Kubasika
Nkotolo
Dibuku yayi, ni Moyize sonikaka yawu mpe nkumbu ya dibuku yango kele "KUBASIKA", samu ti ni dibuku yayi ke na kuzonzila wapi mutindu Yave kuulaka bana ya Isayeli na kubasisa bawu na bundongo ya Ngipiti. Dibuku yayi lenda kukabuka na bandambu tatu:
Na ndambu ya ntete (Kub. 1-3), bana ya Yakobi vwandaka zinga na Ngipiti mpe vwandaka tala mpasi ya bundongo ya kulutila, kasi Yave soolaka Moyize samu na kubasisa bawu na Ngipiti, yinsi ya bundongo.
Na ndambu ya zole (Kub. 14-18), bantu ya Isayeli ke na kubasika na Ngipiti samu na kukwenda na yinsi ya kuyuma yina ba ke bokilaka Sinayi, kisika kele mongo ya Nzambi. Ntinu ya Ngipiti landaka bawu kintwadi na binwani ya yandi samu na kufwa bana ya Isayeli. Kasi Nzambi salaka bimangu samu na kuvuukisa bantu ya yandi. Na yina, bana ya Isayeli landaka nzyetolo ya bawu mpe Nzambi pesaka bawu madya mpe maza ya kunwa.
Na ndambu ya tatu (Kub. 19-40), bana ya Isayeli vwandaka na yisi ya mongo ya Sinayi. Kuna, Nzambi salaka ngwisani na bantu ya yandi. Na yina, yandi bokilaka Moyize na zulu ya mongo mpe yandi pesaka Moyize matadi ya Musiku. Nzambi zabisaka mpe na Moyize mutindu ya kusadila Musiku yango mpe na manima, Nzambi pesaka dyaka na Moyize bantumunu ya kutunga Yinzo ya Mbwabanu, kisika yandi ke banda na kubwabanaka yandi.
Dibuku yayi lenda kukabuka mutindu yayi:
Bana ya Isayeli na kati ya bundongo (Kub. 1)
Mbutukulu ya Moyize (Kub. 2)
Moyize mpe Aaloni na sika ya Falawo (Kub. 3-6)
Nzambi fidisaka biyoolo kumi (Kub. 7-11)
Mukembo ya paki ya ntete (Kub. 12-13)
Mubu ya batwandu mpe mongo ya Sinayi (Kub. 14-18)
Nzambi pesaka Misiku kumi (Kub. 19-24)
Nzambi pesaka bantumunu samu na yinzo ya Mbwabanu (Kub. 25-27)
Kisalu ya banganga-Nzambi mpe saba (Kub. 28-31)
Kiteki ya mwana ngombe (Kub. 32)
Nzambi vutukila dyaka ngwisani na bantu ya yandi (Kub. 33-34)
Bandukulu ya ntungulu ya Yinzo ya Mbwabanu (Kub. 35-39)
Mbyekolo ya Yinzo ya Mbwabanu (Kub. 40)