Mbandukulu 44

Yosefi tontaka bampangi ya yandi

Na manima Yosefi tumisaka ntwadisi ya yinzo ya yandi, yandi tubaka mutindu yayi: «Fulusa basaki ya bantu yayi na bima ya kudya yina bawu lenda nata, mpe vutula mbongo ya mosi-mosi na kati ya saki ya yandi, mpe tula yawu na zulu ya bima yina ya kudya. 2 Tula na kati ya saki ya leki ya bawu mbungu ya munu ya palata, na mbongo ya yandi ya madya.» Ntwadisi ya yinzo ya Yosefi salaka mutindu Yosefi tubaka na yandi. 3 Na suka-suka ya kilumbu yina landaka, ntangu bwisi kutsyaka, ba pesaka bawu luve ya kukwenda, bawu na bambuluku ya bawu. 4 Bawu basikaka na mbanza. Bawu kumaka ntete ntama ve, Yosefi tubaka na ntwadisi ya yinzo ya yandi: «Telama nge landa bantu yina, nge kwenda kuzwa bawu, mpe nge yufula bawu: “Samu na yinki beno me vutula yimbi na bumbote yina ba me sadila beno? 5 Samu na yinki beno me laba mbungu yina mfumu ya munu ke nwininaka mpe ke tadilaka mambu yina ke kwiza? Mambu beno me sala kele yimbi!”»

6 Yandi kwendaka kuzwa bawu mpe yandi zabisaka na bawu mambu nyonso yina. 7 Bawu vutulaka na yandi: «Mfumu ya munu, samu na yinki nge lenda zonza dyambu ya mpila yina? zaba ti beto bisadi ya nge, beto lenda sala dyambu ya mutindu yina ve!» 8 Ntangu beto kumaka na Kaana, beto talaka mbongo na kati ya basaki. Mpe ntangu beto vutukaka kwaku, beto vutulaka nge yawu. Na yina, wapi mutindu beto lenda laba dyaka palata to wolo na yinzo ya mfumu ya nge? 9 Kana beno kuzwa mbungu yina na mosi na kati na beto, beno kufwa yandi! Mpe beto bayina ke bikana, beno ke kumisa beto bandongo ya nge mfumu ya beto.» 10 Ntwadisi ya yinzo ya Yosefi vutulaka: «Ya kusalama mutindu beno me zonza. Kasi beno zaba ti, na yandi yina beto ke kuzwa mbungu yango, yandi zaba ti yandi ke kuma mundongo ya beto, kasi ba ya nkaka ke vwanda kimpwanza.» 11 Na mbangu mosi-mosi tulaka saki ya yandi na ntoto mpe fungulaka yawu. 12 Ntwadisi ya yinzo ya Yosefi sosaka na basaki ya bawu nyonso, kubanda na saki ya yaya ya ntete mpe yandi sukaka na saki ya leki. Kasi mbungu talanaka na saki ya Bezame. 13 Dyambu yina salaka bampangi ya Yosefi kyadi, mpe bawu pasulaka bilele ya bawu. Mosi-mosi vutulaka saki ya yandi na zulu ya mbuluku mpe bawu vutukaka na mbanza.

Yuda nwaninaka leki ya yandi Bezame

14 Yuda na bampangi ya yandi kumaka na yinzo ya Yosefi. Yosefi vwandaka ntete kuna na yinzo. Bawu fukamaka kizizi na ntoto na ntwala ya yandi. 15 Yosefi tubaka na bawu: «Yina wapi mambu beno me sala? Beno zaba ve ti muntu mutindu munu kele na lulendo ya kuzaba mambu yina ke kwiza?» 16 Yuda vutulaka: «Mfumu ya munu, yinki beto lenda zonza? Wapi dyambu beto lenda tuba dyaka na kuzwa mpemba na meso ya nge? Yawu ti Nzambi me talisa yimbi ya beto na mpwasa. Beto bawu yayi mindongo ya nge, na yandi yina vwandaka na mbungu yango.» 17 Yosefi vutulaka: «Ve! mu lenda sala mutindu yina ve. Kaka yandi yina vwandaka na mbungu muntu ke vwanda mundongo ya munu. Kasi samu na beno, beno lenda vutuka na kizunu na sika ya tata ya beno.»

18 Yuda kwendaka pene-pene ya Yosefi mpe tubaka na yandi: «Lemvokila munu mfumu ya munu, pesa munu kisadi ya nge luve ya kuzabisa nge mwa dyambu mosi. Kasi kudasukila munu ve kisadi ya nge. Mu zaba ti nge kele kwandi mutindu Falawo. 19 Mfumu ya beto, nge yufulaka beto bisadi ya nge kana beto kele na tata to leki ya nkaka. 20 Beto vutulaka na mfumu ya munu ti: “Beto kele na tata ya kiboba, na mwana yina yandi butaka na bununu ya yandi. Tata ya beto ke zolaka yandi mingi samu ti yandi me bikanaka yandi mosi na kivumu ya mama ya yandi. Yaya ya yandi kufwaka.” 21 Nge zonzaka na beto: “Beno natina munu yandi, mu kele na nsatu ya kutala yandi.” 22 Beto vutulaka na nge mfumu ti: “Mwana yina lenda bika ve tata ya yandi, samu ti tata ya yandi lenda kufwa kana mwana yina bika yandi.” 23 Nge zonzaka na beto: “Kana beno kwiza ve na leki ya beno, beno zaba ti mu ke yamba dyaka beno ve.” 24 Mpe na ntangu beto vutukaka na sika ya tata ya beto kisadi ya nge, beto kumisilaka yandi nyonso yina nge mfumu ya beto nge zonzaka na beto. 25 Mpe ntangu yandi zabisaka na beto na kuvutuka kwaku samu na kusumba mwa ndambu ya bima ya kudya, 26 beto vutulaka na yandi ti: “Ve! beto lenda vutuka kuna ve. Kana leki ya beto kwenda na beto, kuna beto lenda vutuka. Samu ti mfumu ke yamba beto ve kana leki ya beto kuvwanda na beto ve.” 27 Tata ya beto, kisadi ya nge, tubaka na beto: “Beno me zaba ti, kento ya munu Lasele butilaka munu kaka bana zole. 28 Mosi me zimbanaka, mpe mu banza ti ba kudyaka yandi na kibulu ya nsisi, samu ti mu ke talaka dyaka yandi ve. 29 Mpe beno zola baka dyaka yandi yayi me bikanaka na munu! Kana dyambu ya yimbi kukumina yandi, beno zaba ti mu ke kufwa na manyongo nyonso, mpe lufwa ya munu ke tangimina na bayintu ya beno.” 30 Na yina, wapi mutindu mu lenda vutuka na sika ya tata ya munu kana mwana yayi kele ve na beto? Luzingu ya yandi kele ya kukangama na mwana yayi. 31 Kana yandi tala mwana yayi ve, yandi ke kufwa na manyongo nyonso. Mpe lufwa ya yandi ke tangimina na bayintu ya beto. 32 Dyaka na ntwala ya tata mu ndimaka kizitu ya mwana na yintu ya munu. Mu tubaka ti kana mu vutuka ve na yandi mu ke futa masumu na ntwala ya tata ya munu luzingu ya munu nyonso. 33 Lemvokila munu, bika ti munu kisadi ya nge, mu bikana kwaku na kisika ya mwana yayi mutindu mundongo ya nge mfumu ya munu. Samu ti yandi kuvutuka na sika ya tata kintwadi na bayaya ya yandi. 34 Mu lenda vutuka ve na sika ya tata ya munu kana mwana yayi kele ve na munu. Samu ti mu zola ve kutala na meso yimbi yina ke kumina tata ya munu.»