KINGANGA-NZAMBI
Nkotolo
Mambu ya dibuku yayi ke landilaka mambu ya dibuku yina ba ke bokilaka Kubasika. Na kati ya dibuku yayi ya kinganga-Nzambi, Nzambi ke na kutatamana na kupesa misiku na Moyize samu ti Moyize kupesa yawu na bantu ya yandi. Ni na kati ya dibuku yayi mpe, bantu ya kifumba ya Levi, Nzambi soolaka bawu samu na kisalu ya bunganga-Nzambi. Ni yawu yina nkumbu ya dibuku yayi kele Kinganga-Nzambi.
Dibuku yayi ke na kupesa malongi mingi samu na banganga-Nzambi. Yawu ke na kulakisa wapi mutindu banganga-Nzambi lenda kuswasikisa mpe kulongisa bantu bima ya longo na bima yina kele ya longo ve, bima ya kuvedila na bima yina kele ya kuvedila ve (10.10-11). Yawu ke na kuzonzila na mambu yina me tadila minkayulu, makabu yina ba ke pesaka na Nzambi, mpe mikembo yina Nzambi tumisaka. Yawu ke na kuzabisa mpe nani lenda belama na ntadisi ya Nzambi, mpe nani lenda belama ve na ntadisi ya Nzambi.
Dyambu ya ngudi ya dibuku yayi kele ni bulongo ya Nzambi mpe wapi mutindu bantu fwana kuzinga samu na kukengidila kintwadi ya bawu na "Nzambi ya longo ya Isayeli", mutindu ya ke ya kusonama: "Beno vwanda ya longo samu ti munu Yave Nzambi ya beno mu kele ya longo" (19.2).
Dibuku yayi kele ya kukabuka mutindu yayi:
- Bayina ke pesa minkayulu fwana kupesa yawu mutindu kele misiku (Kin. 1-7)
- Banganga-Nzambi fwana vwanda bantu ya buzitu, na nkadulu ya mbote (Kin. 8-10)
- Konso mwana ya Isayeli fwana kukima nsumukunu ya nzutu (Kin. 11-16)
- Konso mwana ya Isayeli fwana kukima masumu (Kin. 17-27)