2
Ni mutindu yina salamaka zulu na ntoto, na bima nyonso yina kele na yawu. 2 Na manima ya kumanisa kisalu ya yandi nyonso, Nzambi pemaka na kilumbu ya sambwadi. 3 Nzambi sakumunaka kilumbu ya sambwadi mpe yandi salaka ti yawu kuvwanda kilumbu ya longo, samu ti ni na kilumbu yina yandi pemaka na manima ya kumanisa kisalu ya yandi nyonso, ya kuyidika bima nyonso.Bilanga ya Edeni
4 Tala mutindu salamaka zulu na ntoto. Na ntangu yina Yave Nzambi salaka zulu na ntoto, 5 ata mwa yinti mosi vwandaka na ntoto, mpe ata dititi mosi menaka, samu ti Yave Nzambi vwandaka me nokisa ntete mvula ve, mpe ata muntu vwandaka samu na kusala bilanga. 6 Kasi, ya vwandaka na kisika mosi yina vwandaka basisa maza na yisi ya ntoto, mpe maza yina vwandaka mwangana na ntoto nyonso.
7 Yave Nzambi bakaka fundu-fundu ya ntoto, mpe yandi yidikaka muntu na yawu. Yandi fulaka mupepe na mbombo ya muntu, mpe muntu kumaka muntu ya moyo. 8 Na manima, Yave Nzambi kunaka bilanga ya bayinti kuna na lweka ya esete na kizunga ya Edeni, mpe yandi tulaka kuna muntu yina yandi yidikaka. 9 Yave Nzambi menisaka bayinti ya mutindu na mutindu, yina vwandaka kitoko na kutala mpe bambuma ya yawu vwandaka mbote na kudya. Yandi tulaka na kati-kati ya bilanga, yinti ya luzingu mpe yinti yina ke pesaka mayela samu na kuzaba mambu ya yimbi to ya mbote.
10 Nzadi mosi bandaka na kizunga ya Edeni mpe vwandaka bolisa bilanga ya bayinti. Katuka kuna, nzadi yango kabukaka na bandambu yiya. 11 Nkumbu ya maza ya ntete vwandaka Pisone, ni yawu ke zungidilaka yinsi nyonso ya Avila. Yinsi yango kele na wolo, 12 wolo mosi ya mfunu mingi. Kuna vwandaka mpe na maaka ya yinti ya nsunga ya bedeliyume, na matadi ya ntalu ya onikese. 13 Nkumbu ya nzadi ya zole vwandaka Ngiyone. Ni yawu ke zungidilaka yinsi nyonso ya Kusea. 14 Nkumbu ya nzadi ya tatu kele Tingele. Ni yawu ke lutaka na esete ya Asuleb. Nzadi ya yiya vwandaka Efalate.
15 Yave Nzambi bakaka muntu mpe yandi tulaka yandi na bilanga ya Edeni samu na kusalaka bilanga mpe na kukebaka yawu. 16 Yave Nzambi pesaka yandi musiku yayi: «Nge lenda kudya bambuma ya bayinti nyonso yina kele na bilanga, 17 kasi nge fwana kudya ve bambuma ya yinti ya kuzaba mambu ya yimbi to ya mbote, samu ti kilumbu yina nge ke kudya yawu, nge ke kufwa.»
18 Na manima, Yave Nzambi tubaka: «Ya kele mbote ve ti bakala kuvwanda kaka yandi mosi. Mu fwana kuyidikila yandi kisadisi yina me fwanana na yandi.» 19 Yave Nzambi bakaka ntoto na kuyidika bibulu na bandeke ya mutindu na mutindu. Yandi nataka yawu na mantwala ya muntu samu na kutala wapi mutindu muntu ke bokila yawu. Mpe konso kibulu kuzwaka nkumbu yina muntu pesaka yandi. 20 Muntu pesaka bankumbu na bibulu nyonso ya bwala na ya mfinda, mpe na bandeke nyonso. Kasi yandi talaka ve kisadisi yina fwananaka na yandi mosi. 21 Na yina, Yave Nzambi lalisaka bakala pongi ya ngolo, mpe yandi katulaka yandi lubanzi mosi. Na manima, yandi kangaka musuni na kisika yawu vwandaka. 22 Na lubanzi yina yandi bakaka na bakala, Yave Nzambi yidikaka kento, mpe yandi nataka kento yango na sika ya bakala. 23 Ntangu bakala talaka kento yango, yandi lookaka: «Tala mbala yayi mukwa ya mikwa ya munu, mpe musuni ya musuni ya munu. Ba ke bokila yandi kento, samu ti yandi me katuka na bakala.»
24 Ni yawu yina, bakala ke bika tata na mama ya yandi na kukangama na kento ya yandi, mpe bawu zole ke kuma nzutu mosi.
25 Kento na bakala vwandaka kimpene, kasi bawu vwandaka talasana nsoni ve.