Nzambi salaka luwawanu na Abalami
15
Na manima, ndinga ya Yave wakanaka na Abayami na lumoni. Yandi tubaka mutindu yayi: «Abayami! Kuvwanda ve na boma, mu ke keba nge, mpe mu ke pesa nge musendo ya nene.» 2 Abayami vutulaka: «Yave Mfumu ya munu, yinki nge ke pesa munu? Mu ke kufwa ata kubika mwana, muntu yina ke byadila bimvwama ya munu ni Elyezele ya mbanza ya Damase. 3 Nge pesaka munu ve bweso ya kubuta. Ni kisadi ya munu Elyezele muntu ke bikana na bimvwama ya munu.» 4 Na yina Yave tubilaka yandi ti: «Ni yandi ve ke vwanda kibyadi ya nge, kasi ni mwana yina nge mosi ke buta, muntu ke bikana na bimvwama ya nge.» 5 Na manima, Yave basisaka Abayami na ngaanda. Yandi tubaka na yandi: «Tala na zulu, meka ntete na kutanga bambwetete nyonso yina, kana nge ke lenda.» Mpe yandi tubaka dyaka: «Dikanda ya nge ke vwanda mingi mutindu bambwetete yayi.»6 Abalami kwikilaka na Yave, mpe Yave ndimaka yandi mutindu muntu ya kudedama samu na kiminu ya yandi. 7 Yave tubaka na Abalami: «Ni munu Yave, yina basisaka nge na mbaza ya Ule na yinsi ya Kaledeyi, samu na kupesa nge yinsi yayi nge kele, samu ti yawu kukuma ya nge.» 8 Abalami vutulaka: «Yave, Mfumu ya munu, yinki ke lakisa ti yinsi yayi ke vwanda ya munu?» 9 Yandi tubaka na Abalami: «Natina munu mwana ya ngombe ya nkento ya bamvula tatu, na nkombo ya nkento ya bamvula tatu, na dimeme ya mbakala ya bamvula tatu, na kiduka mosi mpe na dibembe mosi ya ntwenya.» 10 Abalami nataka bibulu yina nyonso. Yandi zengaka konso kibulu na kati-kati, mpe yandi tulaka bibuku nyonso mutindu ti konso kibuku kutalasana na kibuku ya nkaka. Kasi yandi zengaka ve bandeke. 11 Bakoko-mbele kwizaka na kudya bibulu yango, kasi Abayami bingisaka bawu.
12 Na nkokila, Abayami lalaka pongi mosi ya ngolo. Mpimpa ya nene bwaka mpe yandi kuzwaka boma ya ngolo. 13 Nzambi tubaka na Abayami: «Nge fwana zaba ti bana ya nge ke zinga na yinsi ya nzenza, ba ke kuma bandongo, mpe ba ke talisa bawu mpasi bamvula nkama yiya. 14 Kasi mu ke fundisa yinsi yina ke kumisa bawu bandongo, mpe ba ke basika kuna na bimvwama mingi. 15 Samu na nge, mu ke sala ti nge nuna kununa mosi ya kyese, mpe nge kufwa na kizunu. 16 Na yina me tadila bana ya nge, kaka ni mbandu ya yiya ke vutuka kwaku, samu ti masumu ya ba-Amoli me yela ntete ve, na kubingisa bawu na yinsi yayi.»
17 Ntangu bwisi yilaka, na kati ya mpimpa, kima mosi yina vwandaka basika tiya na mulinga lutaka na kuyoka bibuku ya bibulu. 18 Na kilumbu yina, Yave salaka luwawanu na Abayami mutindu yayi: «Mu me pesa yinsi yayi na dikanda ya nge, kubanda na nzadi ya Ngipiti tii na nzadi ya nene ya Efalate, 19 yawu kele yinsi ya ba-Keni, na ba-Kenizi, na ba-Kadamoni, 20 na ba-Iti, na ba-Pelizi, na ba-Lefayi, 21 na ba-Amoli, na ba-Kanani, na ba-Ngilengasi, na ba-Yebuse.» a