Lutangu
Nkotolo
Ba ke bokilaka dibuku yayi Lutangu, samu ti ni na kati ya dibuku yayi Nzambi salaka balutangusu mingi ya bantu ya Isayeli. Dibuku yayi ke na kuzonzila luzingu ya bamvula makumi yiya yina bantu ya Isayeli lutisaka na yinsi ya kuyuma, kubanda na mongo ya Sinayi tii ntangu yina bawu kumaka na nkotolo ya yinsi ya Kaana, ntoto ya nsilulu. Nzambi vwandaka kintwadi na bawu.
Dibuku yayi kele ya kukabuka na bandambu tatu. Na ndambu ya ntete (1-10.10), Yave tumisaka Moyize na kusala lutangusu ya bantu mpe na kubongisa nkwendolo ya bawu. Ba tulaka ba-Levite na kisalu ya bawu. Ba kembilaka mukembo ya Paki.
Na ndambu ya zole ya dibuku yayi (10.11-21.20), bantu ya Isayeli bikaka mongo ya Sinayi mpe bawu bakaka nzila samu na kukwenda na yinsi ya nsilulu, tii yina bawu kwendaka kuma na mudimba ya Mowabe. Bawu bwabanaka bampasi mingi yina vwandaka kwenda manisa bawu ngolo. Bawu vungutilaka Yave mpe kisyelo ya yandi Moyize. Yave pesaka bawu kitumbu na kusala ti bawu kusala bamvula makumi yiya na kati ya yinsi ya kuyuma.
Na ndambu ya tatu ya dibuku yayi (21.21-36), bantu ya Isayeli kwizaka kuma na lweka ya esete ya nzadi ya Yolodani. Ba salaka lutangusu ya zole ya bantu ya Isayeli kuna na mudimba ya Mowabe. Ba soolaka Yewoswa kilandi ya Moyize. Yave tumisaka dyaka Moyize na kuzonzila na misiku yina me tadila minkayulu. Yave tumisaka mpe Moyize na kulakisa bantu ya Isayeli bandilu ya yinsi ya nsilulu mpe na kukabudila bawu yinsi yango.
Dibuku yayi lenda kukabuka mutindu yayi:
Lutangusu ya ntete ya bana ya Isayeli (Lut. 1-4)
Misiku ya nkaka mpe mbyekolo ya ba-Levite (Lut. 5-8)
Mukembo ya Paki (Lut. 9-10.10)
Nkwendolo na yinsi ya nsilulu (Lut. 10.11-21)
Bana ya Isayeli na mudimba ya Mowabe (Lut. 22-32)
Nzyetolo ya Isayeli katuka na Ngipiti (Lut. 33.1-33.49)
Yave pesaka malongi ya nkaka (Lut. 33.50-36.13)