Mbutukulu ya Isemayele
16
Salayi, kento ya Abayami, butilaka ve Abalami mwana. Salayi vwandaka na mundongo mosi ya kento, muntu ya Ngipiti, nkumbu ya yandi Angale. 2 Salayi tubaka na Abayami: «Yave me sala ti mu vwanda ve na bana. Vukisa mfulu na Angale, mundongo ya munu. Ya lenda vwanda ti yandi butila munu mwana.» Abayami ndimaka mambu ya Salayi. 3 Salayi, kento ya Abayami, bakaka Angale, kisadi ya yandi ya mu-Ngipiti, mpe pesaka yandi na Abayami mutindu kento ya yandi. Abayami lutisaka bamvula kumi kuna na yinsi ya Kaana tekila dyambu yayi kusalama. 4 Abayami vukanaka na Angale, mpe Angale kumaka na kivumu. Na manima, Angale vwandaka vumina dyaka Salayi ve, mpe yandi bandaka tala yandi mutindu kima ya mpamba. 5 Ni yawu yina Salayi tubaka na Abayami: «Nkadulu ya yimbi ya Angale na ntwala ya munu ke kubwa na zulu ya yintu ya nge. Ni munu mosi pesaka nge mundongo ya munu. Kasi ntangu yandi me tala ti yandi me kuma na kivumu, yandi ke na kuvumina dyaka munu ve, mpe yandi ke na kutala munu mutindu kima ya mpamba. Bika Yave kuzenga dyambu yayi na kati ya nge na munu.» 6 Abayami vutulaka na Salayi: «Angale kele mundongo ya nge, yandi kele na yisi ya lutumu ya nge. Sala mutindu nge me zola.» Na yina Salayi nyokolaka Angale, mpe Angale kimaka na yinsi ya kuyuma.7 Mbazi ya Yave kutanaka Angale pene-pene ya mukelo ya maza na yinsi ya kuyuma yina ke na nzila ya Sule. 8 Mbazi tubaka ti: «Angale, mundongo ya Salayi, wapi sika nge me katuka, mpe wapi sika nge ke na kukwenda?» Angale vutulaka: «Mu ke na kukima Salayi, mfumu ya munu.» 9 Mbazi ya Yave tubaka na Angale: «Vutuka na sika ya mfumu ya nge, mpe vwanda ya kutumama na yandi.» 10 Mbazi ya Yave zonzaka dyaka na Angale: «Mu ke sala ti dikanda yina ke butuka na nge kuvwanda bantu mingi. Mpe ata muntu ve ke lenda kutanga bawu.» 11 Mbazi ya Yave tatamanaka na kutuba ti: «Tala, nge kele na kivumu, mpe nge ke buta mwana ya bakala yina nge ke pesa nkumbu Isemayele, samu ti Yave me kuwa bidilu ya nge. 12 Isemayele ke vwanda mutindu mbuluku ya mfinda. Yandi ke nwanisa bantu nyonso mpe bantu nyonso ke nwanisa yandi. Isemayele ke zinga yandi mosi, kisika mosi ve na bampangi ya yandi.»
13 Angale pesaka Yave yina sololaka na yandi nkumbu yayi: «Nge kele Nzambi yina ke na kutala munu.» 14 Ni yawu yina ba pesaka dibulu ya maza nkumbu: «Dibulu ya maza ya Layayi-loyi», yina zola kutuba: Yandi yina kele Moyo mpe ke na kutala munu. Yawu kele na kati-kati ya babwala Kadese na Belede. 15 Angale butilaka Abayami mwana ya bakala. Abayami pesaka mwana yina nkumbu Isemayele. 16 Abayami vwandaka na bamvula makumi nana na nsambwadi na ntangu Angale butilaka yandi Isemayele.