8
Nzambi bambukilaka Nowa moyo, na bibulu nyonso ya bwala mpe ya musitu yina vwandaka kintwadi na yandi na kati ya nzaza. Yandi fidisaka kitembo na zulu ya maza, mpe maza bandaka kukuluka. 2 Maza ya yinsi ya ntoto bikaka na kubasika. Banelaa ya dizulu kangamaka, mpe mvula bikaka na kunoka. 3 Na manima ya bilumbu nkama mosi na makumi tanu, maza bandaka kuyuma malembe-malembe. 4 Na kilumbu ya kumi na sambwadi ya ngonda ya sambwadi, nzaza kwendaka kangama na myongo ya kizunga ya Alalate. 5 Maza tatamanaka kukawuka tii na ngonda ya kumi. Na kilumbu ya ntete ya ngonda yina ya kumi, bansongi ya myongo kwizaka talana.6 Na manima ya bilumbu makumi yiya, Nowa fungulaka nela yina yandi salaka na nzaza. 7 Yandi bikaka nkwankwa kukwenda. Mpe yawu basikaka, kukwenda, kuvutuka bambala mingi, tii kukawuka ya maza na ntoto. 8 Na manima, yandi bikaka dibembe kukwenda, samu na kutala kana maza kulukaka na ntoto. 9 Kasi dibembe yango kuzwaka ve kisika ya kutentama. Ni yawu yina, yawu vutukaka na sika ya Nowa, na nzaza, samu ti maza vwandaka ntete na zulu ya ntoto nyonso. Nowa lambulaka diboko na kubaka yawu mpe kukotisa yawu na nzaza. 10 Yandi vingilaka dyaka bilumbu sambwadi ya nkaka. Na manima, yandi bikaka dyaka dibembe kudumuka na nganda ya nzaza. 11 Na nkokila dibembe yango vutukaka na sika ya yandi. Yawu vwandaka na kintala ya yinti ya olive na yinwa. Ni mutindu yina Nowa zabaka ti maza kulukaka na ntoto. 12 Nowa vingilaka dyaka bilumbu sambwadi ya nkaka. Na manima yandi bikaka dibembe kukwenda, kasi yawu vutukaka dyaka ve na nzaza.
13 Na kilumbu ya ntete ya ngonda ya ntete, na yimvu yina Nowa lungisaka bamvula nkama nsambwadi na mosi, maza sikaka na ntoto. Nowa katulaka muludi ya nzaza, mpe yandi talaka ti ntoto vwandaka me yuma. 14 Na kilumbu ya makumi zole na sambwadi ya ngonda ya zole, ntoto vwandaka ya kuyuma.
15 Nzambi zonzaka na Nowa mutindu yayi: 16 «Basika na nzaza, nge, na kento ya nge, na bana ya nge, na bakento ya bana ya nge. 17 Bibulu nyonso yina kele kintwadi na nge, konso mutindu ya bandeke, konso mutindu ya bibulu ya nene na ya fyoti yina ke tambulaka na ntoto, basisa bawu nzila mosi na nge. Bawu fwana kutambula na ntoto, kubutana, mpe kuvwanda mingi.» 18 Nowa basikaka, na bana ya yandi, na kento ya yandi, mpe na bakento ya bana ya yandi. 19 Makanda na makanda ya bibulu nyonso, ya bibulu nyonso ya fyoti-fyoti, ya bandeke nyonso, mpe makanda na makanda ya nyonso yina ke tambulaka na ntoto, bawu basikaka na nzaza.
20 Nowa yidikaka kiyokolo ya minkayulu samu na Yave. Yandi bakaka mosi-mosi na konso mutindu ya bibulu ya kuvedila, na konso mutindu ya bandeke ya kuvedila, mpe yandi yokaka yawu minkayulu na zulu ya kiyokolo ya minkayulu. 21 Yave kuwaka nsunga ya kitoko mpe kanisaka mutindu yayi: «Mu ke siinga dyaka ve ntoto samu na muntu. Ya tsyelika ntima ya muntu kele ya kukangama na yimbi banda buntwenya ya yandi. Mu ke kufwa dyaka ve nyonso yina kele moyo mutindu mu me sala yawu.
22 Bantangu nyonso yina ntoto ke zingila,
kukuna bambuma mpe kuyonzika yawu,
madidi mpe tiya,
ntangu ya bamvula mpe ntangu ya madidi ya ngolo,
mpimpa na ntangu,
yawu ke manisa ve.»