Mbandukulu 41

Bandosi ya Falawo

Na manima ya bamvula zole, Falawo lotaka ndosi. Yandi vwandaka na lweka ya nzadi ya Nile. 2 Yandi talaka bangombe sambwadi ya kento ya kitoko mpe ya mafuta, vwandaka basika na kati ya nzadi, mpe bandaka kudya matiti yina vwandaka pene-pene ya nzadi ya Nile. 3 Na manima, bangombe sambwadi ya kento ya nkaka ya yimbi mpe ya kukonda vwandaka basika na kati ya nzadi, mpe kwizaka vwanda pene-pene ya bangombe yina ya ntete na lweka ya nzadi ya Nile. 4 Bangombe yina ya yimbi na ya kukonda kudyaka bangombe ya mafuta. Ni na ntangu yina Falawo vumbukaka.

5 Yandi lalaka dyaka, mpe yandi lotaka ndosi ya zole. Yandi talaka bayintu sambwadi ya bambuma ya faline, ya nene mpe ya kitoko, basikaka na kititi kaka mosi ya mbuma ya faline. 6 Na manima yandi talaka mpe bayintu sambwadi dyaka basikaka. Yawu vwandaka ya kukonda mpe ya kuyuma na mupepe yina ke katukaka na yinsi ya kuyuma. 7 Bayintu sambwadi ya kukonda minaka bayintu sambwadi ya bambuma ya faline ya nene mpe ya mbote. Na yina, Falawo vumbukaka mpe bakulaka ti yandi lotaka ndosi.

8 Na suka, ntima ya Falawo vwandaka ya kuvusuka, mpe yandi tumisaka ba bokila banganga na bantu nyonso ya mayele ya Ngipiti. Yandi zabisaka bawu bandosi ya yandi, kasi ata muntu mosi lendaka kubangudila yandi yawu. 9 Na yina, mfumu yina vwandaka na kisalu ya kutudilaka ntinu malafu zabisaka na Falawo: «Mfumu, mu zola kufungula masumu ya munu bubu yayi. 10 Kilumbu mosi, nge dasukilaka munu na mfumu ya kuyoka mampa, mpe nge tulaka beto na boloko na yisi ya lutumu ya kuluntu ya binwani. 11 Beto lotaka bandosi na mpimpa kaka mosi. Ndosi na ndosi na mbangululu ya yawu. 12 Na kati ya boloko vwandaka na beto, ntwenya mosi ya mundongo ya mu-Ebelewo, yandi vwandaka sadila kuluntu ya boloko. Beto zonzilaka yandi bandosi ya beto, mpe yandi pesaka na konso ndosi mbangululu ya yawu. 13 Mambu nyonso salamaka kaka mutindu yandi zonzaka. Ba vutulaka munu na kisalu ya munu, mpe ba lelikaka mfumu ya kuyoka mampa.»

Yosefi bangulaka bandosi ya Falawo

14 Falawo tumisaka ba bokila Yosefi. Na nswalu ba kwendaka basisa yandi na boloko. Ba katulaka mandefo ya yandi, mpe ba vwatisaka yandi kinkuti ya nkaka. Mpe yandi kwendaka na ntwala ya Falawo. 15 Falawo zonzaka na Yosefi: «Mu me lota ndosi, kasi muntu yikele ve na kubangula yawu. Ba me zabisa munu ti nge lenda bangula bandosi yina ba ke samunaka nge.» 16 Yosefi vutulaka na Falawo mpe zonzaka: «Ni munu ve. Ni Nzambi muntu lenda pesa nge mvutu ya mbote.» 17 Falawo tubaka na Yosefi: «Mu lotaka ndosi. Ya vwandaka mutindu yayi: “Mu telamaka na lweka ya nzadi ya Nile. 18 Mu talaka bangombe ya kento sambwadi ya kitoko mpe ya mafuta, yina vwandaka basika na kati ya nzadi, mpe bandaka kudya matiti yina vwandaka pene-pene ya nzadi ya Nile. 19 Mpe bangombe sambwadi ya nkaka ya nzutu fyoti, ya kukonda, mpe ya yimbi, vwandaka basika na kati ya nzadi, mpe kwizaka vwanda pene-pene ya bangombe yina ya ntete. Na bunu mu tala bangombe ya mutindu yayi na yinsi nyonso ya Ngipiti. 20 Bangombe ya kukonda kudyaka bangombe ya mafuta. 21 Kasi yina ba kudyaka bawu, ata kima mosi lakisa ti ba me kudya bawu. Bangombe ya nzutu fyoti vwandaka kaka ya yimbi mutindu bawu vwandaka ntete. Ni na ntangu yina mu vumbukaka. 22 Mu talaka dyaka na ndosi, bayintu sambwadi ya bambuma ya faline, ya nene mpe ya kitoko, yina basikaka na kititi kaka mosi. 23 Mpe mu talaka bayintu sambwadi dyaka basikaka. Yawu vwandaka ya kukonda mpe ya kuyuma na mupepe yina ke katukaka na yinsi ya kuyuma. 24 Bayintu sambwadi ya bambuma ya faline yina ya kukonda minaka bayintu sambwadi ya mbote. Mu zabisaka bandosi yango na banganga, kasi ata muntu mosi lendaka bangudila munu yawu.» 25 Yosefi tubaka na Falawo: «Bandosi nyonso zole kele na mbangululu kaka mosi. Nzambi ke na kulakisa na Falawo mambu yandi ke sala. 26 Bangombe sambwadi ya mbote mpe bayintu sambwadi ya bambuma ya faline ya mbote, ke na kulakisa bamvula sambwadi. Yawu kele kwandi ndosi mosi. 27 Bangombe sambwadi ya kukonda na ya yimbi mpe bayintu sambwadi ya kukonda na mupepe yina ke katukaka na yinsi ya kuyuma, ke na kulakisa bamvula sambwadi ya nsatu ya ngolo. 28 Yawu kele mutindu mu me zonza na nge: Nzambi me zabisa nge mambu yina yandi ke sala. 29 Na bamvula sambwadi ke kwiza, madya ke vwanda mingi na bwala nyonso ya Ngipiti. 30 Na manima, ke kwiza bamvula sambwadi ya nsatu ya ngolo, mpe kwaku na Ngipiti bantu ke zimbana bamvula sambwadi yina ya madya ya mingi. Nsatu ya ngolo ke bebisa bwala. 31 Bantu ke zimbana bamvula sambwadi ya madya ya mingi, samu ti nsatu ke vwanda ngolo mingi. 32 Kana ndosi yango kwizaka mbala zole na Falawo, ya kele ti ni Nzambi muntu kuzwaka nzengolo, mpe yandi ke lungisa yawu na mbangu mingi. 33 Na ntangu yayi, bika Falawo kusoola muntu mosi ya mayela mpe ya ndwenga, mpe yandi pesa yandi luyalu ya yinsi ya Ngipiti. 34 Bika Falawo kutula bamfumu ya fyoti na yinsi. Bawu kukatulaka ndambu ya tanu, ya babima nyonso yina ntoto ya Ngipiti ke pesa mutindu madya na bamvula sambwadi ya madya ya mingi. 35 Bawu kuyonzika madya nyonso ya bamvula sambwadi yina ya mbote ke kwiza. Bawu kubumba bambuma ya faline, mpe bima ya kudya na babwala, na lutumu ya Falawo. 36 Yawu ke vwanda madya ke bumbama samu na yinsi na bamvula sambwadi ya nsatu ya ngolo yina kele na kukwiza na Ngipiti. Na yina, nsatu ke bebisa bwala ve.»

Yosefi kumaka mfumu na Ngipiti.

37 Malongi ya Yosefi talanaka ya mbote na Falawo, mpe na bisadi ya yandi nyonso. 38 Falawo zonzaka na bawu: «Muntu yayi kele ya kufuluka na mpeve ya Nzambi. Wapi kisika beto lenda kuzwa muntu ya nkaka mutindu yandi?» 39 Falawo tubaka na Yosefi: «Samu ti Nzambi me zabisa na nge mambu nyonso yina, muntu ya nkaka ya mayela mpe ya ndwenga mutindu nge yikele ve! 40 Ni nge ke vwanda mfumu ya yinzo ya munu, mpe bantu ya munu nyonso ke zitisa nge. Mu ke lutila nge kaka na buntinu ya munu. 41 Na ntangu yayi mu me pesa nge luyalu ya Ngipiti nyonso.» 42 Falawo katulaka mulunga ya kinyemo ya kintinu na musapi ya yandi, mpe tulaka yawu na musapi ya Yosefi. Yandi vwatisaka Yosefi balele ya lino, mpe tulaka yandi musanga ya wolo na laka. 43 Yandi yulukisaka Yosefi na kinatunu ya ntinu ya yandi ya zole, mpe lookaka na mantwala ya yandi: «Beno lutisa!» Ni mutindu yayi Falawo pesaka yandi luyalu ya Ngipiti nyonso.

44 Falawo zonzaka dyaka na Yosefi: «Munu kele Falawo. kasi na yinsi nyonso ya Ngipiti, muntu yikele ve yina lenda nanguna diboko ya yandi to dikulu ya yandi kana nge me pesa yandi ve luve.» 45 Mpe Falawo pesaka na Yosefi nkumbu ya Safanate-Paneya, mpe pesaka yandi kento Asenate mwana ya Poti-Fela, nganga-Nzambi ya mbanza One. Yosefi salaka nzyetolo ya luyalu na yinsi nyonso ya Ngipiti. 46 Yosefi vwandaka na bamvula makumi tatu na ntangu ba nataka yandi na Falawo, ntinu ya Ngipiti. Yosefi bikaka Falawo, mpe kwendaka tambula bwala nyonso ya Ngipiti.

47 Na ntangu ya bamvula sambwadi ya madya mingi, ntoto pesaka madya mingi. 48 Yosefi yonzikaka madya nyonso na bamvula sambwadi yina landilaka na yinsi ya Ngipiti. Yandi bumbaka madya yango na kati ya babwala. Na bwala mosi-mosi, yandi bumbaka madya yina katukaka na bilanga ya pene-pene. 49 Yosefi bumbaka bambuma ya faline mingi. Yawu vwandaka mingi mutindu munyenge ya mubu, mpe ba bikaka kwandi kutanga dyaka yawu. Samu ti ba lendaka kutanga yawu ve.

50 Tekila mvula yina nsatu bandaka, Asenate kento ya Yosefi butaka bana zole. Asenate vwandaka mwana ya Poti-Fela, nganga-nzambi ya mbanza One. 51 Yosefi pesaka nkumbu na mwana ya ntete Manase, mpe yandi tubaka: «Nzambi me sala ti mu zimbana bampasi ya munu nyonso na dikanda nyonso ya tata ya munu.» 52 Yandi pesaka na mwana ya zole nkumbu Efalayime, mpe yandi tubaka: «Nzambi me pesa munu bana na bwala yina mu vwandaka tala mpasi mingi.»

53 Bamvula sambwadi ya madya ya mingi kwizaka manisa na Ngipiti. 54 Mpe bamvula sambwadi ya nsatu ya ngolo kwizaka banda, mutindu Yosefi zonzaka. Nsatu ya ngolo vwandaka na bayinsi nyonso, kasi na Ngipiti nyonso madya vwandaka. 55 Ntangu bantu nyonso ya Ngipiti bandaka kutala nsatu, bawu lookaka na Falawo yandi pesa bawu madya. Falawo vutulaka na bantu nyonso ya Ngipiti: «Beno kwenda tala Yosefi. Beno sala mutindu yandi ke zabisa beno.» 56 Na ntangu nsatu ya ngolo yalaka yinsi nyonso, Yosefi zibulaka bayinzo yina ba bumbaka madya, samu na kutekisa mbuma ya faline na bantu ya Ngipiti. Nsatu kumaka mingi na yinsi ya Ngipiti. 57 Bantu ya bayinsi nyonso vwandaka kwiza na Ngipiti na kusumba madya na Yosefi, samu ti nsatu vwandaka na yinza ya muvimba.