34) .