Mbandukulu 43

Bezame kwendaka na Ngipiti na bampangi ya yandi

Nsatu vwandaka tatamana kuvwanda ngolo na yinsi. 2 Ntangu bawu manisaka na kudya bambuma ya faline yina bawu sumbaka na Ngipiti, Yakobi zonzaka na bana ya yandi: «Beno vutuka kuna na kusumbila beto mwa bima ya kudya.» 3 Yuda vutulaka na yandi: «Muntu yina zonzilaka beto ti, munu ke yamba beno ve na ntwala ya munu, kana mpangi ya beno kele ve na beno. 4 Kana nge ndima ti leki ya beto kukwenda na beto, kuna beto ke kwenda sumbila nge bima ya kudya. 5 Kana nge zola ve, zaba ti beto ke kwenda ve. Samu ti muntu yango zonzaka na beto: “Mu ke yamba beno ve na ntwala ya munu, kana beno kwiza ve na leki ya beno.”» 6 Isayeli vutulaka: «Samu na yinki beno me sala munu yimbi na kuzonza na muntu yina ti, beno kele na mpangi ya nkaka?» 7 Bawu vutulaka: «Ni yandi muntu yufulaka beto byuvu na yina me tadila beto mpe dikanda ya beto. Yandi yufulaka beto mutindu yayi: “Tata ya beno kele ntete moyo? beno kele na mpangi ya nkaka?” Beto vutulaka na babyuvu ya yandi. Beto lendaka zaba ve ti yandi zolaka tuba ti: “Beno nata leki ya beno”.»

8 Yuda zonzaka na tata ya yandi Isayeli: «Bika mwana kukwenda na munu. Beto kwenda kana beto zola vwanda moyo mpe beto kufwa ve, beto, na nge, mpe na bana ya beto. 9 Mu me bunda ntulu na kuvutula yandi, ni na munu nge ke yufula yandi. kana mu vutula ve yandi na nge, mu ke vwanda na foti na ntwala ya nge luzingu ya munu nyonso. 10 Kana beto me lutisa ntangu mingi awa ve, nga beto me kwenda na kuvutuka bambala zole.» 11 Tata ya bawu Isayeli tubaka na bawu: «Kana ya kele mutindu yina, beno sala mutindu yayi: “Beno tula na basaki ya beno bima ya kitoko ya yinsi ya beto, samu na kupesa yawu munkayulu na muntu yina. Na yina, beno baka mwa ndambu ya maaka ya nsunga ya mutindu na mutindu, na ndambu ya mafuta ya nyosi, na ndambu ya bankandi, na bambuma ya nkaka. 12 Beno nata mbongo ya nkaka, mpe beno zimbana ve na kuvutula yina bawu tulaka na basaki ya beno. Yawu lenda vwanda ti ba zimbanaka. 13 Beno baka mpangi ya beno, mpe beno vutuka na muntu yina. 14 Bika Nzambi-Mpungu simba ntima ya yandi, samu ti yandi tadila beno kyadi, mpe yandi bika Bezame na mpangi ya beno ya nkaka kuvutuka na beno! Na yina me tadila munu, mu ke bikana kwandi na mwana ve mutindu ti mu butaka ve.” »

Yosefi kudyaka sika mosi na bampangi ya yandi

15 Bana ya Yakobi bakaka munkayulu, mpe kuzwaka mbongo ya nkaka na Bezame. Bawu kwendaka na Ngipiti. Ntangu bawu kumaka, bawu kwendaka na ntwala ya Yosefi. 16 Ntangu Yosefi talaka Bezame na bampangi ya yandi, yandi zonzaka na ntwadisi ya yinzo ya yandi: «Nata bantu yayi na yinzo ya munu, kufwa kibulu mosi mpe lamba yawu. Bawu ke kudya na munu na midi.» 17 Ntwadisi yango salaka yina Yosefi tubaka, mpe yandi nataka bantu yina na yinzo ya Yosefi. 18 Bawu kuzwaka boma na kukota na yinzo ya Yosefi, mpe bawu zonzasanaka: «Ni samu na mbongo yina ba tulaka na basaki ya beto, na ntangu beto kwizaka na mbala ya ntete. Bawu me kotisa beto kwaku samu na kusala beto yimbi. Bawu ke baka bambuluku ya beto, mpe ke kumisa beto mindongo ya bawu.» 19 Bampangi ya Yosefi kwendaka pene-pene ya kisadi ya yandi na mwelo ya yinzo, mpe bawu zonzaka na yandi: 20 «Lemvokila beto Mfumu, ntete-ntete beto kwizaka kwaku na kusumba bima ya kudya. 21 Na ntangu beto vwandaka vutuka, beto kumaka na kisika ya kulutisila mpimpa. Kuna beto fungulaka basaki ya beto. Ntangu beto fungulaka yawu, beto talaka mbongo ya mosi-mosi na beto na kati ya saki, mpe yawu vwandaka ya kulunga. Ni yawu yina beto me kwiza na yawu. 22 Beto me nata mpe mbongo ya nkaka ya kusumbila bima ya kudya. Beto zaba ve muntu tulaka yawu na basaki ya beto.» 23 Ntwadisi ya yinzo ya Yosefi vutulaka: «Beno vwanda swi, mpe beno vwanda ve na boma. Ni Nzambi ya beno, mpe Nzambi ya tata ya beno muntu tulaka kimvwama na basaki ya beno. Kasi mbongo yina beno nataka, mu kuzwaka yawu.» Na manima yandi basisaka Simewone, mpe nataka yandi na sika yina bampangi ya yandi vwandaka.

24 Ntwadisi ya yinzo ya Yosefi kotisaka bawu na kati ya yinzo ya Yosefi. Ba natinaka bawu maza ya kusukudila makulu mpe madya ya bambuluku ya bawu. 25 Bawu kubikaka munkayulu na kuvingilaka ti Yosefi kukwiza na midi, samu ti ba zabisaka bawu ti bawu ke kudya na Yosefi. 26 Ntangu Yosefi kumaka na yinzo ya yandi, bampangi ya yandi pesaka yandi munkayulu yina vwandaka na bawu, mpe na manima bawu fukamaka na ntwala ya yandi kizizi na ntoto. 27 Yosefi yufulaka bawu: «Beno kele mbote? Tata ya beno ya kiboba yina beno zonzilaka munu, yandi kele mbote? Yandi kele ntete moyo?» 28 Bawu vutulaka: «Kisadi ya nge, tata ya beto, kele mbote, yandi kele ntete moyo.» Bawu yinamaka mpe fukamaka kizizi na ntoto. 29 Yosefi talaka Bezame mpangi ya yandi ya mama mosi mpe yandi tubaka: «Ni yandi leki ya beno yina beno zonzilaka munu?» Yandi tubaka dyaka: «Mwana ya munu, bika Nzambi kusadila nge mulemvo.»

30 Yosefi talaka kyadi na ntima na ntangu yandi talaka mpangi ya yandi, mpe yandi kuzwaka nsatu ya kudila. Mbala mosi yandi telamaka mpe kwendaka dila na kivinga ya yandi. 31 Ntangu yandi manisaka na kudila, yandi sukulaka kizizi ya yandi mpe yandi basikaka na kivinga ya yandi. Yandi kangaka ntima mpe tubaka: «Beno kabula madya.» 32 Ba tudilaka Yosefi madya na mesa ya yandi mosi, mpe bampangi ya yandi na mesa ya nkaka. Mutindu mosi bantu ya Ngipiti yina vwandaka na yinzo ya Yosefi, bawu mpe na mesa ya nkaka. Samu ti bantu ya Ngipiti fwanaka kudya ve madya kisika mosi na ba-Ebelewo. Yawu kele dyambu ya nkazi samu na bantu ya Ngipiti. 33 Bampangi ya Yosefi vwandilaka na mantwala ya yandi. Ba vwandisaka bawu na mulonga, kubanda mwana ya ntete tii mwana ya mansukina. Samu na yawu, bawu vwandaka talasana na kupamuka nyonso. 34 Yosefi tumisaka ba tudila bawu madya yina vwandaka na mesa ya yandi. Kasi madya ya Bezame lutilaka ya bawu nyonso bambala tanu. Bawu kunwaka mpe bawu yangalalaka.