Nzambi salaka nsilulu ti Saala ke buta mwana ya bakala
18
Kilumbu mosi, na ntangu ya midi, Yave talanaka na Abalayami pene-pene ya bayinti ya Mamele. Abalayami vwandaka ya kuvwanda na mwelo ya difokola ya yandi. 2 Mbala mosi yandi talaka bantu tatu ya kutelama na mwa mantwala. Na nswalu-nswalu yandi kwendaka yamba bawu. Yandi fukamaka kizizi na ntoto. 3 Mpe yandi zonzaka na mosi na bawu: «Mulemvo ya nge mfumu, sadila munu lemvo na kundima kukota na yinzo ya munu. 4 Ba ke natina beno mwa maza ya kusukudila makulu. Mpe beno pema ya beno na yisi ya yinti yayi. 5 Mu ke natina beno mwa kima ya kudya, samu na kubwela ngolo na nzutu tekila beno tatamana nzila ya beno. Na yina, kulutila ya beno pene-pene ya yinzo ya munu kisyelo ya beno kuvwanda ya mpamba ve.» Bantu yango vutulaka: «Mambu ve. Sala mutindu nge me zonza.» 6 Abalami kwendaka nswalu na yinzo na kuzonza na Saala: «Baka mbangu faline mingi ya kitoko, nge yidika kiputi samu ti nge sala mampa.» 7 Na manima, Abalami kwendaka mbangu na kisika yina vwandaka bibulu ya yandi, samu na kubaka mwana ya ngombe ya mbote mpe ya mafuta. Yandi pesaka yawu na kisadi ya yandi samu na kulamba yawu nswalu-nswalu.8 Ntangu mbisi kuyaka, yandi bakaka yawu, na folomaze mpe miliki, yandi kwendaka tudila bawu yawu. Ba bandaka na kudya, mpe Abalami telamaka pene-pene ya bawu na yisi ya yinti. 9 Ba yufulaka yandi: «Wapi kento ya nge Saala?» Abalami vutulaka: «Yandi kele na kati ya yinzo.» 10 Mosi na bawu zonzaka dyaka: «Na mvula yina ke kwiza mu ke vutuka awa kaka na ngonda yayi, mpe Saala ke vwanda na mwana ya bakala.» Saala yango vwandaka na manima ya Abalami, na mwelo ya yinzo, mpe yandi vwandaka kuwa.
11 Abalami na Saala vwandaka me nuna mingi, bawu kumaka biboba. Na bamvula yina kumaka na Saala, yandi lendaka buta dyaka ve. 12 Saala sekaka na yisi ya ntima. Yandi tubaka: «Munu, mu me nuna mutindu yayi mu ke lenda dyaka kuyangalala na bakala? Awa mfumu ya munu mpe me kuma kiboba!» 13 Yave tubaka na Abalami: «Yinki Saala ke na kuseka? Wapi mutindu yandi lenda tuba ti: "Munu, mu me nuna mutindu yayi, mu lenda kubuta mwana?" 14 Nge ke na kubanza ti ya ke na dyambu yina Yave lenda kulembana? Ntangu mu ke vutuka na sika ya nge kwaku, na mvula yina ke kwiza, kaka na ngonda yayi, Saala ke vwanda na mwana ya bakala.» 15 Saala kumaka na boma, yandi tubaka: «Ve! mu me seka ve.» Kasi Yave tubaka: «Ve! nge me seka.»
Abalayami lombaka na Nzambi na kulemvokila Sodome
16 Na manima, bantu yango telamaka, ba bakaka nzila ya kukwenda na Sodome. Abalami kwendaka fidisa bawu. 17 Yave vwandaka me kanisa mutindu yayi: «Mu ke bumba Abalami mambu yina mu ke na kusala? 18 Ve. Abalami fwana kuvwanda tata ya dikanda ya nene mpe ya ngolo. Mpe samu na yandi, mu ke sakumuna makanda nyonso ya ntoto. 19 Abalami, mu soolaka yandi samu ti yandi tumisa bana ya yandi mpe bayina ke butuka na manima, na kulanda nzila ya Yave. Bawu ke sadila ludedomo na mambu ya kusungama. Ni kuna mpe munu Yave ke sadila yandi mambu yina mu sadilaka yandi nsilulu.» 20 Na yina, Yave tubaka na Abalami: «Kuyawula yina ba ke na kuyawula samu na Sodome na Ngomola me lutila, masumu ya bawu kele ya nene mingi. 21 Ni yawu yina, mu fwana kukulumuka kuna, samu na kwenda tala munu mosi, kana mambu yina ba ke na kuyawula samu na bawu kele ya tsyelika.»
22 Bantu zole na kati ya bawu kwendaka na Sodome. Abalami bikanaka kuna na ntadisi ya Yave. 23 Abalami belamaka mpe tubaka: «Mfumu, ya tsyelika nge ke kufwa kwandi muntu ya kudedama kintwadi na muntu ya yimbi? 24 Kana bantu makumi tanu ya kudedama ke zingaka na mbanza yina, ya tsyelika nge ke mwangisa kwandi mbanza yango? Nge lenda lemvokila yawu ve samu na makumi tanu ya bantu yina kele ya kudedama? 25 Ve! Nge lenda kusala mutindu yina ve. Muntu ya kudedama kufwa mutindu mosi na muntu ya yimbi? Zuzi ya yinza nyonso lenda kusala ve lufundusu na ludedomo nyonso?» 26 Yave vutulaka: «Kana mu tala bantu makumi tanu ya kudedama na Sodome, mu ke lemvokila mbanza nyonso samu na bantu yina.»
27 Abalami tubaka dyaka: «Mfumu, mulemvo ya nge, mu zola kuzonza na nge, mu yina kele kaka ntoto mpe bombi ya mpamba. 28 Kana bantu tanu me kondwa na kati ya makumi tanu yina, nge ke mwangisa kwandi mbanza nyonso samu na bantu tanu?» Mfumu vutulaka: «Ve, mu ke mwangisa ve mbanza yina, kana mu me tala bantu makumi yiya na tanu ya kudedama.»
29 Abalami tubaka dyaka: «Kana bantu kaka makumi yiya kele ya kudedama kuna.» Mfumu tubaka: «Ve, samu na makumi yiya ya bantu, mu ke mwangisa ve mbanza.»
30 Abalami tubaka dyaka: «Mulemvo ya nge Mfumu, kudasuka ve kana mu tubaka dyaka. Ya lenda vwanda ti, kaka makumi tatu ya bantu ya kudedama kele kuna.» Mfumu tubaka: «Kana mu tala bantu makumi tatu ya kudedama kuna, mu ke sala kima ve.»
31 Abalami tubaka: «Mulemvo ya nge Mfumu, bika mu tubaka dyaka. Kana ba kele kaka makumi zole.» Mfumu vutulaka: «Mu ke mwangisa ve mbanza samu na makumi zole ya bantu yina.»
32 Abalami tubaka: «Mulemvo ya nge Mfumu, kudasuka ve. Mu ke tubaka mbala ya nsuka. Kana ba kele kaka kumi.» Mfumu vutulaka: «Mu ke mwangisa ve mbanza samu na kumi ya bantu.»
33 Na manima ya kusolola na Abalami, Yave kwendaka, mpe Abalami vutukaka ya yandi na yinzo.