Disumu ya Adami na Eva
3
Na kati ya bibulu nyonso ya mfinda yina Yave Nzambi yidikaka, ni nyoka lutilaka mayela ya kuvuna. Na yina, yandi yufulaka kento: «Ya kele ya tsyelika ti Nzambi zabisaka beno ti: "Beno fwana kudya ve bambuma nyonso ya bayinti ya bilanga?"» 2 Kento vutulaka na nyoka: «Ve! Beto lenda kudya bambuma nyonso yina kele na bilanga. 3 Kasi samu na bambuma ya yinti yina kele na kati-kati ya bilanga ya bayinti, Nzambi tubaka: “Beno kudya yawu ve, mpe beno kusimba yawu ve, kana ve, beno ke kufwa.”» 4 Nyoka vutulaka na kento: «Ve! beno ke kufwa ve. 5 Nzambi tubaka mutindu yina samu ti yandi zaba mbote ti, kilumbu yina beno ke kudya yawu, meso ya beno ke funguka, beno ke kuma mutindu yandi, na mayela ya kuzaba mambu ya yimbi to ya mbote.»6 Kento talaka ti bambuma ya yinti yango vwandaka mbote na kudya, kitoko na kutala, mpe mbote na kupesa mayela. Na yina, yandi bakaka mbuma mosi mpe yandi kudyaka yawu. Na manima ya kudya, yandi pesaka yawu mpe na bakala ya yandi yina vwandaka na yandi kuna. Bakala ya yandi mpe kudyaka yawu. 7 Mbala mosi, meso ya bawu fungukaka, bawu bakulaka ti bawu vwandaka kimpene. Bawu bakaka makasa ya yinti ya fike* mpe bawu yidikaka na yawu bilele ya kulwata.
8 Na nkokila, ntangu mwa mupepe ya madidi vwandaka fula, bawu kuwaka makelele ya Yave Nzambi yina vwandaka kwenda tambula na kati ya bilanga ya bayinti. Na yina, bakala na kento kwendaka bumbama yandi na kati-kati ya bayinti ya bilanga. 9 Yave Nzambi bokilaka bakala mpe yufulaka yandi: «Wapi sika nge kele?» 10 Bakala vutulaka: «Mu me kuwa nge na kutambula na kati ya bilanga ya bayinti, mu me kuzwa boma samu ti mu kele kimpene, ni yawu yina,
mu me bumbama.» 11 Yave Nzambi yufulaka dyaka yandi: «Nani me zabisa nge ti nge kele kimpene? Nge me kudya mbuma ya yinti yina mu yiminaka nge na kudya?» 12 Bakala vutulaka: «Ni kento yina nge pesaka munu, ni yandi me pesa munu mbuma ya yinti yina, mpe mu me kudya yawu.»
13 Na yina, Yave Nzambi yufulaka kento: «Samu na yinki nge me sala mutindu yina?» Kento vutulaka: «Ni nyoka me vuna munu, ni yawu yina, mu me kudya yawu.»
14 Yave Nzambi tubaka na nyoka:
«Samu ti nge me sala mutindu yina, mu me siinga nge
na kati ya bibulu nyonso.
Nge ke banda na kusyelumukakaa na ntoto,
mpe nge ke banda na kudyaka fundu-fundu,
bilumbu nyonso ya luzingu ya nge.
15 Mu ke tula kitantu na kati ya nge na kento,
mpe na kati ya bana ya nge na bana ya yandi.
Bawu ke kosona nge yintu.
Mpe nge, nge ke tatika bawu na kinkoso.»
16 Yandi tubaka na kento:
«Nge ke banda talaka mpasi mingi
na ntangu nge ke vwanda na kivumu.
Ni na mpasi nge ke banda butilaka.
Zaba ti, nge ke banda vwandaka kaka na nsatu ya bakala ya nge,
kasi bakala ya nge ke banda yalaka nge.»
17 Yandi tubaka na Adami: «Samu ti nge me kuwa mambu ya kento ya nge, mpe nge me kudya mbuma yina mu yiminaka nge,
mu ke siinga ntoto samu na nge. Ni na mpasi nge ke banda kuzwaka madya bilumbu nyonso ya luzingu ya nge. 18 Ntoto ke menisila nge bayinti ya bansende mpe bansolokoto. Nge ke banda na kudyaka bima yina ke menaka na ntoto.
19 Nge ke banda na kuzwaka madya
na mutoki ya nge,
tii kilumbu yina nge ke vutuka na ntoto,
sika ba bakaka nge.
Ya tsyelika nge kele fundu-fundu,
mpe ni na fundu-fundu nge ke vutuka.» 20 Adami pesaka kento ya yandi nkumbu Evab. Samu ti, ni yandi kele mama ya bantu nyonso yina kele moyo. 21 Yave Nzambi yidikilaka Adami na kento ya yandi bilele na bampusu ya bibulu, mpe yandi lwatisaka bawu yawu. 22 Yave Nzambi tubaka: «Tala mutindu muntu me kuma mutindu mosi na beto, na kuzaba mambu ya yimbi na ya mbote.» Yandi fwana kubaka ve mbuma yina ke pesaka luzingu. Samu ti kana yandi kudya yawu, yandi ke zinga bamvula na bamvula.» 23 Ni yawu yina, Yave Nzambi bingisaka muntu na bilanga ya Edeni, samu ti yandi kwenda sala bilanga na ntoto, ntoto yina ba bakaka na kuyidika yandi. 24 Na manima ya kubingisa muntu, Yave Nzambi tulaka bakelubac na minkwati ya tiya na mantwala ya bilanga ya Edeni, samu na kukengidila nzila yina ke kwendaka na yinti ya luzingu.