Abalami sumbaka ndyamu samu na Saala
23
Saala zingaka bamvula nkama na makumi zole na sambwadi. 2 Yandi kufwaka na yinsi ya Kaana, na Kilyate-Aleba, yina ba ke bokilaka mpe Ebelone. Abalami dilaka Saala mpe yandi salaka kivwandu ya lufwa ya yandi. 3 Abalami bikaka nzutu ya kento ya yandi, mpe yandi kwendaka tala ba-Ete, yandi tubaka na bawu: 4 «Mu kele nzenza, mpe mu ke kaka na mwa bilumbu na kati-kati ya beno. Beno pesa munu kisika yina ke vwanda ya munu mosi samu na kukunda kento ya munu yina me bika munu.» 5 Ba-Ete vutulaka na Abalami mutindu yayi: 6 «Mfumu ya beto, kuwa beto. Nge kele mfumu yina Nzambi me sakumuna na kati-kati ya beto. Kunda kento ya nge na kisika yina me lutila kitoko na kati ya bandyamu ya beto. Ata muntu na beto lenda yimina nge ndyamu ya yandi samu na kukunda kento ya nge.»7 Abalami telamaka mpe fukama na mantwala ya ba-Ete, bantu ya yinsi. 8 Yandi tubaka na bawu mutindu yayi: «Kana ya tsyelika beno me ndima ti mu kunda kento ya munu awa, beno zonzila samu na munu na sika ya Efelone, mwana ya Sowale. 9 Beno tuba na yandi, samu ti yandi pesa munu ntadi ya yandi ya Makepela, yina kele na nsuka ya bilanga ya yandi. Yandi tekisa munu yawu na ntalu ya yawu na meso ya beno, samu ti yawu kuvwanda kisika ya munu ya kukundaka bantu ya dikanda ya munu.» 10 Efelone, mu-Iti, vwandaka ya kuvwanda na kati-kati ya ba-Iti. Yandi vutulaka na Abalami na meso ya ba-Iti nyonso yina kwizaka na mwelo ya mbanza, yandi tubaka: 11 «Ve, mfumu ya munu, kuwa munu. Mu me pesa nge bilanga na ntadi yina ke kuna. Mu me pesa nge yawu na meso ya bantu ya yinsi ya munu. Kunda kento ya nge.»
12 Na yina, Abalami fukamaka na mantwala ya bantu nyonso ya yinsi. 13 Na meso ya bantu nyonso, Abalami zonzaka na Efelone mutindu yayi: «Mu zola ti nge kuwa munu. Mu ke pesa nge ntalu ya mbongo ya bilanga yina. Ndima ti mu pesa nge yawu mpe na manima, mu ke kunda kento ya munu kuna.» 14 Kasi Efelone vutulaka na Abalami mutindu yayi: 15 «Mfumu ya munu, kuwa munu! Ntoto ya bankama yiya ya mbongo ya bisengo, yawu kele yinki na meso ya nge na munu? Kunda kento ya nge!»
16 Abalami ndimaka mpe yandi tezaka bankama yiya ya mbongo ya bisengo na meso ya bana ya Ete, mutindu lombaka Efelone. Yandi tezaka mbongo yina na mutindu bantu vwandaka sadila samu na kusumba mpe kutekisa na yinsi yina. 17 Bilanga ya Efelone, yina kele na Makepela, na kisika yina ke talasanaka na Mamele, bilanga nyonso na ntadi yina kele na kati, na bayinti nyonso mpe, 18 ya kumaka mvwilu ya Abalami na meso ya bana ya Ete mpe ya bantu nyonso yina kwizaka na mwelo ya mbanza.
19 Na manima, Abalami kundaka kento ya yandi Saala na yinsi ya Kaana, na ntadi yina kele na kati ya bilanga ya Makepela, na kisika yina ke talasanaka na Mamele, yina ba ke bokilaka mpe Ebelone. 20 Bilanga na ntadi yina vwandaka na kati vwandaka dyaka ve ya bana ya Ete. Yawu kumaka mvwilu ya Abalami, samu na kukundaka bantu ya yandi.