Yewoswa 24

Kuna na Sekeme, Isayeli me baka lukanu ya kusadila Nzambi

Yewoswa vukisaka bifumba nyonso ya Isayeli kuna na Sekeme mpe yandi bokilaka bakuluntu ya Isayeli, bamfumu ya bawu, bazuzi ya bawu mpe bisoniki ya bawu. Bawu kwendaka yonzama na mantwala ya Nzambi. 2 Yewoswa tubaka na bantu nyonso: «Yave, Nzambi ya Isayeli ke na kutuba: “Na ntangu ya ntama, bankooko ya beno, Tela tata ya Abalami mpe tata ya Nawole zingaka na lweka ya nkaka ya nzadi ya Efalate mpe bawu vwandaka sadila banzambi ya nkaka. 3 Mu katulaka tata ya beno Abalami na lweka ya nkaka ya nzadi Efalate mpe mu tambusaka yandi yinsi nyonso ya Kaana. Mu funisaka dikanda ya yandi. Mu pesaka yandi Isaaki. 4 Isaaki mu pesaka yandi Yakobi mpe Ezawu. Ezawu mu pesaka yandi mongo ya Seyile kasi Yakobi mpe bana ya yandi kwendaka na Ngipiti. 5 Mu fidisaka Moyize mpe Aaloni mpe mu pesaka yinsi ya Ngipiti biyolo mpe mu basisaka beno. 6 Mu basisaka bankooko ya beno na Ngipiti mpe beno kumaka na mubu ya Batwandu. Kasi bantu ya Ngipiti landaka bankooko ya beno na mubu ya Batwandu na bapusu-pusu ya mvita mpe bayina ke nataka bampunda. 7 Bankooko ya beno lookaka na sika ya Yave. Na yina, yandi tulaka kitombe na kati-kati ya beno mpe bantu ya Ngipiti mpe mubu fukaka bawu. Meso ya beno talaka yinki mu salaka na Ngipiti mpe beno zingaka na yinsi ya kuyuma bantangu mingi. 8 Na manima, mu nataka beno na yinsi ya ba-Amoli yina vwandaka zinga na esete ya nzadi ya Yolodani mpe bawu nwanisaka beno. Mu yekulaka bawu na maboko ya beno. Mu manisaka na kufwa bawu na meso ya beno, mpe beno bakaka yinsi ya bawu. 9 Balake mwana ya Tesipole ntinu ya Mowabe telamaka mpe nwanisaka bantu ya Isayeli. Yandi bokilaka Balame mwana ya Bewole samu na kusiinga beno. 10 Kasi mu kuwaka ve mambu ya Balame, ni yawu yina yandi sakumunaka beno mpe mu kuulaka beno na maboko ya Balake. 11 Beno lutaka nzadi ya Yolodani mpe beno kumaka na Yeliko. Bamfumu ya Yeliko nwanisaka beno na ba-Amoli, ba-Pelizi, ba-Kanani, ba-Iti, ba-Ngilengazi, ba-Ivi mpe ba-Yebuzi. Bantu nyonso yayi mu yekolaka bawu na maboko ya beno 12 mpe mu fidisaka banyosi yina bingisaka bantinu zole yayi ya ba-Amoli. Ya vwanda ata na mbele ya mwita to na munani. 13 Mu pesaka beno yinsi yina beno tadilaka ata mpasi na kuzwa, bambanza yina bantu ya nkaka tungaka mpe yina beno zingaka kuna, bilanga ya bayinti ya vinu mpe ya ba-olive yina bantu ya nkaka kundaka mpe yina beno vwandaka kudya.”»

14 «Na ntangu yayi, beno zitisa Yave mpe beno sadila yandi na ludedomo mpe kukwikama. Beno katala banzambi yina bankooko ya beno vwandaka sadila na lweka ya nkaka ya nzadi ya Yolodani mpe na Ngipiti. Beno sadila Yave. 15 Kana beno pesa ve ntima na kusadila Yave, beno soola bubu yayi nani beno ke sadila. Beno ke sadila banzambi yina sadilaka bankooko ya beno kuna na lweka ya nkaka ya nzadi ya Efalate to banzambi ya ba-Amoli ya yinsi yina beno vwandaka zinga? Munu mpe bantu ya yinzo ya munu, beto ke sadila Yave.» 16 Bantu ya Isayeli vutulaka: «Ya kele basafu mingi samu na beto na kubika Yave mpe na kwenda kusadila banzambi ya nkaka! 17 Samu ti ni Yave, Nzambi ya beto basisaka beto na bankooko ya beto na Ngipiti yinsi ya budongo. Na meso ya beto yandi lakisaka bidimbu yayi: Yandi kebaka beto na kati ya banzila nyonso na kati-kati ya bantu yina beto lutilaka. 18 Na mantwala ya beto, Yave me bingisa bantu nyonso, ata ba-Amoli yina ke zingaka na yinsi. Beto mpe ke sadila Yave samu ti ni yandi Nzambi ya beto.»

19 Na yina, Yewoswa tubaka: «Beno ke lenda ve na kusadila Yave samu ti, yandi kele Nzambi ya longo, Nzambi ya kimbanda. Yandi ke lemvokila ve yimbi ya bemo mpe masumu ya beno. 20 Na ntangu yina beno ke bika Yave samu na kwenda kusadila banzambi ya banzenza, yandi ke dasukila beno samu na kutalisa beno mpasi, yandi ke manisa beno na manima ya kusala beno mambu ya mbote.» 21 «Bantu ya Isayeli vutulaka na Yewoswa, ve beto ke sadila Yave.» 22 Yewoswa zabisaka bawu: Beno kele banbangi ya beno mosi, ni beno me soola Yave samu na kusadila yandi.» 23 Na ntangu yayi, beno katula banzambi ya banzenza yina kele na kati ya beno mpe beno pesa bantima ya beno na sika ya Yave, Nzambi ya Isayeli.» 24 Bantu ya Isayeli vutulaka na Yewoswa: «Beto ke sadila Yave, Nzambi ya beto mpe beto ke tumama na yandi.»

25 Na kilumbu yina, Yewoswa salaka ngwisani na bantu ya Isayeli, yandi salaka misiku mpe bansalulu ya misiku kuna na Sekeme. 26 Yewoswa sonikaka mambu na kati ya dibuku ya Musiku ya Nzambi. Yandi bakaka ditadi ya nene yandi tulaka yawu pene-pene ya yiti ya telebente yina vwandaka na kati ya kivinga ya longo ya Yave. 27 Yewoswa tubaka ba bantu ya Isayeli: «Beno tala, ditadi yayi ke vwanda kimbangi na kati-kati ya beto samu ti yawu me kuwa mambu nyonso yina Yave vwandaka zonzila beto. Yawu ke vwanda kimbangi na kati-kati ya beto samu ti beno kumanga ve Nzambi ya beno.» 28 Na yina, Yewoswa vutulaka bantu nyonso, konso bantu na mvwilu ya bawu.

Ngwisani kuna na Sekeme mpe lufwa ya Yewoswa

29 Na manima ya mambu nyonso yayi, Yewoswa mwana ya Nune, kisyelo ya Yave, kufwaka na bamvula nkama na kumi (110). 30 Ba zikaka yandi na mvwilu ya yandi kuna na Timenate-Selaye na mongo ya Efalayime na node ya mongo ya Ngase. 31 Bantu ya Isayeli sadilaka Yave bilumbu nyonso ya luzingu ya Yewoswa mpe ya bakuluntu nyonso ya Isayeli yina vwandaka pene-pene ya Yewoswa bayina zabaka yina Yave salaka samu na bantu ya Isayeli.

32 Na yina me tadila mikwa ya Yosefi yina bantu ya Isayeli nataka na ntangu ba katukaka na Ngipiti, bawu zikaka yawu na Sekeme na kati ya ndambu ya bilanga yina Yakobi sumbaka na nkama ya bongo ya bisengo na sika ya bantu ya Amole, tata ya Sekeme. Bawu vwandaka bantu ya mvwilu ya bana ya Yosefi. 33 Elazale mwana ya Aaloni kufwaka mpe ba zikaka yandi na mongo ya mwana ya yandi Fineyase yina ba pesaka yandi na mongo ya Efalayime.