Nzambi tontaka kiminu ya Abalami
22
Na manima ya mambu yina, Nzambi tontaka Abalami. Nzambi zonzaka na yandi: «Abalami!» Abalami vutulaka: «Munu yandi yayi.» 2 Nzambi tubaka: «Baka mwana ya nge Isaake, mwana ya nge mosi kaka yina nge ke zolaka mingi. Kwenda na yandi na yinsi ya Moliya mpe kuna nge ke pesa yandi mutindu munkayulu, na mongo yina mu ke lakisa nge.»3 Na suka-suka, Abalami kubikaka mbuluku ya yandi mpe yandi kwendaka na bisadi zole, na mwana ya yandi Isaake. Yandi zengaka bankuni ya kuyokila munkayulu, mpe yandi kwendaka na kisika yina Nzambi tubaka na yandi. 4 Na kilumbu ya tatu, Abalami talaka mongo yina na ntama. 5 Abalami tubaka na bisadi ya yandi: «Beno vwanda awa na mbuluku. Munu na mwana, beto ke kwenda kuna na kusambila Nzambi. Na manima, beto ke vutukila beno.»
6 Abalami bakaka bankuni ya kuyokila Munkayulu, mpe yandi tulaka yawu na yintu ya mwana ya yandi Isaake. Yandi mosi bakaka tiya na mbele. Na ntangu bawu zole vwandaka tambula, 7 Isaake bokilaka tata ya yandi mpe tubaka: «Tata!» Abalami vutulaka: «Ee, mwana ya munu.» Isaake yufulaka yandi: «Beto kele awa na tiya mpe na bankuni, kasi wapi sika kele dimeme ya munkayulu?» 8 Abalami vutulaka: «Mwana ya munu, Nzambi yandi mosi ke tala dimeme yina yandi ke pesa samu na munkayulu.» Na manima bawu nyonso zole tatamanaka na kulanda nzila ya bawu.
9 Na ntangu bawu kumaka na kisika yina Nzambi lakisaka yandi, Abalami yidikaka kiyokolo ya munkayulu, mpe yandi tulaka bankuni na zulu ya yawu. Yandi kangaka mwana ya yandi Isaake basinga, mpe tulaka yandi na zulu ya bankuni na kiyokolo ya munkayulu. 10 Na manima, Abalami bakaka mbele mpe nangunaka diboko na kufwa mwana ya yandi. 11 Kasi mbazi ya Yave bokilaka Abalami katuka na dizulu mpe tubaka: «Abalami, Abalami!» Abalami vutulaka: «Munu yandi yayi.» 12 Mbazi ya Yave tubaka: «Kufwa ve mwana, mpe kusala yandi dyambu mosi ya yimbi ve. Ntangu yayi mu me zaba ti, nge ke zitisaka Nzambi, samu ti nge me manga ve na kupesa munu mwana ya nge kaka mosi.»
13 Abalami vumbulaka yintu, mpe yandi talaka dimeme mosi ya mbakala, yina vwandaka na mampoka ya kukangama na kati-kati ya mwa bayinti. Abalami kwendaka baka dimeme yango mpe yandi pesa yawu mutindu munkayulu ya kuyoka, na kisika ya mwana ya yandi. 14 Abalami pesaka kisika yina nkumbu: "Yave ke tala". Ni yawu yina, bantu ke tubaka bubu yayi ti: «Na zulu ya mongo Yave ke talanaka.»
15 Katuka na dizulu, mbazi ya Yave bokilaka Abalami na mbala ya zole 16 mpe tubaka: «Mu me kudya ndefi na nkumbu ya munu mosi. Samu ti nge me sala dyambu ya mutindu yina, na kuyimina ve munu mwana ya nge kaka mosi, munu Yave ke na kutuba, 17 mu ke sakumuna nge, mu ke funisa dikanda ya nge samu ti yawu kuma bantu mingi mutindu bambwetete ya dizulu mpe munyenge ya kumu ya mubu. Bantu ke butuka na dikanda ya nge ke baka bambanza ya mitantu ya bawu. 18 Samu na bawu, mu ke sakumuna bayinsi nyonso ya ntoto, samu ti nge me tumama na munu.» 19 Abalami vutukaka na kisika yina bikanaka bisadi ya yandi. Bawu nyonso kwendaka na bwala ya Beele-Seba, sika yina Abalami vwandaka zinga.
Bana ya Nawole
20 Na manima ya mambu yina, Abalami kuwaka ti, Mileka mpe butaka bana na Nawole, mpangi ya nge. 21 Mwana ya ntete ni Wuse. Baleki ya Wuse ni Buze mpe Kemwele, tata ya Alame, 22 Kesede, Azo, Piledase, Yidelafe, Betwele. 23 Yina ni bana nana yina Mileka butaka na Nawole, mpangi ya Abalami. Betwele ni tata ya Lebeka. 24 Nawole vwandaka na dikangu, nkumbu ya yandi Lewuma. Kento yina mpe butaka bana. Bana yina ni: Teba, Ngayame, Tayase na Maaka.