Kubasika 38

Kiyokolo ya minkayulu mpe ndonga ya nene

Besalele yidikaka kiyokolo ya minkayulu. Yandi yidikilaka yawu na mabaya ya yinti ya akasya. Bandilu ya yawu vwandaka ya bametele zole na ndambu na balweka nyonso. Mutela ya yawu vwandaka ya metele mosi na ndambu. 2 Na bansongi ya yawu nyonso yiya, yandi yidikaka mampoka. Mampoka yango vwandaka kaka kima mosi na yawu. Yandi tulaka na zulu ya yawu kisengo ya mbwaki. 3 Yandi yidikaka bisalulu nyonso ya kiyokolo ya minkayulu: bapele, bambungu, misoma, bima ya bombi. Yandi salaka biteko nyonso yina na kisengo ya mbwaki. 4 Yandi yidikaka kitalaka ya kisengo ya mbwaki mutindu mpwasa. Yandi salaka yawu milunga ya mbwaki na basongi nyonso yiya. Yandi tulaka yawu na balweka ya kitalaka ya kisengo ya mbwaki ya kiyokolo ya minkayulu kubanda na yisi tii na kati-kati ya dibulu ya kiyokolo ya minkayulu. 5 Yandi tulaka yawu milunga yiya na bansongi nyonso yiya samu na kukotisaka bayinti. 6 Yandi yidikaka bayinti na mabaya ya akasya. Yandi tulaka yawu kisengo ya mbwaki. 7 Yandi kotisaka bayinti yango na kati ya milunga. Bayinti yina vwandaka na balweka nyonso zole ya kiyokolo ya minkayulu, samu na kunanguninaka yawu. Na yina, kiyokolo yango, yandi yidikilaka yawu na mabaya. Na kati-kati ya yawu vwandaka mpamba mutindu dibulu.

8 Yandi yidikaka ndonga ya nene. Yandi yidikilaka yawu na kisengo ya mbwaki mpe kivwandulu ya yawu na kisengo ya mbwaki. Na kuyidika yawu, yandi sadilaka bitala-tala ya bisengo ya mbwaki yina pesaka bakento yina vwandaka sala kisalu ya bawu na nkotolo ya Yinzo ya Mbwabanu.

Balele ya bibaka ya lupangu

9 Yandi yidikaka bima ya kuzungisa lupangu nyonso. Samu na kuyidika ngaanda, yandi salaka balele ya lino ya mbote. Samu na lweka ya sude, yinda ya yawu vwandaka ya bametele makumi tanu. 10 Yawu vwandaka na makumi zole ya makunzi mpe makumi zole ya bisengo ya yawu na yisi, ya kuyilama na bisengo ya mbwaki. Bisimbulu mpe mwa bayinti ya yawu vwandaka ya palata. 11 Samu na lweka ya node, yandi salaka mpe mutindu mosi. Yawu vwandaka na makumi zole ya makunzi, na makumi zole ya bisengo ya yawu na yisi, ya kuyilama na bisengo ya mbwaki. Bisimbulu mpe mwa bayinti ya yawu vwandaka ya palata. 12 Na lweka ya wesete, ya vwandaka na balele na bametele makumi zole na tanu. Yawu vwandaka na makunzi kumi mpe bisengo ya yawu kumi na yisi. Bisimbulu ya makunzi na mwa bayinti ya yawu vwandaka ya palata. 13 Na lweka ya esete, ya vwandaka na bametele makumi zole na tanu. 14 Na lweka mosi ya nkotolo, ya vwandaka na balele na bametele nsambwadi na ndambu. Yawu vwandaka na makunzi tatu mpe bisengo ya yawu tatu na yisi. 15 Na lweka ya nkaka ya nkotolo, na lumoso mpe na lubakala, ya vwandaka na balele na bametele nsambwadi na ndambu. Yawu vwandaka na makunzi tatu mpe bisengo ya yawu tatu na yisi. Na yina, ya vwandaka na balele na balweka nyonso zole ya nkotolo.

16 Balele nyonso yina zungaka lupangu vwandaka ya lino ya mbote. 17 Bisengo ya yisi ya makunzi vwandaka ya bisengo ya mbwaki. Bisimbulu ya makunzi na mwa bayinti ya yawu vwandaka ya kusalama na palata. Bayimpu ya makunzi vwandaka ya palata. Makunzi nyonso ya lupangu vwandaka ya kuvukana na mwa bayinti ya palata. 18 Lele ya mwelo ya ngaanda vwandaka ya basinga ya lino ya mbote, ya mwa mbwaki, ya mbwaki mpe ya mbwaki ya kulutila. Ya vwandaka kisalu ya bantu yina ke tungaka na maboko. Nene ya lele yango vwandaka ya bametele kumi. Mutela ya yawu vwandaka ya bametele zole na ndambu, mutindu balele nyonso ya lupangu. 19 Makunzi ya yawu yiya mpe bisimbulu ya yawu ya yisi vwandaka ya kisengo ya mbwaki. Bisimbulu ya yawu na mwa bayinti ya yawu vwandaka ya palata. Bayimpu ya yawu mpe vwandaka ya palata. 20 Binko nyonso ya basinga ya Yinzo ya longo mpe ya lupangu vwandaka ya kisengo ya mbwaki.

Lutangu ya bisengo yina ba sadilaka

21 Yayi ni lutangu ya bisengo yina ba sadilaka samu na kutunga Yinzo ya longo kisika yina ba bumbaka dibuku ya ngwisani. Na lutumu ya Moyize, ba-Levite salaka na lutwadusu ya Itamale, mwana ya nganga-Nzambi Aaloni, samu na kusala lutangu yayi. 22 Besalele mwana ya Wuli, mutekolo ya Wule muntu ya kifumba ya Yuda, salaka mambu nyonso yina Yave tumisaka na Moyize. 23 Yandi vwandaka kintwadi na Owolyabe mwana ya Ayisamake ya kifumba ya Dane, yina vwandaka kisadi-matadi ya ntalu, kifikudi, kitungi-bilele ya lino ya mbote, ya mwa mbwaki, ya mbwaki mpe ya mbwaki ya kulutila.

24 Lutangu ya wolo yina bantu ya Isayeli pesaka samu na kutunga Yinzo ya longo vwandaka: 877 ya bakilo na bangalame 300. Ba fwanikisaka yawu na kitezolo yina ba vwandaka sadila na kivinga ya longo.

25 Lutangu ya palata yina ba lokotaka vwandaka: 3017 ya bakilo na bangalame 750. Ba fwanikisaka yawu na kitezolo yina ba vwandaka sadila na kivinga ya longo. Ba yonzikaka nyonso yina ntangu ba salaka lutangusu ya bantu nyonso ya kimvuka. 26 Yawu zola kutuba ti bantu nyonso yina vwandaka na bamvula makumi zole to bamvula ya kulutila, bayina sonikisaka bankumbu ya bawu, ba vwandaka babakala 603 550. Mosi-mosi na bawu pesaka bangalame tanu ya palata. 27 Ba sadilaka bakilo 3000 ya palata samu na kuyidika bisimbulu ya yisi ya makunzi ya Yinzo ya longo mpe ya lele yina vwandaka na kati. Bisimbulu vwandaka 100 mpe konso kisimbulu vwandaka ya bakilo 30. 28 Na bakilo 17 mpe bangalame 750 yina bikanaka, ba yidikaka bayimpu yina vwandaka na zulu ya makunzi, bisimbulu mpe mwa bayinti yina vwandaka vukisa makunzi nyonso.

29 Lutangu ya kisengo ya mbwaki yina bantu ya Isayeli pesaka vwandaka ya bakilo 2124. 30 Na bakilo ya kisengo ya mbwaki yayi, ba yidikaka: bisimbulu ya yisi ya makunzi yina vwandaka na mwelo ya Yinzo ya Mbwabanu, kiyokolo ya kisengo ya mbwaki ya minkayulu na mutalaka ya yawu ya kisengo ya mbwaki mpe bisalulu nyonso ya kiyokolo, 31 bisimbulu ya yisi ya makunzi ya lupangu, bisimbulu ya yisi ya mwelo ya lupangu, binko ya basinga nyonso ya Yinzo mpe ya lupangu.