13
Abayami katukaka na yinsi ya Ngipiti, mpe kwendaka na yinsi ya Nengeve kintwadi na kento ya yandi, na Loti, mpe na bima ya yandi nyonso.Abayami na Loti
2 Abayami vwandaka na bimvwama mingi ya bibulu, na ya palata, na ya wolo. 3 Yandi kwendaka na bitini-bitini, katuka Nengeve tii na Betele, tii na kisika yina yandi vwandaka ntete, kati-kati ya Betele na Ayi, 4 na kisika yina, yandi kiyokolo ya minkayulu samu na Yave. Kuna, Abayami sambilaka Yave na nkumbu ya yandi.
5 Loti, yina vwandaka kwenda kintwadi na Abayami, vwandaka yandi mpe na mameme, na bankombo, na bangombe, mpe na mafokola. 6 Yinsi yina lendaka kulungisa ve bansatu ya luzingu ya bawu na kisika mosi. Samu ti bimvwama ya bawu vwandaka ya kulutila mingi, mpe bawu lendaka zinga ve kisika mosi. 7 Mindondo basikaka na kati ya mivungi ya bibulu ya Abayami na mivungi ya bibulu ya Loti. Na ntangu yina, ba-Kanani na ba-Pelizi vwandaka zinga na yinsi. 8 Na yina Abayami tubaka na Loti: «Bika mindondo kuvwanda ve na kati ya munu na nge, mpe na kati ya mivungi ya munu na ya nge. Samu ti beto kele dikanda mosi. 9 Yinsi nyonso kele na mantwala ya nge. Beto fwana kukabwana. Kana nge ke kwenda na diboko ya bakala, munu mu ke kwenda na diboko ya kento. Kana nge ke kwenda na diboko ya kento, munu mu ke kwenda na diboko ya bakala.»
10 Loti vumbulaka yintu mpe talaka kizunga nyonso ya Yolodani, yina vwandaka yamba maza mingi. Tekila Yave kumwangisa bambanza ya Sodome na Ngomola, kizunga nyonso yina ya Yolodani tii na mbanza ya Soyale vwandaka mutindu bilanga ya Yave, mutindu yinsi ya Ngipiti. 11 Loti soolaka ya yandi kizunga nyonso ya Yolodani mpe kwendaka na esete. Ni mutindu yina bawu kabwanaka muntu-muntu na nzila ya yandi. 12 Abayami zingaka na yinsi ya Kaana, mpe Loti na bambanza ya kizunga ya Yolodani. Yandi vwandaka kwenda tunga mafokola ya yandi tii na kukuma na mbanza ya Sodome. 13 Bantu ya Sodome vwandaka na mavanga ya yimbi, mpe ya kusumuka mingi na ntwala ya Yave.
14 Na manima ya kukabwana ya Loti na Abayami, Yave tubaka na Abayami: «Vumbula yintu ya nge, mpe tala banda kisika yina nge kele. Tala na node, na sude, na esete, mpe na wesete. 15 Yinsi nyonso yina nge kele na kutala, mu ke pesa nge yawu mankululu, na bana ya nge, mpe na bayina nyonso ke butuka na manima ya bawu. 16 Mu ke funisa bana ya nge, mpe bayina ke butuka na manima ya bawu, mutindu munyenge. Kana muntu lendaka kutanga munyenge, yandi lenda kutanga mpe bana ya nge, na bayina ke butuka na manima ya bawu. 17 Telama! tambula na yinsi nyonso, na yinda ya yawu mpe na bunene ya yawu, samu ti mu ke pesa nge yawu.»
18 Abayami kwizaka tunga mafokola ya yandi, mpe kuzinga na bayinti ya nene ya Mamele yina kele na mbanza ya Ebelone. Mpe kuna, yandi kiyokolo ya minkayulu samu na Yave.