40
Na manima ya mambu yina, mfumu yina vwandaka na kisalu ya kutudilaka ntinu malafu na mfumu yina vwandaka na kisalu ya kuyokilaka ntinu mampa, bawu salaka disumu na ntwala ya Mfumu ya bawu, ntinu ya Ngipiti. 2 Falawo ntinu ya Ngipiti, dasukaka na bawu zole. 3 Yandi kangisaka bawu mpe tulaka bawu na kati ya boloko yina vwandaka twadisa kuluntu ya boloko. Ni boloko yina vwandaka Yosefi. 4 Mfumu ya boloko pesaka bawu Yosefi mutindu kisadi samu na kusadilaka bawu. Bawu zingilaka mwa mingi na boloko.Yosefi bangulaka bandosi ya bankole zole
5 Kilumbu mosi na mpimpa, kuna na boloko, kuluntu ya malafu na mfumu ya kuyoka mampa ya ntinu ya Ngipiti, bawu zole lotaka bandosi. Ndosi na ndosi vwandaka na mbangululu ya yawu. 6 Na suka, Yosefi kwizaka tala bawu, mpe yandi kutaka bawu na kati ya manyongo. 7 Yandi yufulaka bawu: «Samu na yinki beno kele na manyongo bubu yayi?» 8 Bawu vutulaka: «Mosi na mosi na beto me taambula ndosi, kasi muntu kele ve, yina ke bangudila beto yawu.» Yosefi vutulaka na bawu: «Nzambi kaka muntu lenda bangula bandosi. Mu me lomba na beno na kuzonzila munu bandosi ya beno.»
9 Kuluntu ya malafu tubaka ndosi ya yandi na Yosefi. Yandi zonzaka: «Na ndosi ya munu, mu talaka yinti ya vinu vwandaka na ntwala ya munu. 10 Yinti yina vwandaka na bintala tatu. Yina yawu basisaka makasa ya malu-malu, bifulu ya yawu basikaka, mpe yawu butaka bambuma ya vinu ya mbwaki. 11 Mu vwandaka na mbungu ya Falawo na diboko. Mu bukaka bambuma ya vinu, mu kamunaka yawu na kati ya mbungu, mpe mu pesaka yawu na Falawo.» 12 Yosefi vutulaka na yandi: «Tala mutindu kele mbangululu ya ndosi ya nge: Bintala tatu ke na kulakisa bilumbu tatu. 13 Na manima ya bilumbu tatu, Falawo ke vumbula yintu ya nge. Yandi ke vutudila nge kisalu ya nge, mpe nge ke banda kupesaka dyaka yandi mbungu, mutindu nge vwandaka sadila yandi na ntangu yina me luta. 14 Ntangu mambu nyonso ke vwanda mbote samu na nge, bambuka moyo ti mu vwandaka na nge. Sadisa munu na kuzonzila munu na Falawo, samu ti yandi basisa munu na boloko yayi. 15 Ba katulaka munu na ngolo nyonso na yinsi ya ba-Ebelewo, mpe awa mu me sala dyambu ya yimbi ve samu ti ba tula munu na boloko.»
16 Ntangu mfumu ya kuyoka mampa kuwaka ti Yosefi bangulaka ndosi ya mpangi ya yandi mbote, yandi zonzaka na yandi: «Munu mpe mu lotaka mutindu yayi: mu vwandaka nata bitunga tatu ya mampa na zulu ya yintu. 17 Kitunga ya zulu vwandaka na mampa ya mutindu na mutindu yina Falawo ke zolaka, kasi bandeke vwandaka kwiza kudya yawu na kati ya kitunga, na zulu ya yintu ya munu.» 18 Yosefi vutulaka na yandi: «Tala mutindu kele ndosi ya nge. Bitunga tatu ke na kulakisa bilumbu tatu. 19 Na manima ya bilumbu tatu, Falawo ke katula yintu ya nge na nzutu. Ba ke lelika nzutu ya nge na yinti, mpe bandeke ke kwiza doda yawu.»
20 Bilumbu tatu lutaka, Falawo sadisaka mukembo ya mbutukulu ya yandi. Yandi salaka mukembo ya nene, mpe bokilaka bantu nyonso yina ke zungidilaka yandi. Na ntwala ya bawu, yandi vumbulaka yintu ya mfumu ya malafu, na ya mfumu ya kuyoka mampa. 21 Yandi vutulaka mfumu ya malafu na kisalu ya yandi, samu na kupesaka dyaka mbungu na maboko ya Falawo. 22 Kasi yandi lelikaka mfumu ya kuyoka mampa. Yawu salamaka mutindu Yosefi bangulaka. 23 Kasi, mfumu ya malafu bambukilaka Yosefi moyo ve, mpe zimbanaka yandi.