Kutunga binkuti ya banganga-Nzambi
39
Ba bakaka lino ya mwa mbwaki, ya mbwaki mpe ya mbwaki ya kulutila, ba yidikaka bikunti ya kisalu ya longo mpe ba yidikaka bikunti ya longo ya Aaloni mutindu Yave tumisaka yawu na Moyize.2 Ba yidikaka efode. Ba yidikilaka yawu na basinga ya wolo, na lino ya mwa mbwaki, ya mbwaki, ya mbwaki ya kulutila, mpe na lino ya mbote. 3 Samu na kuzwa basinga ya wolo, ba lengulaka bambele ya wolo mpe ba zengaka yawu mutindu basinga mpe ba kotisaka yawu na lele ya mwa mbwaki, ya mbwaki mpe ya lino ya mbote. Ya vwandaka kisalu ya bantu yina ke tungaka mbote. 4 Efode yango ba yidikilaka yawu basinga zole ya magembo, ya kutungama na balweka ya yawu. Ni basinga yina vwandaka vukisa bitini zole ya efode. 5 Mukaba yina vwandaka na zulu ya efode vwandaka kaka kima mosi na efode. Yawu mpe vwandaka mutindu yayi: basinga ya wolo ya lino ya mwa mbwaki, ya mbwaki, ya mbwaki ya kulutila, mpe ya lino ya mbote, mutindu Yave tumisaka yawu na Moyize. 6 Ba kubikaka matadi ya ntalu yina ba ke bokilaka onise, ba sonikaka bankumbu ya bana ya Isayeli mutindu kinyemo mpe ba tulaka yawu na kati ya mwa bisengo ya wolo. 7 Ba tulaka matadi nyonso zole na basinga ya magembo ya efode, samu na kusala kidimbu ya bifumba kumi na zole ya bana ya Isayeli, mutindu Yave tumisaka yawu na Moyize.
Kutunga peketolale
8 Ba tungaka peketolale ya lufundusu. Yawu vwandaka kisalu ya bantu yina ke salaka yawu na bunkete nyonso. Ba tungaka peketolale kaka mutindu mosi na efode: na basinga ya wolo ya lino ya mwa mbwaki, ya mbwaki, ya mbwaki ya kulutila mpe ya lino ya mbote. 9 Ntangu ba futikaka yawu, balweka ya yawu nyonso vwandaka mutindu mosi. Ya vwandaka basantimetele makumi zole na tanu na konso lweka. 10 Ba kotisaka na kati ya peketolale, matadi ya ntalu na milonga yiya. Mulonga ya ntete: saledwane, topaze mpe emelode. 11 Mulonga ya zole: esekalebukele, lazulite mpe zasepe. 12 Mulonga ya tatu: opale, angate mpe ametisete. 13 Mulonga ya yiya: klizolite, onise mpe zasepe. Matadi nyonso yina vwandaka na kati ya bisimbulu ya yawu ya wolo. 14 Ba sonikaka na zulu ya konso ditadi, nkumbu ya mosi na mosi ya bana kumi na zole ya Yakobi. Ya vwandaka ya kusonama mutindu kinyemo. Konso ditadi vwandaka na nkumbu mosi ya kifumba na kati ya bifumba kumi na zole ya Isayeli.
15 Ba yidikaka mwa bampanga ya wolo ya mbote samu na peketolale. Ba yidikaka yawu mutindu ba ke kangaka bansuki ya maboko. 16 Ba yidikaka bisimbulu zole mpe mwa milunga zole ya wolo na samu peketolale. Ba tulaka yawu na bansongi zole ya peketolale. 17 Ba kangaka mwa bampanga zole yina ya wolo na milunga zole na bansongi ya peketolale. 18 Ba kangaka mpe bansongi nyonso zole ya nkaka ya mwa bampanga yango na bisimbulu yina kele na basinga ya magembo ya efode, na mantwala. 19 Ba yidikaka dyaka milunga zole ya wolo. Ba tulaka yawu na bansongi zole ya nkaka ya peketolale, na lweka ya kati yina ke vukanaka na efode. 20 Ba yidikaka dyaka milunga zole ya wolo. Ba tulaka yawu na yisi ya basinga ya magembo ya efode, na mantwala, pene-pene ya kisika yina ba tungaka yawu. Milunga yango vwandaka na zulu ya mukaba ya efode. 21 Ba kangaka milunga ya peketolale mpe milunga ya efode na singa ya mwa mbwaki, samu na kukanga peketolale na mukaba ya efode. Na yina, peketolale vwandaka katuka ve na kisika ya yawu. Bawu salaka mutindu Yave tumisaka yawu na Moyize.
Kutunga binkuti ya nkaka ya kinganga-Nzambi
22 Ba tungaka dizwela. Ni na zulu ya yawu nganga-Nzambi vwandaka lwatila efode. Dizwela nyonso vwandaka ya mwa mbwaki. Ya vwandaka kisalu ya bantu yina ke tungaka mbote. 23 Dizwela yango vwandaka na dibulu na kati-kati samu na kukotisaka yintu. Ba futikaka bandilu ya dibulu yango mpe ba tungaka yawu. Ba tungaka yawu mbote-mbote samu ti yawu kupasuka ve. 24 Ba tungaka ndilu nyonso ya yisi ya dizwela, ba tulaka bifwani ya bambuma ya ngelenadine ya mwa mbwaki, ya mbwaki mpe ya mbwaki ya kulutila. Ba bongisaka yawu mpe na basinga ya lino ya mbote. 25 Na kati-kati ya bambuma yina, ba tulaka mwa bangunga ya wolo, na ndilu nyonso ya yisi ya dizwela. 26 Na yisi ya ndilu ya dizwela, ba tulaka mwa ngunga mosi ya wolo, kifwani ya mbuma mosi ya ngelenadine, mwa ngunga mosi ya wolo, kifwani ya mbuma mosi ya ngelenadine, samu na kusala kisalu mutindu Yave tumisaka yawu na Moyize.
27 Bisadi-bilele yidikaka binkuti ya yinda ya lino samu na Aaloni mpe samu na bana ya yandi. Ya vwandaka kisalu ya bantu yina ke tungaka mbote. 28 Ba yidikaka mpe yimpu ya lino ya mbote ya nganga-Nzambi ya ntete mpe bayimpu ya lino ya mbote ya banganga-Nzambi ya nkaka, mpe bakaleso ya lino. 29 Ba yidikaka basinga ya luketo mutindu nsuki ya maboko ya lino ya mbote, ba vukisaka yawu na lino ya mbote ya mwa mbwaki, ya mbwaki mpe ya mbwaki ya kulutila. Ya vwandaka kisalu ya bantu yina ke tungaka mbote. Ba salaka mutindu Yave tumisaka yawu na Moyize.
30 Na kumanisa, ba yidikaka mwa kisengo ya wolo ya mbote. Ba sonikaka na zulu ya yawu mutindu ba ke salaka na kinyemo, mutindu yayi: "Ya kubyekwa na Yave". 31 Kidimbu yango ba kangaka yawu na singa ya mwa mbwaki na zulu ya yimpu ya kinganga-Nzambi, mutindu Yave tumisaka yawu na Moyize.
Nsukunu ya kisalu nyonso
32 Ni mutindu yayi ba manisaka na kukubika bima nyonso ya ntungulu ya Yinzo, Yinzo ya Mbwabanu. Bantu ya Isayeli salaka kisalu, bawu salaka nyonso mutindu Yave tumisaka yawu na yinwa ya Moyize.
33 Bantu ya Isayeli natinaka Moyize bima nyonso ya Yinzo:
- balele ya Yinzo, bima ya kutungila yawu, bisimbulu, mabaya, bayinti ya fyoti, makunzi mpe bisimbulu ya yisi ya makunzi.
34 - bampusu ya bankombo ya mbakala ya tinta ya mbwaki samu na muludi, bampusu ya bambisi ya nene ya mubu samu na muludi, mpe lele yina ke kabulaka bivinga,
35 - sanduku ya ngwisani na bayinti ya kunanguninaka yawu, mpe kitapu ya yawu, kisika ya kupesilaka minkayulu ya menga,
36 - mesa ya mampa na bisalulu ya yawu mpe mampa ya yawu,
37 - kitentokolo ya wolo ya mbote, minda ya yawu, bisalulu ya yawu mpe mafuta samu na minda,
38 - mesa ya wolo kisika ba ke yokilaka maaka ya nsunga ya mbote, mafuta ya mbyekolo, mpe maaka yina ba ke yokaka,
- lele ya mwelo ya Yinzo,
39 - kiyokolo ya minkayulu ya kisengo ya mbwaki bayinti ya kunanguninaka yawu mpe bisalulu ya yawu mpe mutalaka ya yawu ya kisengo ya mbwaki,
- ndonga ya nene mpe kivwandulu ya yawu,
40 - balele ya lupangu na makunzi ya yawu mpe bisimbulu ya yisi ya makunzi, lele ya mwelo ya lupangu na basinga nyonso mpe binko ya basinga nyonso,
- bisalulu nyonso samu na Yinzo ya longo, Yinzo ya Mbwabanu,
41 - binkuti ya banganga-Nzambi samu na kisalu ya Yinzo ya longo:
- binkuti ya kinganga-Nzambi ya nganga-Nzambi ya ntete Aaloni,
- binkuti yina bana ya yandi ke banda na kulwataka na ntangu ya kusala kisalu ya bawu.