Nowa kotaka na nzaza
7
Yave tubaka na Nowa: «Kota na nzaza, nge na dikanda ya nge. Samu ti na mbandu yayi kaka ni nge mu me tala muntu ya kudedama na meso ya munu. 2 Nge ke baka bibulu sambwadi ya kento mpe bibulu sambwadi ya bakala na kati ya bibulu ya kuvedilaa ya konso mutindu. Na yina ke ya kuvedila ve, nge ke baka mosi ya kento mpe mosi ya bakala ya konso mutindu. 3 Mutindu mosi mpe bandeke: nge ke baka sambwadi ya kento mpe sambwadi ya bakala ya konso mutindu samu ti yawu kuzimbana ve na ntoto. 4 Samu ti kaka bilumbu sambwadi me bikana, munu mu ke nokisa mvula na ntoto nyonso, mpimpa na ntangu, bilumbu makumi yiya ya muvimba. Mu ke kufwa bima nyonso yina mu salaka na ntoto yayi.» 5 Mpe Nowa salaka nyonso mutindu Yave tumisaka yandi.Maza dyamisaka ntoto nyonso
6 Nowa vwandaka na bamvula nkama nsambwadi na ntangu maza kwizaka dyamisa ntoto. 7 Nowa kotaka na nzaza, yandi na kento ya yandi, mpe bana ya yandi na bakento ya bawu, samu na kukima maza yina. 8 Na bibulu ya kuvedilab, na yina kele ve ya kuvedila, na bandeke, na bibulu ya fyoti-fyoti yina ke tambulaka na ntoto, 9 bawu nyonso, zole zole, ya kento na ya bakala, bawu kwizaka na sika ya Nowa na kati ya nzaza, mutindu Nzambi tumisaka. 10 Na manima ya bilumbu sambwadi, maza dyamisaka ntoto.
11 Ntangu Nowa kwizaka lungisa bamvula nkama nsambwadi, na kilumbu yina ya kumi na sambwadi ya ngonda ya zole, maza ya yinsi ya ntoto basikaka na ngolo, banela ya mazulu mpe fungukaka. 12 Mvula bandaka na kunoka na ntoto. Yawu tatamanaka na kunoka bilumbu makumi yiya ya muvimba, mpimpa na ntangu. 13 Ni na kilumbu yina Nowa kotaka na kati ya nzaza, na kento ya yandi, mpe na bana ya yandi: Seme, na Ame, na Yafete, na bakento ya bawu. 14 Nowa kotaka mpe na bibulu ya mutindu na mutindu, ya musitu na ya bwala, bibulu ya fyoti-fyoti, bandeke ya konso mutindu, mpe bima ya moyo yina kele na mapapu. 15 Na bima ya konso mutindu yina ke wumunaka, zole zole kwizaka na sika ya Nowa, na kati ya nzaza. 16 Bima ya konso mutindu yina ke wumunaka vwandaka kwiza kota, kento na bakala, mutindu Nzambi tumisaka yawu na Nowa. Na manima, Yave kangaka mwelo ya nzaza.
17 Mvula ya nene salaka makumi yiya ya bilumbu na kunokaka kaka. Maza kumaka mingi ya kulutila, mpe yawu nangunaka nzaza na zulu ya ntoto. 18 Maza tatamanaka kubwelama, yawu kumaka mingi na ntoto, mpe nzaza vwandaka kwenda yangama na zulu ya yawu. 19 Maza kwizaka kuma mingi ya kulutila, tii na kudyamisa myongo yina me lutila nene na ntoto. 20 Bansongi ya myongo yango kwizaka dyama na bametele sambwadi na kati ya maza. 21 Ni kuna bima nyonso ya moyo yina ke zingaka na ntoto kufwaka: na bandeke, na bibulu ya bwala mpe ya musitu, na bima nyonso ya fyoti-fyoti yina ke tambulaka na ntoto, na bantu nyonso. 22 Bima nyonso yina vwandaka wumuna, nyonso yina vwandaka na ntoto kufwaka. 23 Ni mutindu yina Nzambi katulaka nyonso yina vwandaka moyo na ntoto: banda bantu tii na bibulu ya nene mpe ya fyoti, tii na bandeke. Nzambi kufwaka bawu nyonso na ntoto. Kaka Nowa bikanaka, yandi na bayina vwandaka na yandi na kati ya nzaza.
Nowa basikaka na nzaza
24 Maza vwandaka ya kufuluka na ntoto tii bilumbu nkama mosi na makumi tanu.