Yakobi fidisaka bana ya yandi na Ngipiti
42
Yakobi kuwaka ti bambuma ya faline kele na yinsi ya Ngipiti, yandi tubaka na bana ya yandi: «Samu na yinki beno me vwanda awa na kutalasanaka kaka? 2 Mu me kuwa ti bambuma ya faline kele na Ngipiti. Beno kwenda kuna, mpe beno sumbila beto yawu, samu ti beto kuzinga, mpe beto kufwa ve na nsatu.» 3 Na yina, kumi ya bampangi ya Yosefi kwendaka sumba bambuma ya faline na Ngipiti. 4 Kasi Yakobi fidisaka ve Bezame, leki ya Yosefi, kukwenda na bampangi ya yandi. Samu ti yandi tubaka: «Mu kele na boma ti dyambu ya yimbi kukumina yandi.» 5 Bana ya Isayeli kwizaka sumba bambuma ya faline na Ngipiti, nzila mosi na bisumbi ya nkaka yina vwandaka kwenda kuna. Samu ti nsatu ya ngolo vwandaka na yinsi ya Kaana.Yosefi talisaka bampangi ya yandi mpasi
6 Yosefi vwandaka mfumu ya nene na yinsi ya Ngipiti. Ni yandi muntu vwandaka twadisa ntekolo ya bambuma ya faline na bantu nyonso ya yinsi. Bampangi ya Yosefi kwizaka fukama kizizi na ntoto na ntwala ya Yosefi. 7 Yosefi talaka bampangi ya yandi, mpe zabaka bawu. Yandi salaka ti bampangi ya yandi kuzaba yandi ve. Yandi vwandaka zonzila bawu na ngolo nyonso: «Wapi sika beno me katuka?» Bawu vutulaka: «Beto me katuka na yinsi ya Kaana, mpe beto me kwiza sumba bima ya kudya.»
8 Yosefi zabaka bawu, kasi bawu vwandaka zaba dyaka yandi ve. 9 Yosefi bambukaka moyo na bandosi yina yandi lotaka samu na bawu. Mpe yandi tubaka na bawu: «Beno kele bambeni yina me kwiza samu na kuzaba lebakana ya yinsi ya beto.» 10 Bawu vutulaka: «Ve mfumu ya munu! Bisadi ya nge me kwiza kaka na kusumba bima ya kudya. 11 Beto nyonso kele bana ya tata mosi, mpe beto kele ya kudedama. Bisadi ya nge kele ve bambeni yina me kwiza samu na kuzaba wapi mutindu beto lenda dyata kimfumu ya yinsi ya beno.» 12 Yosefi vutulaka: «Ve! luvunu! Beno me kwiza samu na kusosa kuzaba lebakani ya yinsi ya beto.» 13 Bawu tubaka dyaka: «Beto bisadi ya nge kele kumi na zole, bana ya tata mosi na yinsi ya Kaana. Bubu yayi leki ya beto kele na tata ya beto, mpangi ya beto mosi kufwaka.» 14 Yosefi vutulaka: «Ni yina mu zabisaka beno, ti beno kele bambeni. 15 Tala mutindu ke vwandila ntotolo ya beno: Ya tsyelika na nkumbu ya falawo, beno ke basika ve na yinsi yayi tekila leki ya beno kwiza kwaku. 16 Beno fidisa mosi na kati ya beno na kukwenda kubaka yandi, mpe ba ya nkaka ke bikana na boloko. Ni kuna mu ke zaba kana yina beno me zonza na munu kele ya tsyelika. Kana ya kele mutindu yina ve, na nkumbu ya falawo beno kele ya tsyelika bambeni.»
17 Mpe Yosefi tulaka bawu nyonso na boloko bilumbu tatu. 18 Na kilumbu ya tatu, Yosefi tubaka na bawu: «Tala mutindu beno ke sala, samu na kuvwanda moyo. Mu ke zitisaka Nzambi. 19 Kana beno kele bantu ya kudedama, beno ndima ti mosi na beno kubikana na boloko yayi beno kele. Ba ya nkaka kunata bambuma ya faline na makanda ya beno, yina kele na kufwa nsatu. 20 Mpe beno natina munu leki ya beno. Ni kuna mu ke zaba ti yina beno me tuba kele ya tsyelika, mpe beno ke kufwa ve.» Ni mutindu yina bawu salaka. 21 Bawu zonzasanaka: «Ya tsyelika! Beto me kuzwa masembo samu na mpangi ya beto. Beto talaka mpasi ya yandi na ntangu yandi vwandaka lomba beto mulemvo, kasi beto kuwilaka yandi ve. Ni yawu yina mpasi yayi kele na kukuminaka beto.» 22 Mpe Lubene vutulaka na bawu: «Mu zabisaka beno ti: “Beno sala ve yimbi na mwana yayi”, kasi beno kuwilaka munu ve. Awa beto kele na kufuta masumu ya lufwa ya yandi.» 23 Bawu zabaka ve ti Yosefi vwandaka kuwa mambu yina bawu vwandaka zonza. Samu ti ya vwandaka na kibangudi yina vwandaka sadisa bawu na kuzonza na Yosefi. 24 Yosefi bikaka bawu mpe kwendaka dila na kinsweki.
Bana ya Yakobi vutukaka na Kaana
Ntangu Yosefi vutukilaka bawu, yandi zonzaka na bawu ti yandi ke kanga Simewone, mpe yandi kangaka yandi na meso ya bawu. 25 Na manima, Yosefi pesaka ntumunu na bisadi ya yandi na kufulusa basaki ya bawu na bambuma ya faline, mpe na kuvutula mbongo ya mosi-mosi na saki ya yandi. Yandi pesa mpe bawu madya ya kudya na nzila. Ni mutindu yina ba salaka samu na bawu. 26 Bawu tulaka basaki ya madya ya bawu na zulu ya bambuluku ya bawu, mpe bawu kwendaka.
27 Ntangu bawu kumaka na sika ya kulutisa mpimpa, mosi na bawu zibulaka saki ya yandi samu na kupesa madya na mbuluku ya yandi, mpe yandi talaka mbongo ya yandi na kati ya saki. 28 Yandi tubaka na bampangi ya yandi: «Ba me vutula mbongo ya munu, yawu yayi na kati ya saki ya munu!» Bawu pamukaka mpe boma kuzwaka bawu. Bawu zonzasanaka: «Yayi yinki Nzambi me sala beto?»
29 Ntangu bawu kumaka na sika ya tata ya bawu Yakobi na yinsi ya Kaana, bawu zonzaka na yandi mambu nyonso yina kuminaka bawu. Bawu tubaka: 30 «Muntu yina kele mfumu ya yinsi me zonzila beto na ngolo nyonso. Yandi me zonza ti beto kele bambeni yina me kwiza samu na kuzaba lebakana ya yinsi ya beto. 31 Beto vutulaka na yandi: “Beto kele ve bambeni, kasi bantu ya kudedama. 32 Beto vwandaka kumi na zole, bana ya tata mosi. Mpangi ya beto mosi kufwaka, bubu yayi leki ya beto kele na tata ya beto na yinsi ya Kaana.” 33 Muntu yango, mfumu ya yinsi, tubaka na beto mutindu yayi: “Beno bikila munu mpangi ya beno mosi, ni kuna mu ke zaba kana beno kele ya kudedama. Mpe beno baka yina me fwanana, samu na kunatina makanda ya beno yina kele na kufwa nsatu. 34 Na yina beno natina munu leki ya beno, ni kuna mu ke zaba ti beno kele ve bambeni, kasi bantu ya kudedama. Na manima mu ke vutula mpangi ya beno, mpe mu ke bika beno kusala mumbungu na yinsi ya munu mutindu beno zola.”»
35 Bawu vwandaka basisa madya na basaki ya bawu. Mpe na saki ya konso muntu, vwandaka saki ya fyoti ya mbongo ya yandi. Ntangu bawu talaka mbongo yango, bawu kuzwaka boma na Yakobi tata ya bawu. 36 Mpe tata ya bawu Yakobi tubaka na bawu: «Beno me zimbisa munu bana zole: Yosefi na Simewone kele dyaka ve. Mpe beno zola baka dyaka munu Bezame! Ni na munu nyonso yayi kele na kubwa!» 37 Lubene tubaka na tata ya yandi: «Nge lenda kufwa bana ya munu zole, kana mu vutula ve Bezame. Pesa yandi na maboko ya munu, mpe mu ke vutula yandi na sika ya nge.» 38 Yakobi vutulaka: «Ve! mwana ya munu ke kwenda na beno ve. Yaya ya yandi me kufwa, yandi kaka me bikana na munu. Mu me kuma kiboba, kana dyambu ya yimbi kumina yandi na nzila, mu ke kufwa na manyongo samu na beno.»