Kubasika 37

Sanduku ya ngwisani

Besalele yidikaka sanduku. Yandi yidikilaka yawu na mabaya ya bayinti ya akasya. Yinda ya yawu vwandaka ya metele mosi na basantimetele makumi zole na tanu. Nene ya yawu vwandaka ya basantimetele makumi nsambwadi na tanu mpe mutela ya yawu vwandaka ya basantimetele makumi nsambwadi na tanu. 2 Besalele tulaka yawu wolo ya mbote na kati tii na ngaanda. Bandilu ya yawu nyonso yandi tulaka yawu wolo. 3 Yandi sulumunaka wolo samu na kuyidikila yawu milunga yiya ya wolo. Yandi tulaka milunga yango na bansongi nyonso yiya. Zole na lweka mosi mpe zole dyaka na lweka ya nkaka. 4 Yandi yidikaka bayinti zole na yinti ya akasya mpe yandi tulaka yawu wolo. 5 Yandi kotisaka bayinti yango na milunga yina vwandaka na balweka ya sanduku, samu na kunanguninaka sanduku.

6 Besalele yidikaka mpe kitapu ya wolo ya mbote, kisika ya kupesilaka minkayulu ya menga. Kitapu yango vwandaka na yinda ya metele mosi na basantimetele makumi zole na tanu, nene ya yawu vwandaka ya basantimetele makumi nsambwadi na tanu. 7 Yandi yidikaka bakeluba zole ya wolo ya ngolo mpe yandi tulaka yawu na bansongi nyonso zole ya kitapu. 8 Yandi tulaka keluba mosi na nsongi ya ntete, keluba ya nkaka na nsongi ya nkaka. Bakeluba nyonso zole mpe kitapu vwandaka kaka kima mosi. 9 Bakeluba vwandaka talisa mapapu ya bawu na zulu. Mapapu yango fukaka kitapu, kisika ya kupesilaka minkayulu ya menga. Bakeluba vwandaka ya kutalasana. Bizizi ya bakeluba vwandaka ya kutalisa na kitapu.

Mesa ya mampa

10 Besalele yidikaka mesa ya mampa. Yandi yidikilaka yawu na mabaya ya yinti ya akasya. Yinda ya yawu vwandaka ya metele mosi. Nene ya yawu vwandaka ya basantimetele makumi tanu, mpe mutela ya yawu vwandaka ya basantimetele makumi nnsambwadi na tanu. 11 Yandi tulaka yawu na wolo ya mbote. Bandilu ya yawu nyonso, yandi tulaka yawu wolo. 12 Mesa yango, yandi yidikila yawu ndilu ya basantimetele nana. Na zulu ya ndilu yina, yandi bongisaka yawu na kutula dyaka ndilu ya nkaka ya wolo. Bandilu nyonso zungidilaka mesa. 13 Yandi yidikilaka yawu milunga yiya ya wolo. Yandi tulaka milunga yango na bansongi nyonso yiya ya makulu ya mesa. 14 Milunga yango vwandaka pene-pene ya bandilu yango. Ni yawu yambaka bayinti ya kunanguninaka mesa. 15 Bayinti yango, yandi yidikilaka yawu na mabaya ya yinti ya akasya. Yandi tulaka yawu wolo. Ni na yawu ba bandaka na kunanguninaka mesa. 16 Mesa yango, yandi yidikilaka yawu bandonga, bakopo, bandonga ya fyoti, bambungu samu na minkayulu ya vinu. Yandi yidikilaka yawu na wolo ya mbote.

Kitentokolo ya wolo ya minda

17 Yandi yidikaka kitentokolo ya wolo ya minda. Kitentokolo yango, yandi yidikilaka yawu na wolo ya ngolo. Dikulu ya yawu, maboko ya yawu, mwa bandonga ya yawu, makolo ya yawu ya nkaka na bifulu ya yawu, nyonso vwandaka kaka kima mosi. 18 Bintala nnsambwadi vwandaka ya kubasika na balweka ya yawu: bintala tatu-tatu na konso lweka ya kitentokolo ya minda. 19 Konso kintala vwandaka na mwa bambungu tatu mutindu kifulu ke na kusosa kupasuka, na makolo mpe bifulu. Ni mutindu yina vwandaka bintala nyonso nnsambwadi ya kitentokolo ya minda. 20 Na zulu ya yinti ya kati-kati ya kitentokolo ya minda, ya vwandaka na mwa bandonga yiya mutindu kifulu ke na kusosa kupasuka, na makolo mpe bifulu. 21 Na yisi ya bintala zole ya ntete, ya vwandaka na dikolo mosi. Dikolo mosi vwandaka na bintala zole ya nkaka, dikolo mosi mpe na bintala zole ya nsuka. Bintala nyonso nnsambwadi ya kitentokolo ya minda vwandaka mutindu yina. 22 Makolo ya yawu na bintala ya yawu vwandaka kaka kima mosi. Nyonso vwandaka ya kuyilama na wolo ya ngolo, wolo ya mbote. 23 Yandi yidikaka minda nsambwadi ya yawu. Yandi yidikaka mpe bisimbulu ya minda mpe bima ya bombi ya yawu na wolo ya mbote. 24 Yandi sadilaka bakilo makumi tatu ya wolo ya mbote, samu na kitentokolo ya minda mpe bima nyonso ya yawu.

Mesa ya kuyokilaka Maaka ya nsunga ya mbote

25 Besalele yidikaka mesa ya kuyokilaka maaka ya nsunga ya mbote. Yandi yidikilaka yawu na mabaya ya yinti ya akasya. Yinda mpe nene ya yawu vwandaka na basantimetele makumi tanu na balweka nyonso. Mutela ya yawu vwandaka metele mosi. Mampoka ya yawu vwandaka kaka kima mosi na yawu. 26 Yandi tulaka yawu nyonso wolo ya mbote, na balweka ya yawu, mpe na mampoka ya yawu. Zulu ya yawu mpe ndilu ya yawu vwandaka ya wolo. 27 Yandi yidikaka milunga zole ya wolo na yisi ya ndilu, na lweka ya lubakala mpe na lweka ya kento. Yandi salaka yawu na balweka nyonso zole yina, samu na kukotisaka bayinti ya kunanguninaka yawu. 28 Yandi yidikaka bayinti na mabaya ya akasya. Yandi tulaka yawu wolo.

29 Yandi yidikaka mafuta ya mbyekolo ya longo mpe mananasi ya nsunga ya mbote. Kuvukisa mananasi yina, ya vwandaka kisalu mutindu ya bisadi-mananasi.