Abayami, bantinu mpe Meleki-Sedeke
14
Na ntangu vwandaka yala bantinu yayi: Amelafele ya Sineyale, Aleyoke ya Elasale, Kedolelawomele ya Elame, Tideyale ya Ngoyime, 2 mvita salamaka. Bantinu yina nwanisaka bantinu yayi: Beela ya Sodome, Bilesa ya Ngomola, Sineyabe ya Adema, Semevele ya Seboyime mpe ntinu ya Bela, Bela yina ba ke bokilaka mpe Soyale. 3 Bawu nyonso kwendaka vukana na mudimba ya Sidime, yina ba ke bokilaka mpe mubu ya kufwa+ \fr 14.3 \fq mubu ya kufwa \ft . 4 Bawu salaka bamvula kumi na zole na yisi ya lutumu ya ntinu Kedolelawomele. Kasi na mvula ya kumi na tatu, bawu mangaka na kutumama na kuvwanda na yisi ya lutumu ya yandi. 5 Na mvula ya kumi na yiya, Kedolelawomele kwizaka na bantinu yina vwandaka kintwadi na yandi. Bawu nungaka ba-Lefayi kuna na Asetalote-Kalenayime, ba-Zuzime kuna na Ame, ba-Emi kuna na Sawe ya Kileyatayime. 6 Bawu nungaka ba-Woli kuna na Seyile, mongo ya bawu, tii na Ele-Palane, pene-pene ya yinsi ya kuyuma. 7 Bawu vutukaka na Eyine-Misepate yina ba ke bokilaka mpe Kadese. Bawu nungaka ba-Amalesi. Bawu nungaka yinsi ya ba-Amalesi. Bawu nungaka mpe ba-Amoli yina vwandaka zinga kuna na Asasone-Tamale. 8 Na yina, bantinu ya Sodome, ya Ngomola, ya Adema, ya Seboyime mpe ntinu ya Bela, Bela yina ba ke bokilaka mpe Soyale, bawu yidikaka milonga ya binwani na mudimba ya Sidime, samu na kunwanisa 9 bantinu yayi: Kedolelawomele ya Elame, Tideyale ya Ngoyime, Amelafele ya Sineyale, Aleyoke ya Elasale. Bantinu yiya yayi nwanisaka bantinu nyonso tanu. 10 Mudimba ya Sidime vwandaka ya kufuluka na mabulu yina ke basikilaka gudron. Bantinu ya Sodome na ya Ngomola kimaka, bawu kwendaka kubwa na kati ya mabulu yina. Bayina vuukaka kimaka na mongo. 11 Bayina nungaka bakaka bimvwama nyonso ya bantu ya Sodome mpe Ngomola. Ba bakaka mpe madya nyonso, na manima ba kwendaka. 12 Loti, mwana-nkazi ya Abayami vwandaka zinga na Sodome. Ba bakaka mpe yandi na bimvwama ya yandi mpe ba nataka yandi.13 Kasi muntu mosi kimaka, yandi kwendaka pesa nsangu na sika ya Abayami. Abayami vwandaka mu-Ebelewo. Yandi vwandaka zinga pene-pene na bayinti ya nene ya Mamele ya mu-Amoli. Mamele vwandaka mpangi ya Esekole na Anele. Bawu tatu vwandaka na ngwisani na Abayami. 14 Ntangu Abayami kuwaka ti ba me bwila mwana-nkazi ya yandi, mpe ba me nata yandi, yandi vukisaka bantu nkama tatu na kumi na nana, bayina butamaka na bantu yina vwandaka na yisi ya lutumu ya yandi. Bawu landaka bambeni tii na mbanza Dane. 15 Na yina, Abayami na bisadi ya yandi kabukaka na bankonga samu na kunwanisa bambeni na mpimpa. Yandi nwanisaka mpe nungaka bawu. Mpe yandi landaka bawu tii na Oba, na node ya Damase. 16 Yandi bakaka bimvwama nyonso yina bambeni botolaka. Yandi vutukaka na Loti na bimvama ya yandi, na bakento mpe bantu ya nkaka.
17 Na manima ya kununga Kedolelawomele na bantinu yina vwandaka na yandi, Abayami vutukaka. Ntinu ya Sodome kwizaka bwabana yandi na mudimba ya Sawe, yina ba ke bokilaka mudimba ya Ntinu.
18 Meleki-Sedeke, ntinu ya Saleme natinaka Abayami mampa na vinu. Meleki-Sedeke vwandaka nganga-Nzambi ya Nzambi ya Kulutila Kuzangama. 19 Yandi sakumunaka Abayami mutindu yayi: «Bika ti Nzambi ya Kulutila Kuzangama yina yidikaka zulu na ntoto kusakumuna nge! 20 Nkembo na Nzambi ya Kulutila Kuzangama yina me yekola bambeni ya nge na maboko ya nge.» Abayami pesaka yandi dime ya bima nyonso.
21 Na yina, ntinu ya Sodome tubaka na Abayami: «Baka ya nge bimvwama kasi pesa munu bantu.» 22 Abayami tubaka na ntinu ya Sodome: «Mu me nanguna diboko na ntadisi ya Yave, Nzambi ya Kulutila Kuzangama, yina yidikaka zulu na ntoto, samu na kudya ndefi ti, 23 mu ke baka ata kima na maboko ya nge, ya vwanda singa ya kutungila to singa ya dipapa. Mu zola ve ti nge kwenda tuba ti: “Ni munu me mvwamisa Abayami.” 24 Munu mosi mu ke baka ata kima. Mu me ndima kaka yina me kudya bantwenya yina me kwenda na munu na muzingu. Samu na bantu yina kwendaka na munu: Anele, Esekole mpe Mamele, bawu mosi ke baka kikunku ya bawu.»