Nkumbu ya Abayami kumaka Abalami
17
Na ntangu Abayami kumaka na bamvula makumi yivwa na yivwa, Yave talanaka na yandi, mpe zonzaka: «Mu kele Nzambi-Mpungu. Dyatila mutindu mu zola, mpe vwanda ya kulunga. 2 Mu ke na kusala luwawanu ya munu na kati ya nge na munu. Mu ke funisa dikanda ya nge, samu ti ya kukuma nene mingi.» 3 Abayami fukamaka kizizi na ntoto. Nzambi tatamanaka kuzonza na yandi na kutuba mutindu yayi: 4 «Luwawanu ya munu na nge ni yayi: Nge ke vwanda tata ya makanda mingi. 5 Ba ke bokila dyaka nge na nkumbu ya Abayami ve. Nkumbu ya nge me kuma Abalami, samu ti mu ke kumisa nge tata ya makanda mingi. 6 Mu ke sala ti nge kubuta bana mingi, yina ke kuma makanda mingi, mpe bantinu mingi ke butuka na nge. 7 Mu ke sala luwawanu ya munu na kati ya munu, na nge, mpe na bayina nyonso ke butuka na manima ya nge, luwawanu yayi ya mankululu ke sala ti munu mu kuvwanda Nzambi ya nge, mpe Nzambi ya bayina ke butuka na manima ya nge. 8 Yinsi nyonso yayi ya Kaana nge me kwiza vwanda na bunzenza, mu ke pesa yawu mankululu na nge, mpe na bana yina ke butuka na manima ya nge. Mu ke vwanda Nzambi ya bawu.»9 Nzambi zonzaka dyaka na Abalami: «Beno fwana zitisa luwawanu ya munu, nge, bana ya nge, mpe bayina nyonso ke butuka na manima ya bawu, mbandu ni mbandu. 10 Tala mutindu beno fwana kebila luwawanu ya munu, nge na bana yina ke butuka na manima ya nge: Babakala nyonso na kati-kati ya beno fwana zengisa bubakala ya bawu. 11 Kuzengisa bubakala ya beno ke vwanda kidimbu ya luwawanu na kati-kati ya munu na beno. 12 Beno ke zenga bubakala ya bana nyonso ya babakala, ntangu bawu ke lungisa bilumbu nana, na konso mbandu. Ata ya vwanda bandongo yina me butuka na yinzo ya nge, ata ya vwanda bayina beno me sumba na banzenza, bayina kele ve bantu ya dikanda ya beno. 13 Ba fwana zenga bubakala ya mundongo yina me butuka na yinzo ya nge, to yina nge me sumba na mbongo ya nge. Kidimbu yina ke vwanda na banzutu ya beno, samu na kulakisa ti luwawanu ya munu ke zingila bantangu nyonso. 14 Samu na bakala yina ba me zenga bubakala ve, ba fwana kukatula yandi na dikanda ya yandi. Samu ti yandi me lungisa ve mambu yina luwawanu ya munu me tumisa na kusala.
15 Nzambi zonzaka dyaka na Abalami: «Kubokila dyaka ve kento ya nge na nkumbu ya Salayi. Samu ti nkumbu ya yandi me kuma Saala. 16 Mu ke sakumuna yandi, mpe yandi ke butila nge mwana ya bakala. Mu ke sakumuna yandi, mpe yandi ke buta makanda mingi, bantinu ya makanda ke butuka na yandi.» 17 Abalami fukamaka kizizi na ntoto, mpe yandi sekaka. Na yinsi ya ntima yandi ti: «Muntu ya bamvula nkama lenda buta dyaka? Saala mpe yina me kuma na bamvula makumi yivwa, yandi lenda buta dyaka?» 18 Abalami lombaka na Nzambi: «Bika Isemayele kuzinga na yisi ya lusakumunu ya nge.» 19 Nzambi vutulaka na Abalayami: «Ve! Saala ke butila nge mwana ya bakala. Nge ke pesa yandi nkumbu Isaakea. Mu ke sala luwawanu ya munu na yandi, mutindu luwawanu ya mankululu samu na bana yina ke butuka na manima ya yandi. 20 Samu na Isemayele mu me kuwa ndombolo ya nge. Mu ke sakumuna yandi. Mu ke sala ti yandi kubuta mingi mpe dikanda yina yandi ke buta ke kuma mingi ya kulutila. Yandi ke buta bamfumu kumi na zole. Mu ke sala ti dikanda yina yandi ke buta kuvwanda nene. 21 Kasi luwawanu ya munu, mu ke sala yawu na Isaake, mwana yina Saala ke buta na mvula yina ke kwiza, kaka na ntangu ya mutindu yayi.»
22 Ntangu Nzambi manisaka kuzonza na Abalami, yandi bikaka yandi, mpe yandi kwendaka. 23 Kaka na kilumbu yina, Abalami vukisaka Isemayele na bandongo ya yandi nyonso yina butukaka na yinzo ya yandi, na bayina yandi sumbaka na bongo ya yandi. Yandi zengaka bubakala ya bawu mutindu Nzambi tumisaka yandi. 24 Abalami vwandaka na bamvula makumi yivwa na yivwa na ntangu ba zengaka bubakala ya yandi. 25 Mpe mwana ya yandi Isemayele vwandaka na bamvula kumi na tatu ntangu ba zengaka yandi bubakala. 26 Ba zengaka Abalami na Isemayele bubakala kilumbu mosi, 27 kintwadi na bantu nyonso ya yinzo ya Abalayami, bandongo yina butukaka na yinzo ya yandi, mpe bayina yandi sumbaka na banzenza.