Nkadulu ya yimbi ya bantu
6
Bantu bandaka kukuma mingi na ntoto, mpe ba butaka bana ya bakento. 2 Bampeve yina ke zingaka na zulu talaka ti bana yango ya bakento vwandaka kitoko mingi, mpe ba kwelaka bayina ba soolaka na kati ya bakento yina. 3 Na yina, Yave tubaka: «Kiwumunu yina mu pesaka na bantu, yawu ke zingila na bawu bantangu nyonso ve. Samu ti kilumbu kele yina bawu ke kufwa kwandi. Banda bubu yayi, luzingu ya muntu ke luta ve nkama mosi na makumi zole ya bamvula.» 4 Na ntangu yina ba-Nefilimea vwandaka na ntoto, ba vwandaka tii na bantangu yina landaka. Banefilime ni binwani ya ngolo ya yinsi ya nkulu, bantu ya kuzabakana, bayina butukaka na bampeve yina ke zingaka na zulu, bawu na bakento yina ba kwelaka na ntoto.5 Yave talaka ti konso kilumbu yimbi vwandaka bwelama na ntoto. Konso kilumbu mayindu ya bantu vwandaka kaka ya kukangama na kusala yimbi. 6 Yave nyongaka na yina ti yandi salaka muntu na ntoto. Dyambu yina talisaka yandi mpasi mingi na ntima. 7 Yave tubaka: «Mu ke katula bantu yina mu yidikaka na ntoto, ya vwanda bantu, ya vwanda bibulu ya nene to ya fyoti, ya vwanda bandeke. Mu ke na kunyonga samu na yinki mu yidikaka kwandi bawu.» 8 Kasi Yave vwandaka yangalala na Nowa.
Nowa muntu ya mbote
9 Kinkulu ya Nowa ni yayi. Nowa vwandaka ve mutindu bantu ya ntangu ya yandi. Yandi, yandi vwandaka muntu ya kudedama, muntu ya ntima ya mbote. Yandi vwandaka tambula kintwadi na Nzambi. 10 Nowa butaka bana tatu: Seme, na Ame, na Yafete.
11 Na meso ya Nzambi yinza ya muvimba bebaka, kaka mambu ya yimbi vwandaka talana bisika nyonso. 12 Ntangu Nzambi talaka yinza, yinza talanaka ya kubeba. Bantu nyonso vwandaka ya kufuluka na bifu ya yimbi. 13 Ni yawu yina Nzambi tubaka na Nowa: «Mu me baka nzengolo ya kufwa bantu nyonso. Ni bawu bantu me sala ti ntoto ya muvimba kufuluka na yimbi. Mu ke bebisa bawu mbala mosi na ntoto nyonso. 14 Baka bayinti ya ngolo nge yidika ya nge nzaza. Sala bivinga mingi na kati ya yawu. Nge tula yawu gudron na kati mpe na nganda. 15 Nge sala yinda ya yawu na bametele nkama mosi na makumi tanu, bunene na bametele makumi zole na tanu, mutela na bametele kumi na tanu. 16 Nge yidikila yawu muludi. Kasi nge fwana bika mwasi ndambu mosi ya metele na kati-kati ya muludi yina na bibaka ya nzaza. Mwelo ya nzaza ke vwanda na kibaka mosi. Nge ke sala nzaza nyonso na bibandub tatu. 17 Munu mu ke na kufulusa yinza nyonso na maza. Mpe maza yina ke kufwa kima ni kima yina ke wumunaka. Nyonso na ntoto ke manisa na kufwa. 18 Kasi mu ke sala luwawanu na nge. Beno ke kota na nzaza, nge na kento ya nge, mpe bana ya nge na bakento ya bawu. 19 Nge ke baka bima ya konso mutindu yina ke wumunaka. Nge ke kotisa yawu zole zole na nzaza, ya kento na ya bakala, samu ti yawu tatamana kuzinga na nge. 20 Bandeke ya konso mutindu, mpe bibulu ya konso mutindu, ya nene na ya fyoti-fyoti, bawu ke kwiza zole zole pene-pene na nge samu ti bawu kufwa ve. 21 Nge, nge fwana yonzika bima ya mutindu na mutindu yina ba ke kudyaka. Ni yawu ke vwanda madya ya beno, na nge na bawu.» 22 Mpe Nowa salaka nyonso yina Nzambi tumisaka yandi. Ni mutindu yina yandi salaka.