Mbutukulu ya Isaake
21
Yave lakisaka bumbote ya yandi na Saala mutindu yandi zonzaka na yandi. Yandi lungisilaka mambu nyonso yina yandi salaka Saala nsilulu. 2 Saala kuzwaka kivumu na ntangu Abalami vwandaka me kuma kiboba, mpe yandi butaka mwana ya bakala na ntangu yango yina Nzambi zabisaka yandi. 3 Abalami pesaka mwana yina Saala butaka nkumbu Isaake. 4 Abalami zengaka bubakala ya Isaake, na ntangu Isaake lungisaka bilumbu nana, mutindu Nzambi tumisaka Abalami na kusala. 5 Abalami vwandaka na bamvula nkama na ntangu mwana ya yandi Isaake butukaka. 6 Saala zonzaka: «Nzambi me sala ti munu mpe mu seka na kyese, mpe bantu nyonso yina ke kuwa dyambu yayi ke seka kintwadi na munu.» 7 Yandi zonzaka dyaka: «Nani lendaka tuba na Abalami ti munu, Saala mu ke pesa mabene na bana? Kasi awa mu me butila yandi mwana ya bakala na buboba ya yandi.»Abalami bingisaka Angale mpe Isemayele
8 Mwana kulaka, mpe yandi bikaka mabene. Kilumbu Isaake bikaka mabene, Abalami salaka mukembo ya nene.
9 Saala talaka ti mwana ya Angale, yina kento ya Ngipiti butilaka Abalami, vwandaka seka. 10 Na yina yandi zabisaka Abalami: «Bingisa mundongo ya kento na mwana ya yandi, samu ti mwana ya mundongo yayi fwana byadila ve difwa kintwadi na mwana ya munu Isaake.»
11 Dyambu yayi talisaka Abalami mpasi mingi na ntima, samu ti Isemayele mpe vwandaka mwana ya yandi. 12 Kasi, Nzambi tubaka na Abalami: «Kunyonga ve samu na mundongo ya kento na mwana ya yandi. Ndima kusala nyonso yina Saala me zabisa nge na kusala. Samu ti ni na Isaake nge ke kuzwa makanda mutindu mu pesaka nge nsilulu. 13 Kasi samu na mwana ya mundongo ya kento, mu ke pesa yandi mpe dikanda, samu ti yandi kele mwana ya nge.»
14 Na suka-suka ya kilumbu yina landaka, Abalami pesaka na Angale dimpa na saki ya mpusu ya kibulu ya kufuluka na maza. Yandi pesaka mwana na Angale, mpe bingisaka yandi. Angale kwendaka yenga-yenga na yinsi ya kuyuma ya Beele-Seba. 15 Ntangu maza manisaka na saki ya mpusu ya kibulu, yandi bikaka mwana na yisi ya mwa yinti. 16 Mpe yandi kwendaka vwanda mwa ntama na yinda ya kulutila bametele nkama, mpe yandi tubaka: «Mu zola ve kutala lufwa ya mwana ya munu na meso.» Yandi vwandaka ya kuvwanda mwa ntama, mpe yandi vwandaka dila mingi. 17 Nzambi kuwaka bidilu ya mwana, mpe katuka na dizulu, mbazi ya Nzambi bokilaka Angale. Yandi yufulaka: «Angale, samu na yinki nge ke na kudila? Kuvwanda ve na boma, samu ti Nzambi me kuwa ndinga ya mwana katuka kisika yina mwana kele, Nzambi me kuwa bidilu ya yandi. 18 Telama, nge Kwenda baka mwana mpe nge simba yandi mbote. Samu ti mu ke pesa yandi dikanda ya nene.» 19 Nzambi fungulaka Angale meso, mpe Angale talaka dibulu ya maza. Angale kwendaka fulusa saki ya mpusu ya kibulu na maza, mpe nwikisaka mwana maza.
20 Nzambi vwandaka keba mwana. Mwana kulaka mpe kwendaka zinga na yinsi ya kuyuma. Yandi kumaka kikubudi ya nene.
21 Isemayele zingaka na yinsi ya kuyuma yina ba ke bokilaka Palane. Mama ya yandi kwedisaka yandi na kento mosi ya yinsi ya Ngipiti.
Ngwisani ya Abalami na Abimeleke
22 Kaka na ntangu yina, Abimeleke na Pikole, mfumu ya binwani ya Abimeleke, kwizaka tuba na Abalami: «Nzambi kele na nge na nyonso yina nge ke na kusala.» 23 Na yina, kudya ndefi na nkumbu ya Nzambi ti, nge ke sala munu yimbi ve, ya vwanda bana ya munu, to bayina nyonso ke butuka na manima ya bawu. Mutindu mu me lakisa nge bumbote, nge mpe ke sala mutindu mosi samu na munu mpe samu na yinsi yayi, kisika nge me zinga na bunzenza. 24 Abalami vutulaka: «Mu ke kudya ndefi.»
25 Mpe Abalami sembaka Abimeleke samu na mambu ya dibulu ya maza yina bisadi ya yandi botolaka. 26 Abimeleke tubaka: «Mu zaba ve nani salaka dyambu yina. Nge mosi mpe nge zabisaka munu yawu ve. Munu mosi mpe kaka ni bubu yayi mu me kuwa yawu.» 27 Na manima, Abalami pesaka Abimeleke bangombe, mameme, na bankombo. Mpe bawu zole salaka ngwisani. 28 Na kati ya nkonga ya mameme ya yandi, Abalami tulaka bana ya mameme sambwadi na lweka. 29 Na yina, Abimeleke tubaka na Abalami: «Samu na yinki nge me tula mameme sambwadi yayi na lweka?» 30 Yandi vutulaka: «Mu me katula mameme sambwadi yayi samu na kupesa nge yawu mutindu kidimbu yina ke lakisa ti, ni munu timunaka dibulu yina ya maza.» 31 Ni yawu yina, ba pesaka kisika yina nkumbu Beele-Sebaa. Samu ti ni kuna bawu zole kudyaka ndefi.
32 Abalami na Abimeleke salaka ngwisani kuna na Beele-Seba. Na manima, Abimeleke na Pikole mfumu ya binwani ya Abimeleke, bawu vutukaka na yinsi ya ba-Filiseti. 33 Kuna na Beele-Seba, Abalami kundaka yinti mosi yina ba ke bokilaka tamalise, mpe yandi sambilaka Yave, Nzambi ya bantangu nyonso. 34 Abalami zingaka bantangu mingi na yinsi ya ba-Filiseti.